الماتى وبلىسىندا جاڭا ەمحانا اشىلدى
سالتاناتتى اشىلۋ راسىمىنە الماتى وبلىسىنىڭ اكىمى اماندىق باتالوۆ قاتىستى، دەپ حابارلايدى وبلىس اكىمىنىڭ باسپا ءسوز قىزمەتىنەن.
جاڭا نىساندى ارالاعان ءوڭىر باسشىسى دەنساۋلىق ساقتاۋ نىسانىنىڭ قولدانىسقا بەرىلۋىمەن جينالعانداردى قۇتتىقتاي كەلە، بۇل ەمحانادا ساپالى مەديتسينالىق كومەك كورسەتۋگە بارلىق جاعدايدىڭ جاسالعاندىعىن اتاپ ءوتتى.
«مەملەكەت باسشىسى نۇرسۇلتان ءابىش ۇلى نازاربايەۆ ايقىنداپ بەرگەن ۇلت جوسپارى «100 ناقتى قادام» باعدارلاماسىن ىسكە اسىرۋدا نەگىزگى باسىمدىلىق - ول تۇرعىندارعا العاشقى مەديتسينالىق - سانيتارلىق كومەك كورسەتۋدى جاقسارتۋ. بۇل جوسپار ەلىمىزدىڭ مەديتسينا سالاسىن ودان ءارى دامىتۋعا وڭ اسەر ەتپەكشى. «ۇلت دەنساۋلىعى - ءبىزدىڭ جارقىن بولاشاعىمىزدىڭ نەگىزى» دەپ اتاپ كورسەتكەن بولاتىن. ەلىمىزدە دەنساۋلىق ساقتاۋ سالاسىنىڭ دامۋىنا كوپ كوڭىل بولىنۋدە.
مەملەكەتتىك باعدارلامالار اياسىندا دەنساۋلىق ساقتاۋ ءىسىن رەفورمالاۋ، حالىققا مەديتسينالىق كومەك كورسەتۋدى جاقسارتۋ جونىندەگى ءىس- شارالار ءتيىمدى جۇزەگە اسىپ كەلەدى» ، - دەپ اتاپ ءوتتى ا. باتالوۆ.
ەمحانانىڭ قۇرىلىس جۇمىستارى 2014 -جىلدىڭ ءساۋىر ايىندا باستالعان بولاتىن. ونىڭ قۇرىلىسىنا رەسپۋبليكالىق بيۋدجەتتەن 1,5 ملرد. تەڭگەدەن استام قاراجات بولىنگەن. ەمحانا 3 قاباتتان تۇرادى. عيماراتتىڭ جالپى كولەمى 3,6 مىڭ شارشى مەتر. ەمحانا كۇنىنە 250 ادامدى قابىلداي الادى. وندا تەراپيا، حيرۋگيا، نيەۆرولوگيا، جۇقپالى اۋرۋلاردى وقشاۋلاۋ كابينەتتەرى، بالالاردى قابىلداۋ بولمەسىمەن ايەلدەرگە كەڭەس بەرۋ، زەرتحانا، رەنتگەندىك زەرتتەۋ جانە ۋلترادىبىستىق زەرتتەۋ بولمەلەرى بار. ەمحانانىڭ مەديتسينا قىزمەتكەرلەرىنىڭ ايتۋىنشا، تابىستى جۇمىس ىستەۋ ءۇشىن، بارلىق جاعدايلار قاراستىرىلعان.
بالپىق بي كەنتىنىڭ تۇرعىندارى جاڭا ەمحانانىڭ اشىلۋىنا بايلانىستى وزدەرىنىڭ ىستىق لەبىزدەرى مەن ريزاشىلىقتارىن بىلدىرۋدە.
بالپىق بي كەنتىندە اشىلعان ەمحاناعا جاس ماماندار جۇمىسقا تارتىلۋدا. سولاردىڭ ءبىرى فاريدا اللاحۆەردييەۆا: «مەن بيىل عانا وقۋدى ءبىتىرىپ، وسىنداي كەرەمەت ەمدەۋ مەكەمەسىنە جۇمىسقا ورنالاسۋدامىن. بۇل مەن ءۇشىن ۇلكەن قۋانىش جانە ماعان ارتىلعان جوعارى سەنىم. وسى سەنىمدى اقتاۋ ءۇشىن تۇرعىنداردى ەمدەۋ جولىندا بارلىق ءبىلىمىمدى قولدانامىن. ەمحاناداعى قوندىرعىلاردىڭ ءبارى جاڭا، سوڭعى ۇلگىدەگى. سول سەبەپتى جۇمىس ىستەۋگە وتە ىڭعايلى» ، - دەپ اتاپ ءوتتى.
جالپى بيىل الماتى وبلىسىندا دەنساۋلىق ساقتاۋ سالاسىنا 68,6 ملرد. تەڭگە بولىنگەن. وبلىس تۇرعىندارىنا 931 مەكەمە مەديتسينالىق كومەك كورسەتەدى. 2015 -جىلى وبلىس اۋماعىندا 24 دەنساۋلىق ساقتاۋ نىسانىنىڭ قۇرىلىسى جوسپارلانعان.
بۇگىنگى كۇنى 8 دەنساۋلىق ساقتاۋ نىسانىنىڭ قۇرىلىسى اياقتالدى. جەرگىلىكتى بيۋدجەت قاراجاتى ەسەبىنەن 17 دەنساۋلىق ساقتاۋ نىسانىنا 1,4 ملد. تەڭگەگە كۇردەلى جوندەۋ جۇمىستارىن جۇرگىزىلۋدە.
2015 -جىلى وبلىستىڭ مەديتسينا ۇيىمدارىن جابدىقتاۋ ماقساتىندا جەرگىلىكتى بيۋدجەت ەسەبىنەن 1067,4 ملن. تەڭگەگە 156 دانا مەديتسينالىق قۇرال- جابدىقتار جانە 148,5 ملن. تەڭگەگە 18 دانا سانيتارلىق اۆتوكولىكتەر الىندى.
