ەلباسىنىڭ ب ۇ ۇ مىنبەرىندە سويلەگەن ءسوزى قازاقستان ءۇشىن اسا زور ستراتەگيالىق ماڭىزعا يە - ق. توقايەۆ
بۇگىن سەناتتىڭ جالپى وتىرىسى بارىسىندا سپيكەر قاسىم-جومارت توقايەۆ وسىلاي مالىمدەدى.
«ب ۇ ۇ باس اسسامبلەياسىنىڭ تاريحي مەرەيتويلىق سەسسياسىندا سويلەگەن سوزىندە ەلباسى ن. نازاربايەۆ الەمدىك داعدارىستى ەڭسەرۋ جانە حالىقارالىق قاۋىپسىزدىكتى نىعايتۋدا وراسان زور ءمانى بار ناقتى باستامالاردى كوتەردى. پرەزيدەنت ХХІ عاسىرداعى يادروسىز الەم قالىپتاستىرۋدىڭ جاڭا بولاشاقتىق تۇجىرىمداماسىن، حالىقارالىق تەرروريزمگە قارسى كۇرەستىڭ دۇنيەجۇزىلىك جەلىسىن قۇرۋ قاجەتتىگىن مالىمدەدى.
زامانىمىزدىڭ اسا تاجىريبەلى ساياساتكەرى، ازياداعى قاۋىپسىزدىكتىڭ ىرگەتاسىن قالاۋشى، ەۋرازيالىق ىقپالداستىقتىڭ نەگىزىن سالعان پرەزيدەنتىمىزدىڭ باستامالارى حالىقارالىق ساياسي جانە ديپلوماتيالىق قاۋىمداستىقتىڭ اسا جوعارى قىزىعۋشىلىعىن تۋدىراتىنى داۋسىز. بۇگىندە بۇل باستامالارعا الەمنىڭ جەتەكشى مەملەكەتتەرى نازار اۋدارۋدا. پرەزيدەنتىمىزدىڭ الەمنىڭ باستى مىنبەرىندە سويلەگەن ءسوزى قازاقستان ءۇشىن اسا زور ستراتەگيالىق ماڭىزعا يە. بۇل باستامالار قازىرگى قۇبىلمالى الەمدە ەلىمىزدىڭ ۇستانىمدارىن ارى قاراي نىعايتا تۇسەدى»، - دەدى ق. توقايەۆ.
سونىمەن قاتار، پالاتا ءتوراعاسى بۇگىنگى وتىرىستا ەلىمىزدىڭ ىشكى الەۋەتىن كۇشەيتەتۋگە باعىتتالعان پرەزيدەنتتىڭ «100 ناقتى قادام» اتتى ۇلت جوسپارىن ىسكە اسىرۋدى كوزدەيتىن زاڭ جوبالارى تالقىلاناتىنىن ەسكە سالىپ، بۇل جۇمىستىڭ ناتيجەلى بولاتىنىنا سەنىم ءبىلدىردى.
«قازاقستاننىڭ حالىقارالىق بەدەلىن ارتتىرىپ، قوعامدا تۇراقتىلىق پەن كەلىسىمنىڭ نىعايۋىنا سەنات دەپۋتاتتارى ءوز ۇلەسىن قوساتىنى ءسوزسىز»، - دەدى سپيكەر ق. توقايەۆ.
اۆتور: قانات مامەتقازى ۇلى
