بۇكىل رەسەيلىك دودادا تۇمەندىك قازاق دزيۋدوشىلارى تاماشا ناتيجەلەرىمەن قۋانتتى
بۇل دودادا رەسەي فەدەراتسياسىنىڭ تەرگەۋ كوميتەتى ءتوراعاسىنىڭ سىيلىعى ءۇشىن كورشى ەلدىڭ وبلىستارى مەن رەسپۋبليكالارىنان كەلگەن سپورتشىلار تاتاميدە كۇش سىناستى. جارىسقا رەسەيدىڭ ءار وڭىرىنەن كەلگەن 14 كوماندا قاتىستى.
رەسەيدە دزيۋدو كۇرەسى قارقىندى دامىپ كەلە جاتقانى جاسىرىن ەمەس. اتالعان جارىستىڭ فينالدىق كەزدەسۋىن رەسەيدىڭ «بوەتس» تەلەارناسى كورسەتتى. كوماندالىق سايىستىڭ سوڭعى كەزدەسۋىنە تۇمەن وبلىسى مەن تاتارستان رەسپۋبليكاسىنىڭ پالۋاندارى شىعىپ، باس جۇلدەنى ساراپقا سالدى. قورىتىندىسىندا 5:4 ۇپايىمەن تۇمەندىك دزيۋدوشىلار جەڭىمپاز اتاندى.
وسى جارىستا قازاقستاندىق سپورت سۇيەر قاۋىم ءۇشىن دە جاعىمدى جاڭالىق بولدى. ايتا كەتۋ كەرەك، رەسەي دە كوپ ۇلتتى مەملەكەت. تۇمەن وبلىسىندا تۇراتىن قانداستارىمىز دا از ەمەس. فينالدىق كەزدەسۋدە 46 كەلى سالماقتا تاتاميگە شىعىپ، تاتارستاندىق قارسىلاسى رومان ۆينوكۋروۆتى تاماشا ادىسپەن جەڭىپ، كومانداسىنا العاشقى ۇپايدى سىيلاعان نۇرسۇلتان بەكسۇلتانوۆ بولدى. تورەشى ونىڭ ءادىسىن «يپپونعا» باعالادى. 50 كەلىدە كۇش سىناسقان ونىڭ اعاسى بەكسۇلتان قارسىلاسىنا ەسە جىبەردى. بەس جۇپ شىققاننان كەيىن، تاتارستاندىق كوماندا 3:2 ەسەبىمەن العا شىققان بولاتىن. الايدا، 73 كەلىدە اندرەيانوۆ دەنيستى ۇتقان ازات بالتابايەۆ ەسەپتى 3:3 ەتىپ تەڭەستىردى. مىنە، رەسەيدە تۇراتىن قانداستارىمىز دا تاماشا ناتيجەلەرىمەن قۋانتىپ وتىر.
ال اتالعان جارىستىڭ 81 كەلى سالماق بويىنشا فينالدىق كەزدەسۋىندە ەلدار اللاحبەرديەۆ پەن 90 كەلىدەن جوعارى سالماقتاعى ارتۋر كامالوۆ قارسىلاستارىنان باسىم ءتۇسىپ، تۇمەندىك كوماندانى جەڭىسكە جەتكىزدى.
ماسكەۋدىڭ نوگينسكي اۋدانى مەن سامارا وبلىسىنىڭ كوماندالارى قولا جۇلدەگە يە بولدى.
اۆتور: ايدىن بايمەن
