ايەلدەردى تەحنيكالىق ماماندىقتارعا وقىتۋدىڭ ماڭىزى زور - گ. ءابدىقالىقوۆا

استانا. قازاقپارات - بۇگىن ق ر مەملەكەتتىك حاتشىسى گۇلشارا ءابدىقالىقوۆانىڭ جەتەكشىلىگىمەن ق ر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ كەزەكتى وتىرىسى ءوتتى.

وندا «نۇرلى جول-بولاشاققا باستار جول» جاڭا ەكونوميكالىق ساياساتىن ىسكە اسىرۋ اياسىندا ايەلدەر اراسىنان جوعارى بىلىكتى ماماندار دايارلاۋ ماسەلەلەرى تالقىلاندى.

ۇسىنىلعان مالىمەتتەرگە قاراعاندا، «نۇرلى جول» باعدارلاماسىنىڭ اياسىندا، سونىڭ ىشىندە «باتىس ەۋروپا-باتىس قىتاي» حالىقارالىق ترانزيتتىك ءدالىزىن سالۋ جوباسىنا 1,5 مىڭ ايەل قاتىسۋدا.

بۇل اتالعان جوباعا تارتىلعان بارلىق جۇمىسشىلاردىڭ ون پايىزىن قۇرايدى. ال «نۇرلى جول» باعدارلاماسى اياسىنداعى 12 «شۇعىلا» قاعيداتى (ورتالىق-وڭتۇستىك؛ ورتالىق-شىعىس؛ ورتالىق-باتىس) باعىتىنداعى اۆتوجولداردى سالۋعا تارتىلاتىنداردىڭ ون پايىزىن نەمەسە شامامەن 20 مىڭنان استامىن ايەل ازاماتشالار قۇرايتىن بولادى.

«ءبىلىم جانە عىلىم مينيسترلىگىنىڭ اقپاراتىنا سايكەس، «نۇرلى جول - بولاشاققا باستار جول» مەملەكەتتىك باعدارلاماسى اياسىندا ءبىلىم بەرۋ باعدارلامالارىن جاڭا زەرتحانالىق جابدىقتاردى پايدالانا وتىرىپ وقىتۋ قاراستىرىلادى. بۇل ءوز كەزەگىندە ەكونوميكامىزدىڭ قاجەتتىلىكتەرىنە ساي كەلەتىن جوعارى بىلىكتى مامانداردى دايارلاۋعا مۇمكىندىك بەرەدى. سونىمەن قاتار، قازىرگى تاڭدا ايەل ازاماتشالاردى تەحنيكالىق ماماندىقتارعا وقىتۋدىڭ جانە ولاردى «نۇرلى جول» باعدارلاماسىنا بەلسەنە قاتىستىرۋدىڭ ماڭىزى زور»، - دەدى مەملەكەتتىك حاتشى.

وتىرىس بارىسىندا سونىمەن بىرگە، بالالار-جاسوسپىرىمدەر تۋريزمىن دامىتۋ ماسەلەلەرى دە ءسوز بولدى. بۇدان بولەك، 2006-2016-جىلدارعا ارنالعان گەندەرلىك تەڭدىك ستراتەگياسىن ىسكە اسىرۋ بويىنشا اقمولا وبلىسى اكىمدىگى تاراپىنان قابىلدانىپ جاتقان شارالار دا قارالدى.

تالقىلاۋ قورىتىندىسى بويىنشا ق ر مەملەكەتتىك حاتشىسى ق ر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا ءتورايىمى گۇلشارا ءابدىقالىقوۆا قارالعان ماسەلەلەر بويىنشا ورتالىق مەملەكەتتىك ورگاندارعا ءبىرقاتار ناقتى تاپسىرمالار بەردى.

اۆتور: قانات مامەتقازى ۇلى