قىزىلوردا وبلىسى ءۇش جىل قاتارىنان كۇرىشتەن رەكوردتىق ءونىم الدى - فوتو
بۇل تۋرالى 3 - قازان كۇنى «التىن كۇز-2015» مەرەكەسى اياسىندا بيىلعى ەگىن جيناۋ قورىتىندىسى بويىنشا ءوندىرىس وزاتتارىن ماراپاتتاۋ سالتاناتىندا ايتىلدى. وندا وبلىس اكىمى قىرىمبەك كوشەربايەۆ ايماقتىڭ اۋىلشارۋاشىلىق سالاسى ماماندارىن قول جەتكىزگەن تابىستارىمەن شىن جۇرەكتەن قۇتتىقتادى.
- حالىقتا نەسىبەسى مول ەلدىڭ ەگىنى بىتىك شىعادى دەگەن ءسوز بار. كەشە عانا سىر ديحاندارى الا جازداي كۇتىپ باپتاعان ەگىندەرىن جينادى. بيىل دا ەگىنشىلەرىمىز مول ءونىم الىپ، ءۇشىنشى جىل قاتارىنان رەكوردتىق كورسەتكىش بەردى. سوڭعى جىلدارى وبلىسىمىزدىڭ اۋىل شارۋاشىلىعى سالاسى جاقسى دامىپ كەلەدى. سىر ەلىنىڭ باستى داقىلى كۇرىش ءوندىرىسىنىڭ كولەمى 11,6 پايىز ءوسىپ وتىر. مال شارۋاشىلىعى بويىنشا ءىرى قارا، جىلقى جانە تۇيە باسىنىڭ سانى ەڭ بەرەكەلى 90- جىلعى دەڭگەيدەن اسىپ ءتۇستى. ال اگروونەركاسىپ كەشەنىنە سالىنعان ينۆەستيتسيا كولەمى 7,7 ەسەگە ءوستى، - دەدى وبلىس اكىمى ق. كوشەربايەۆ.
ايماق باسشىسى وبلىستا اۋىل شارۋاشىلىق سالاسىن دامىتۋعا قاتىستى اتقارىلىپ جاتقان جۇمىستارعا توقتالىپ ءوتتى. بۇگىندە تامشىلاتىپ سۋارۋ ادىسىمەن جۇگەرى جانە قىزاناق ەگىپ، كراحمال، تومات پاستاسىن ءوندىرۋ جوبالارىنىڭ العاشقى جۇمىستارى باستالىپ كەتتى. سونداي- اق، وبلىس اكىمى سىر قاۋىنىنىڭ الەۋەتىن ارتتىرۋ كەرەكتىگىن ايتتى. كەزىندە جاڭاقورعان مەن قازالى اراسىنداعى ءار ستانسيادا جۇمىس جاساعان قاۋىن قابىلداۋ پۋنكتتەرىن بىرتىندەپ اشۋ ماسەلەسى بويىنشا يننوۆاتسيالىق جوبالاردى ىسكە قوسۋ ءۇشىن «بايقوڭىر» الەۋمەتتىك كاسىپكەرلىك كورپوراتسياسىنىڭ مۇمكىندىكتەرى قاراستىرىلاتىن بولادى.
ايماقتا ەگىن شارۋاشىلىعىمەن بىرگە مال، بالىق شارۋاشىلىعىن دامىتۋ بارىسىندا دا تابىستار كوپ. بۇل سالالاردى ءارى قاراي دامىتۋ ماقساتىندا جاڭاقورعان اۋدانىندا ءبىرىنشى رەت مالشىلار سلەتى جانە ارال اۋدانىندا ءبىرىنشى رەت بالىقشىلار سلەتى ءوتتى. ايتا كەتەيىك، بيىل وبلىستا قۋاتى جىلىنا 7 مىڭ توننا توقتى ەتىن وڭدەيتىن ەت كومبيناتىن جانە ءىرى مال بورداقىلاۋ الاڭدارىن سالۋ جۇمىستارى قولعا الىندى.
سالتاناتتى جيىندا قازاقستاننىڭ ەڭبەك ەرى، وبلىستىق كۇرىش ءوندىرۋشى جانە قايتا وڭدەۋشىلەر اسسوتسياتسياسىنىڭ ءتوراعاسى ابزال ەراليەۆ ەلباسىعا ارنالعان ۇندەۋدى وقىدى. مۇنان سوڭ وبلىس اكىمى ق. كوشەربايەۆ وبلىستىڭ اۋىل شارۋاشىلىعى سالاسىنىڭ ەڭبەك وزاتتارىن 24 ءتۇرلى نوميناتسيامەن ماراپاتتاپ، زاتتاي سىيلىقتار تابىستادى. سونىمەن قاتار، «مال شارۋاشىلىعى بويىنشا وزات اۋدان» - ارال اۋدانى، «ەگىن شارۋاشىلىعى بويىنشا وزات اۋدان» - سىرداريا اۋدانى، «اۋىل شارۋاشىلىعى ونىمدەرىن وڭدەۋ بويىنشا وزات اۋدان» - قازالى اۋداندارى ماراپاتتالدى. ال ەگىنى بىتىك شىققان جالاعاش اۋدانى ناۋقان قورىتىندىسى بويىنشا «ۇزدىك» دەپ تانىلدى. اۋىل شارۋاشىلىعى سالاسىنىڭ ەڭبەك وزاتتارىن ماراپاتتاۋ سالتاناتى مەرەكەلىك كونسەرتكە ۇلاستى.
