الماتى ورتالىق مەشىتىنىڭ ماڭىندا قۇربان ايت مەيرامى اياسىندا ۇلتتىق سپورت تۇرلەرىنەن سايىس ءوتتى - فوتو
قالالىق ورتالىق مەشىتتە «ءدىن مەن ءداستۇر» قاعيداسى اياسىندا جاماعات ارقان تارتىستان، قول كۇرەستەن، ۇلتتىق سپورت تۇرلەرىنەن سايىستى. قازىر جاس بۇلدىرشىندەرگە ارناپ ويىن الاڭى - باتۋت قۇرىلۋدا.
ايتا كەتۋ كەرەك، ق ر باس ءمۇفتيى ەرجان قاجى مالعاجى ۇلىنىڭ تاپسىرماسىمەن قازاقستاننىڭ، سونىڭ ىشىندە الماتىنىڭ بارلىق مەشىتتەرىندە ۇلتتىق ويىنداردان سايىستار وتكىزۋگە، كەلۋشىلەرگە ارناپ كيىز ۇيلەر تىگۋگە پارمەن بەرىلگەن بولاتىن.
«حالقىمىزدىڭ سان عاسىردان بەرگى سانالى عۇمىرىندا رۋحاني تىرەك بولعان اسىل دىنىمىزدەگى ايتۋلى مەرەكە - قۇربان ايت مەيرامى ايرىقشا اتالىپ كەلەدى. ۇلتتار مەن ۇلىستاردى بىرلىك پەن يگىلىككە، مەيىرىم مەن كەشىرىمگە باستاعان مۇباراك مەيرام - قۇربان ايت قۇتتى بولسىن!
ايت - اعايىن اراسىن جاقىنداستىرا تۇسەتىن، ادامزات بالاسىن يماندىلىققا ۇيىتىپ، قاناعات پەن تاۋبەگە ۇندەيتىن ۇلىق مەرەكە. بۇل كۇندەرى بارشا مۇسىلمان ىزگى امالىمەن اللانىڭ رازىلىعىنا بولەنەدى. ايت كۇندەرى قاسيەتتى مەككەدە قاجىلىق پارىزىن وتەپ جاتقان مۇسىلمان ۇمبەتى جاراتۋشىعا جالبارىنا دۇعا جاساپ، قۇرباندىق شالادى.
قارجىلىق مۇمكىندىگى جوق ادامعا قۇربان شالۋ - مىندەت ەمەس. قۇرباندىق ەتى اعايىن- تۋىس، كورشى- قولاڭ، تۇرمىسى تومەن وتباسىلارىنا، جەتىم مەن جەسىرلەرگە، مۇگەدەكتەر مەن ناۋقاس جاندارعا تاراتىلادى. اللانىڭ رازىلىعى ءۇشىن قۇربان شالۋ - پەندەنىڭ يمانىن كۇشەيتىپ، تاقۋالىعىن ارتتىرادى. قاسيەتتى قۇراندا: «ۇمىتپاڭدار، ولاردىڭ ەتى دە، قانى دا ەشقاشان اللاعا جەتپەيدى. وعان جەتەتىن نارسە - جۇرەكتەرىڭىزگە ۇيالاعان تاقۋالىق، اللاعا دەگەن قۇرمەت» («حاج» سۇرەسى، 37-ايات)، - دەپ باياندالعان.
مۇباراك مەيرامنىڭ قۇرمەتى ءۇشىن بارشا جاماعاتتى، ازاماتتاردى مۇگەدەكتەر، جەتىمدەر مەن جەسىرلەر، اسىرەسە قاراۋسىز قالعان اتا- انالارعا قايىرىمدىلىق جاساۋعا شاقىرامىن.
اللا تاعالا دۇعا- تىلەكتەرىمىز بەن ىزگى امالدارىمىزدى جانە شالعان قۇرباندىقتارىمىزدى قابىل ەتكەي! وتباسىلارىڭىزعا اماندىق، مىقتى دەنساۋلىق، جۇمىستارىڭىزعا بەرەكە تىلەيمىن»، - دەگەن بولاتىن باس ءمۇفتي ءوز قۇتتىقتاۋىندا.
ايتا كەتۋ كەرەك، الماتىدا قۇربان شالۋعا ارنالعان 22 ورىن دايىندالدى.
