ماقسارى مايى - قازاقستاندىق برەند
سونداي جوبانىڭ ءبىرى شۋ وڭىرىندە ىسكە اسىرىلۋدا. بۇل جوبانىڭ باسقالاردان ەرەكشەلىگى سول، ادام اعزاسىنا وتە پايدالى، كوپتەگەن ەلدەردە قىمباتقا باعالاناتىن جاڭا ءونىم - ماقسارى مايىن شىعارۋدى كوزدەيدى.
قازاقستاندىقتار ءۇشىن بۇل - ەرەكشە جاڭالىق. ويتكەنى، ءبىز ماقسارى ونىمدەرىن مۇلدە قولدانبايمىز دەسەك تە بولادى. سويتسەك، مۇنىمىز ەرەكشە قاسيەتكە يە وسىمدىكتىڭ كول- كوسىر پايداسىن بىلمەگەندىكتەن ەكەن.
ماقسارى وڭدەيتىن زاۋىت شۋ اۋدانىنىڭ بىرلىك اۋىلىندا ورنالاسقان. «Kaz Ir Agro» جاۋاپكەرشىلىگى شەكتەۋلى سەرىكتەستىگى 2006 - جىلى قۇرىلعان. ولار وزدەرىنىڭ قاراۋىنداعى 5000 گەكتار اۋماققا ماقسارى ءوسىرىپ، ءوندىرىس ورنىندا سونىڭ مايىن سىعىپ الادى. شيكىزاتتى وزدەرىندە ءوسىرۋ ولارعا وتە ءتيىمدى. كاسىپورىننىڭ باس ديرەكتورى، تەگى پارسىلىق بيزنەسمەن حاميترەزا اليناگيان جەكە ءوندىرىس ورنىن نەلىكتەن ءدال قازاقستاندا، ونىڭ ىشىندە جامبىل وبلىسىندا اشقانىن بايىپپەن جەتكىزدى.
«تۋعان ەلىم يراننان قازاقستانعا كەلگەنىمە 15 جىل بولدى. ماماندىعىم ەكونوميست بولعانىمەن، كوپ جىلدان بەرى اۋىل شارۋاشىلىعى ونىمدەرىن وڭدەۋ سالاسىندا ەڭبەك ەتتىم. جالپى، ءبىز وڭدەيتىن ماقسارى الەمنىڭ كوپتەگەن ەلدەرىندە مۇلدە وسپەيدى. ال، قازاقستاندا، وندا دا وڭتۇستىك وڭىرلەردە بۇل داقىل مولىنان جەتكىلىكتى. ونى باپتاپ، ءوسىرۋ دە اسا قيىن ەمەس. سوندىقتان، وسى وندىرىسكە ءبىرجولا بەت بۇردىم.
ماقسارى مايى ا ق ش پەن جاپونيا سەكىلدى دامىعان ەلدەردە جوعارى باعالانادى. بىلايشا ايتقاندا، قۇنى بىزدەگىدەن ون ەسە قىمبات. ونى تەك تاعامعا پايدالانۋ ءۇشىن ەمەس، ماسساج جاساۋعا، شاش، تەرى كۇتىمىنە پايدالانادى. سوندىقتان، ءبىز ماقسارى مايىنىڭ قۇندىلىعى تۋرالى قازاقستاندىقتارعا ەكى تىلدە اقپارات بەرەتىن ارنايى سايت اشتىق (www.kaziragro.kz) . بۇل اقپارات قۇرالىنىڭ قولدانۋشىلارى بۇگىننىڭ وزىندە از ەمەس. سول ارقىلى ساتىپ الۋشىلارىمىز دا كوبەيۋدە. ءبىز ازىرگە مايدى قىتاي، رەسەي، ا ق ش پەن يرانعا ەكسپورتقا شىعارۋدامىز. كەلەشەكتە ءونىم كولەمى الدەقايدا ۇلعايادى، سول كەزدە ەكسپورتقا دا، ىشكى رىنوكقا دا كوپتەپ شىعارامىز»، - دەيدى كاسىپكەر.
جوبا قۇنى 5,7 ميلليون ا ق ش دوللارى كولەمىندە. 2011 - جىلى گەرمانيادان جاڭا تەحنولوگيا ساتىپ الىنعان. بۇگىندە 8 گەكتار جەردى الاتىن تولىققاندى ءوندىرىس ورنى تىنىمسىز جۇمىس ىستەپ تۇر.
شەت ەلدىڭ تەحنيكاسىن پايدالانعانىمەن، وتاندىق ساپالى ءونىمدى ءوندىرىپ وتىرعان سەرىكتەستىك بۇگىندە تەك ماي ەمەس، جومدى دا ەكسپورتقا شىعارۋدا. زاۋىت قازىرگى تاڭدا ايىنا 120 مىڭ ليتر ماي شىعارادى. كاسىپورىندا 50 ادام تۇراقتى جۇمىس ىستەيدى.
«وڭىرگە قارجى سالعىسى كەلەتىن ينۆەستورلار وتە كوپ. بىزگە يراندىق ازاماتتار ينۆەستيتسيا قۇيىپ وتىر. سونىمەن بىرگە، حالىق بانكىنەن نەسيە الساق دەگەن وي بار. كەلەشەكتە ماقسارىدان جاسالاتىن مايونەز، شاشقا ارنالعان گەل، كرەم سەكىلدى باسقا دا زاتتاردى ءوندىرۋدى جوسپارلاپ وتىرمىن. كەلەشەكتە ماقسارى ونىمدەرىن وبلىستىڭ برەندى رەتىندە قالىپتاستىرۋدى ارماندايمىن»، - دەيدى حاميترەزا مىرزا.
جانات قاپالبايەۆا
