قالا كۇنىنە ارنالعان مادەني- كوپشىلىك شارالار جوعارى دەڭگەيدە ءوتتى - تالدىقورعان
جەتىسۋدىڭ كىندىك قالاسى بيىل دا ءوزىنىڭ تۋعان كۇنىن ەرەكشە اتاپ ءوتتى. قالا كۇنىنە ارنالعان مادەني- كوپشىلىك شارالار لەگى وبلىس اكىمى اماندىق باتالوۆ باستاعان قوناقتاردىڭ داڭق مەموريالىنا گۇل شوقتارىن قويۋ راسىمىنەن باستالدى.
باتىرلار ەرلىگىنە تاعزىم ەتىپ، ۇنسىزدىكپەن ەسكە العان ءوڭىر باسشىسى جانە ءبىر توپ اتقامىنەرلەر قالالىق اسكەري گارنيزونىنىڭ قازاقستان رەسپۋبليكاسى قارۋلى كۇشتەرىندە قولدانىستا تۇرعان قارۋ- جاراقتار مەن اسكەري تەحنيكالار قويىلعان كورمەسىن تاماشالادى. بالالار كوركەمسۋرەت مەكتەبىنىڭ، ەتنومادەني بىرلەستىكتەردىڭ قولونەر جانە اسپازدىق سونىمەن قاتار كاسىپورىنداردىڭ، شاعىن جانە ورتا بيزنەستىڭ، قالا ساۋلەتىنىڭ، كوممۋنالدىق قىزمەتتىڭ، باسقا دا سالالاردىڭ كورمەلەرى قويىلىپ، كوپشىلىك ەرەكشە ىقىلاسپەن تاماشالادى.
مەرەكە كۇنىنە وراي تاعام سالاسىندا ەڭبەك ەتىپ جۇرگەن كاسىپكەرلەر دە ءوزىنىڭ سۇبەلى ۇلەسىن قوستى. اتاپ ايتقاندا، قازاق حاندىعىنىڭ 550 جىلدىعىنا ارنايى ديامەترى550 سم. بولاتىن پيتستسا مەن سالماعى 80 كەلى تارتاتىن كولەمدى ءتاتتى تاعام ازىرلەپ، قالا تۇرعىندارى مەن قوناقتارىنا تەگىن ۇلەستىرىلدى. ورتالىق الاڭدا «ءانشى بالاپان» ، «ەكى جۇلدىز» جانە «ميسس وباياشكا» سىندى بايقاۋلاردىڭ قاتىسۋشىلارى ءوز ونەرلەرىن كوپشىلىككە ۇسىنىپ، ىستىق ىقىلاسقا بولەندى. مەرەكەلىك شارا ورتالىق ستاديوندا جالعاسىن تاپتى.
بۇل كۇنى ستاديونعا جيىلعان جۇرتشىلىقتىڭ قاراسى كوپ بولدى. وسىدان- اق، قالا تۇرعىندارىنىڭ ءاربىر ىسكە بەي- جاي قارامايتىندىعى اڭعارىلادى. شارانى وبلىس اكىمى اماندىق باتالوۆ اشىپ، تالدىقورعاندىقتاردى مەرەكەمەن قۇتتىقتادى:
- ەلباسى نۇرسۇلتان نازاربايەۆتىڭ كورەگەن ساياساتىنىڭ ناتيجەسىندە ۇلت جوسپارى «100 ناقتى قادام» باعدارلاماسى اياسىندا قارجىلىق داعدارىسقا قاراماستان ەلىمىزدە بالاباقشا، مەكتەپ، اۋرۋحانا، تۇرعىن ۇيلەر سالىنىپ، جولدار جاڭارتىلۋدا. سونىڭ ىشىندە جەتىسۋدىڭ كىندىك قالاسى تالدىقورعاننىڭ كەلبەتى كوز الدىمىزدا جاڭارىپ، جاقسارىپ كەلەدى. دانا حالقىمىزدىڭ «ىرىس الدى ىنتىماق» دەگەن اتالى ءسوزى بار. حالىقتىڭ ىنتىماعى، تاتۋلىعى، ءبىر- بىرىنە دەگەن قۇرمەتى - ەل وركەندەۋىنىڭ كەپىلى. مەرەيلى جىلدا تويلانىپ جاتقان قالامىزدىڭ تۋعان كۇنى قۇتتى بولسىن! ءار شاڭىراققا جاقسىلىق، مول باقىت تىلەيمىن، - دەدى ءوڭىر باسشىسى.
ەڭبەكپەن ەلەنگەن ءبىر توپ اعا بۋىن تالدىقورعان قالاسىنىڭ قۇرمەتتى ازاماتى اتاعىنا يە بولدى. مەرەكەلىك شارا قالانىڭ ۇزدىك ونەر ۇجىمدارى ازىرلەگەن تەاترلاندىرىلعان كورىنىس پەن گالا كونسەرتكە جالعاستى.
قالا كۇنىنە ورايلاستىرىلعان كەش مەرەكەلىك وتشاشۋمەن اياقتالدى.
