بابالار ءسوزى: توراڭعى اۋليە تۋرالى اڭىز
بۇل جوبا اياسىندا «بابالار ءسوزى»، «قازاق حاندارى»، «ەجەلگى قالالار تاريحى»، «حالىق قازىناسى» قاتارلى جاڭا ايدارلار اشىلدى.
«بابالار ءسوزى» ايدارى نەگىزىنە «مادەني مۇرا» باعدارلاماسى اياسىندا شىققان 100 تومدىق اۋىز ادەبيەتىنىڭ جىر-تولعاۋلارى، قيسسا-داستاندار، ءسوز ۇستاعان شەشەندەر مەن بيلەرىمىزدەن قالعان ناقىلدار، تاريحي جادىگەرلەر الىندى.
«قازاق حاندارى» ايدارىندا تاريحىمىزدا ەلىنە قورعان بولعان حانداردىڭ ءومىرى تۋرالى دەرەكتەر بەرىلەدى.
ال «ەجەلگى قالالار تاريحى» ايدارىنا قازاق دالاسىنداعى وركەنيەتتىڭ ورداسى بولعان كونە قالالاردىڭ تاريحى تۋرالى جازبالار جاريالانادى.
«حالىق قازىناسى» ايدارى بويىنشا، قازاقستانداعى تاريحي، مادەني ەسكەرتكىشتەر، قازاق حالقىنىڭ سالت-داستۇرلەرى، قولونەر، قارۋ-جاراقتارى تۋرالى ماعلۇماتتار بەرىلمەك.
جوبا ماتەريالدارى قازاق تىلىندە (قازاقشا جانە توتە جازۋمەن) اگەنتتىك سايتىندا جاريالانادى.
توراڭعىلى اۋليە
ەرتەدە عايىپتان با، الدە كوكتەن بە ءبىر بالا پايدا بولادى. بۇنى بىرەۋلەر قىز ەكەن دەيدى، بىرەۋلەر ەر بالا ەكەن دەيدى. ءبىراق نەگىزىنەن ەر بالا كورىنەدى. سول بالا جاس كەزىندە قايتىس بولىپ، سول جەرگە جەرلەنەدى. كەيىن بالانىڭ بەيىت باسىنا توراڭعىلى اعاشى پايدا بولىپ، داراق بولىپ ءوسىپ شىعادى. بالا بەيىتىنەن قاسيەتتى جاعدايلار كورىنىپ، حالىق بالانى اۋليە بالا دەپ جوريدى. سونىمەن سول بەيىتتى «توراڭعىلى اۋليە» دەپ اتايدى. توراڭعىلى اعاشىنىڭ ءبىر بۇتاعىن كەسىپ، نە شاۋىپ العان ادامدار كورەر كوزگە زارداپ شەگىپ اۋىرعاندارى بايقالادى. سودان كەيىن ءبىر دە ءبىر ادام بۇتاق المايتىن بولعان.
