وتاندىق اۆتو وندىرۋشىلەر قىتايمەن بىرلەسىپ جاڭا كولىك شىعارماق
اۆتووندىرۋشىلەردىڭ اۋقىمدى ماقسات- مىندەتتەرى وتاندىق ماشينا جاساۋشىلاردىڭ 3- فورۋمىندا ناقتىلاندى.
ماشينا جاساۋشىلاردىڭ بيىلعى فورۋمىنا وتاندىق كاسىپورىنداردان 450 جانە شەتەلدىك ۇيىمداردان 200 دەي مامان قاتىستى. ياعني الەمدىك اۆتوكولىك نارىعىنا مۇشە 30 مەملەكەتتىڭ وكىلى باس قالاداعى القالى جيىنعا ارنايى كەلگەن. وسىدان- اق شارانىڭ بۇل جولعى تاقىرىبى عالامدىق اۆتوكولىك وندىرۋشىلەر ءۇشىن ايرىقشا ماڭىزدى ەكەنى بايقالادى.
بۇگىندە ەلىمىز جىل سايىن ىشكى نارىق ءۇشىن 40 مىڭ جەڭىل كولىك قۇراستىرادى. بۇل وڭدەۋ ونەركاسىبىندەگى ۇلەستىڭ 4 پايىزىنا تەڭ. دەگەنمەن ەلىمىزدە ساتىلاتىن جاڭا تەمىر تۇلپارلاردىڭ 44 پايىزى يمپورتتىڭ ەنشىسىندە.
وتاندىق ماشينا جاساۋ ىسىندە تاعى ءبىر برەند پايدا بولادى. بۇل جولى قوستاناي وڭىرىندە اسپان استى ەلىمەن بىرلەسىپ JAC كولىگى قۇراستىرىلماق. تەمىر تۇلپاردىڭ ءارقايسىسى شامامەن 11 مىڭ دوللاردان ساتىلادى دەپ وتىر ماماندار. كولىكتى رەسەيگە ەكسپورتتاۋ مۇمكىندىگى دە جاسالعان. دەگەنمەن بۇل - 2017 - جىلدىڭ جوسپارى. سول ءۇشىن وتاندىق اۆتووندىرىستى ءبىر جەرگە شوعىرلاندىرۋ باستاماسى كوتەرىلدى.
كوپ ۇزاماي «قازاقستاندا جاسالعان» دەپ ايدار تاعىلعان كولىكتەر دە الەمدىك نارىققا شىعادى. سەبەبى جەرگىلىكتى اۆتووندىرۋشىلەر 4 جىلدان كەيىن وتاندىق جاڭا تەمىر تۇلپارلاردى جىلىنا 150 مىڭ دانامەن شەتەلگە ساتۋدى جوسپارلاپ وتىر. ال وسى مەرزىمدە سالانىڭ دامۋىنا قولبايلاۋ بولعان تۇيتكىلدەر تۇبەگەيلى رەتتەلۋى ءتيىس.
www.24.kz
