الماتىدا قۇربان ايت مەرەكەسى قارساڭىندا اۋىل شارۋاشىلىعى جارمەڭكەسى وتەدى

الماتى. قازاقپارات - الماتىدا قۇربان ايت مەرەكەسى قارساڭىندا، ۇستىمىزدەگى جىلدىڭ 23 -قىركۇيەگىندە جامبىل وبلىسى تاۋار وندىرۋشىلەرىنىڭ اۋىل شارۋاشىلىعى جارمەڭكەسى وتەدى. بۇل تۋرالى الماتى قالاسى اكىمىنىڭ باسپا ءسوز قىزمەتىنەن حابارلادى.

«قالا تۇرعىندارى مەن قوناقتارىنا باعاسى بازار نارقىنان 15-20 پايىزعا ارزان جانە ەكولوگيالىق جاعىنان تازا ازىق- تۇلىكتەر، كوكونىستەر مەن جەمىس- جيدەكتەر ۇسىنىلادى»، - دەلىنگەن حابارلامادا.

وسى ماقساتتا الماتىعا جامبىل وبلىسىنان جالپى سوماسى 115 ميلليون تەڭگەگە 260 توننانىڭ تاۋارلارى جەتكىزىلەدى. ولاردىڭ ىشىندە ەت ونىمدەرى - 38 توننا، ءسۇت ونىمدەرى - 12 توننا، كوكونىس- باقشا ونىمدەرى - 170 توننا جانە باسقا دا ونىمدەر - 40 توننانى قۇرايدى.

جارمەڭكە ادەتتەگىدەي 23- قىركۇيەك كۇنى تاڭعى ساعات 08:00 دە «استانا» الاڭىندا اشىلىپ، ساعات 15:00 گە دەيىن جالعاسادى.

وسىعان بايلانىستى تولە بي كوشەسىنىڭ ابىلاي حان داڭعىلى مەن پانفيلوۆ كوشەسى ارالىعىنداعى بولىگىندە كولىك قوزعالىسى ۋاقىتشا توقتاتىلادى.

اۆتور: جاپپاربەرگەن ايبوتا