الماتىدا جولدا بۇزاقىلىق جاساپ، «فورساج» ۇيىمداستىرعاندار جازاسىن الدى

الماتى. قازاقپارات - الماتىدا ءال-فارابي بويىندا جول قوزعالىسىن بوگەپ، «فورساج» ۇيىمداستىرعاندار 10 تاۋلىككە قامالدى.

بۇل تۋرالى قالالىق سوتتىڭ باسپا ءسوز قىزمەتى حابارلادى.

اۋدانارالىق مامانداندىرىلعان اكىمشىلىك سوت 26 جاستاعى قۇربانوۆ تاماز بەن 23 جاستاعى مامەدوۆ افگاندى ق ر ا ق ب ك 434-بابى بويىنشا ايىپتى دەپ تاۋىپ، 10 تاۋلىككە قاماۋعا شەشىم شىعاردى.

ايتا كەتۋ كەرەك، الماتىدا بىرنەشە كولىك ءال-فارابي كوشەسىنىڭ بويىندا تۇتاس جولدى بىتەپ، «فورساج» ۇيىمداستىرعان بولاتىن. كەيىن بەلگىلى بولعانداي، ولار توي كورتەجىنىڭ قاتىسۋشىلارى بولىپ شىقتى. جول بويىنداعى «دريفت- شوۋ» بەينەكامەراعا ءتۇسىپ قالعان.

قالالىق پوليتسيا كولىك قوزعالىسىنا كەدەرگى كەلتىرگەن ازاماتتاردى اكىمشىلىك جاۋاپكەرشىلىككە تارتتى. ناقتىراق ايتقاندا، 26 جاستاعى قۇربانوۆ تاماز بەن 23 جاستاعى مامەدوۆ افگان اكىمشىلىك كودەكستىڭ 7-بابى بويىنشا ايىپقا تارتىلدى.

«Lexus IS» تىزگىندەگەن قۇربانوۆ ق ر ا ق ب ك 606-بابىنىڭ 1-تارماعى (اپاتتى جاعداي تۋدىرا وتىرىپ جول ەرەجەسىن بۇزۋ)، 614-بابى (كولىكتەرگە كەدەرگى كەلتىرۋ)، 590 - بابىنىڭ 1-تارماعى (انىق كورىنبەيتىن مەملەكەتتىك تىركەۋ نومىرىمەن جولعا شىعۋ) بويىنشا جاۋاپ بەرەتىن بولادى. ال «ميتسۋبيسي لانسەر» تىزگىندەگەن مامەدوۆكە قاتىستى اكىمشىلىك پوليتسيا باسقارماسىمەن 4-باپ بويىنشا: ق ر ا ق ب ك 606 بابىنىڭ 1-تارماعى (اپاتتى جاعداي تۋدىرا وتىرىپ جول ەرەجەسىن بۇزۋ)، 614 - بابى (كولىكتەرگە كەدەرگى كەلتىرۋ)، 590-بابىنىڭ 1-تارماعى (انىق كورىنبەيتىن مەملەكەتتىك تىركەۋ نومىرىمەن جولعا شىعۋ)، 601-بابىنىڭ 1-تارماعى (جول بەلگىلەرىنە نازار اۋدارماۋ) بويىنشا اكىمشىلىك حاتتاما تولتىرىلدى. سونداي-اق، اشىق جولدى ادەيى بىتەپ، قاساقانا جىلدامدىقتى ازايتقان توي كورتەجىنىڭ تاعى ءۇش كولىك جۇرگىزۋشىسىنە قاتىستى ق ر ا ق ب ك 614 - بابى (كولىكتەرگە كەدەرگى كەلتىرۋ) حاتتاما تولتىرىلدى.

اۆتور: گۇلميرا عوسمانالي