مەككە قالاسىندا ق م د ب ءتوراعاسى، باس ءمۇفتيدىڭ اتىنان قازاقستاندىق قاجىلارعا اس بەرىلدى - فوتو

استانا. قازاقپارات - بۇگىن مەككە قالاسىندا جىلداعى ءداستۇر بويىنشا ق م د ب ءتوراعاسى، باس ءمۇفتي ەرجان قاجى مالعاجى ۇلىنىڭ اتىنان قازاقستاندىق قاجىلارعا اس بەرىلدى.

 بۇل تۋرالى مەككە قالاسىنان قازاقستاندىق «اسىل ارنا» تەلەارناسىنىڭ جۋرناليستەرى نۇربولات قۋانىشبەك ۇلى مەن ماقسات ەركىنبەك ۇلى حابارلادى.

ايتۋلى جيىنعا 20 كومپانيانىڭ وكىلدەرى، قاجىلىق ميسسياسىنىڭ قۇرامى جانە قاجىلىق پارىزىن وتەۋشىلەر كەلدى. ولاردىڭ اراسىندا 9 جىلدىق تاجىريبەسى بار «اڭسار كرۋيز» قاجىلىق كومپانياسىنىڭ باسشىلىق قۇرامى مەن قاجىلارى بار. جيىن بارىسىندا ق م د ب وكىلدەرى بايانداما جاساپ، يمامدار ۋاعىز ايتىپ، قوعام قايراتكەرلەرى قۇتتىقتاۋلارىن جولدادى. ايتىسكەر اقىن سەرىكزات دۇيسەنعازين قاجىلىق تۋرالى جىر شۋماقتارىن وقىپ، كورەرمەننىڭ قوشەمەتىنە بولەندى. ءدامدى استان تاتىپ، رۋحاني اڭگىمەلەردەن سۋسىنداعان وتانداستار مۇنداي باستاماعا ءدان ريزا.

 ەستەرىڭىزگە سالا كەتسەك، بيىل 4 مىڭنان استام وتانداسىمىز قاجىلىق پارىزىن وتەۋ ءۇشىن مەككەگە تابان تىرەدى. ولارعا بىلىكتى دارىگەرلەر، تەولوگ- عالىمدار، 100 گە تارتا يمامدار جانە جۋرناليستەردى بىرىكتىرگەن ق م د ب- نىڭ قاجىلىق ميسسياسى قىزمەت كورسەتۋدە. «اسىل ارنا» تەلەارناسى، «قازاقستان» ۇلتتىق ارناسى، «شالقار» راديوسى، «نۇر.kz» پورتالى جانە وزگە دە ب ا ق وكىلدەرى قاجىلاردىڭ تىنىس- تىرشىلىگىنەن ۇدايى حاباردار ەتىپ وتىرادى.