قىزىلوردادا مۇناي ءوندىرۋ دەڭگەيىن ساقتاپ قالۋ ماسەلەلەرى تالقىلاندى - فوتو

قىزىلوردا. قازاقپارات - قىزىلوردادا ق ر ەنەرگەتيكا ۆيتسە- ءمينيسترى ماعزۇم مىرزاعاليەۆتىڭ قاتىسۋىمەن جەر قويناۋىن پايدالانۋشىلاردىڭ باسقوسۋى ءوتتى، دەپ حابارلادى وبلىستىق اكىمدىكتىڭ باسپا ءسوز قىزمەتىنەن.

كەڭەستە قىزىلوردا وبلىسىنىڭ مۇناي كەن ورىندارىندا مۇناي ءوندىرۋ دەڭگەيىن ساقتاۋ جانە قازاقستاندىق جەرگىلىكتى قامتاماسىز ەتۋدى دامىتۋ ماسەلەلەرى تالقىلاندى. ەنەرگەتيكا ۆيسە- ءمينيسترى زاڭناماعا ەنگىزىلەتىن وزگەرىستەر تۋرالى بايانداپ بەردى.

ونىڭ ايتۋىنشا، كەلەشەكتە مۇناي ءوندىرۋ دەڭگەيىنىڭ تومەندەۋى جانە مۇناي وندىرۋشىلەردىڭ تابىسى ازايۋىن ەسكەرە وتىرا، زاڭناماعا ءبىرقاتار سالىق جيناۋ جەڭىلدىكتەرى ەنگىزىلەدى جانە ءبىر نىسان بويىنشا بىرنەشە مارتە سالىق سالۋ جويىلادى.

قىزىلوردا وبلىسى اكىمى قىرىمبەك كوشەربايەۆ ايماقتاعى جاعداي تۋرالى ايتىپ بەردى.

«جەڭىل وندىرىلەتىن مۇناي ءداۋىرى ءبىتتى» ، - دەدى وبلىس اكىمى. «ەندى جاڭا تەرەڭ ءوندىرۋ تەحنولوگيالارىن ەنگىزەتىن جانە ەكونوميكامىزدى ءارتاراپتاندىراتىن كەز كەلدى. سونىمەن قاتار جەرگىلىكتى قامتاماسىز ەتۋدى دامىتۋ بويىنشا ءبىرقاتار ماسەلە بار. مىسالى، قىزمەتتەر باعالارى وبلىسىمىزدا رەسپۋبليكا بويىنشا ەڭ تومەن، وعان قوسا ينفلياتسيا باعا قويۋ بارىسىندا ەسكەرىلمەيدى. بۇل ماسەلەلەر بىرنەشە مارتە ۇكىمەتتە تالقىلاندى، وتاندىق مۇناي سالاسىنا دا قىزمەت كورسەتەتىن كومپانيالاردى قورعاۋ بويىنشا ءبىرقاتار ۇسىنىس دايىندالىپ، ۇسىنىلدى. پرەمەر- مينيستر جوبانى قولدادى».

بيىل ناۋرىز ايىنان باستاپ جەرگىلىكتى قامتاماسىز ەتۋدى دامىتۋ بويىنشا قاۋىمداستىق جۇمىسىن باستادى. قاۋىمداستىق ءتوراعاسى يسا التايەۆ ۇيىم جۇمىسى تۋرالى ءسوز قوزعاپ، ءبىرقاتار ۇسىنىس ايتتى. سونداي- اق ول وبلىستا تاجىريبەلىك - ونەركاسىپتىك زەرتتەۋلەردى وتكىزۋ جانە رەسەي مەن ۇلى بريتانيا عالىمدارىمەن بىرلەسە عىلىمي ورتالىق اشۋدى ۇسىندى.

قىزمەت كورسەتەتىن مەردىگەرلەردىڭ ايتۋىنشا، مۇناي كومپانيالارى كوپ جاعدايدا «وزدەرىنىڭ» مەردىگەرلەرىمەن جۇمىس ىستەپ، تەندەر ناتيجەلەرى بويىنشا دالەلدى جاۋاپ بەرمەيدى.

- ءبىز بايقاۋدى اشىق تۇردە وتكىزۋدى تالاپ ەتەمىز. بۇل ماسەلە بويىنشا وبلىس باسشىلىعى مەردىگەرلەردى قولدايدى. ەگەر بايقاۋعا دايىندىعىمىز دۇرىس بولماسا دالەلدى قورىتىندى بەرىڭىز، كەلەسى جولى دايىندالامىز. ءبىراق جاسىرىن تۇردە شەشىم قابىلداۋعا جول بەرمەيمىز، - دەدى وبلىس اكىمى.

م. مىرزاعاليەۆ مەردىگەر كومپانيالاردىڭ ۇسىنىستارىن تىڭداپ، ولاردىڭ جاقىن ارادا مينيسترلىكتە قارالاتىندىعىن جەتكىزدى.