تۇركىستانعا «ۇلى دالا ەلى» تاريحي-مادەني ەكسپەديتسياسى كەلدى - فوتو
قازاق حاندىعىنىڭ 550 جىلدىعىنا ارنالعان ەكسپەديتسيا قاتىسۋشىلارىن قوجا احمەت ءياسساۋيدىڭ كەسەنەسى الدىندا قوشەمەتپەن قارسى الدى. ەسكە سالا كەتەيىك، بۇل اۋقىمدى اكسيانىڭ باستى ميسسياسى - قازاقستان حالقىنىڭ تاريحي-مادەني جانە رۋحاني مۇراسىن ناسيحاتتاپ، تانۋ نەگىزىندە قازاقستاندىق بىرتەكتىلىك پەن ۇلتتىق بىرلىكتى نىعايتۋ.
ەكسپەديتسياعا ولكەتانۋشىلار، ەتنومادەني بىرلەستىكتەردىڭ، مەملەكەتتىك مەكەمەلەردىڭ باسشىلارى، ق ح ا مۇشەلەرى جانە جاستار كوشباسشىلارى قاتىسۋدا.
وڭتۇستىك قازاقستاندىقتار قىزىلوردا وبلىسى دەلەگاتسياسىنان ەستافەتالىق كۇندەلىك-كىتاپتى سالتاناتتى تۇردە قابىلداپ الدى، ول ەكسپەديتسيا بويىنداعى كەلەسى وبلىسقا بەرىلىپ وتىرىلادى. بۇل كىتاپقا رەسپۋبليكالىق ەكسپەديتسيا قاتىسۋشىلارى بولعان جەرلەرىنەن كۇندەلىك جازىپ، قىزىقتى وقيعالارعا، ەل تاريحىنا باسا نازار اۋدارىپ وتىرادى.
«بۇل كۇندەرى ەكسپەديتسيا ءبىزدىڭ وڭىردە بولعان كەزىندە ءبىز كوپتەگەن قىزىقتى وقيعالاردى قامتىپ جازامىز. ءبىز ونى لايىقتى دەرەكتەرمەن تولىقتىرىپ، قازاق حاندىعىنىڭ 550 جىلدىعىنىڭ باستى شارالارى وتەتىن جامبىل وبلىسىنا تاپسىرامىز»، - دەدى رەسپۋبليكالىق ەكسپەديتسيا قاتىسۋشىسى كەڭەس ىسمايىلوۆ.
وڭتۇستىك قازاقستاندا ەكسپەديتسيا 4 كۇن ايالدايدى. وسى كەزدە دەلەگاتسيا قازاق حاندىعىنىڭ قۇرىلۋى، نىعايۋى جانە گۇلدەنۋى تاريحىمەن بايلانىستى بىرنەشە اۋدانداردا بولماق. ماسەلەن، ەكسپەديتسيا ەجەلگى تۇركىستان قالاسىنىڭ تاريحي-مادەني ورىندارىندا، وتىرار، ورداباسى، بايدىبەك، سوزاق اۋداندارىندا بولىپ، عىلىمي-تانىمدىق شارالار وتكىزەدى.
ەكسپەديتسيا اياسىندا اۋداندار حالقىمەن كەزدەسۋلەر جوسپارلانعان، وندا تۇرعىندارعا ۇلت جوسپارى - «100 ناقتى قادام» تۇسىندىرىلەدى، قازاق حاندىعىنىڭ تاريحى مەن مەملەكەتتىلىكتىڭ باستاۋلارىنا ارنالعان اڭگىمەلەر وتكىزىلەدى.
