ي. تاسماعامبەتوۆ اقتاۋداعى قايعىلى وقيعا ورنىنا باردى - فوتو

استانا. قازاقپارات - بۇگىن ق ر قورعانىس ءمينيسترى يمانعالي تاسماعامبەتوۆ اقتاۋعا وقيعا ورنىنا ۇشىپ باردى.

الدىمەن مينيستر ءوزىنىڭ جانە قورعانىس مينيسترلىگىنىڭ اتىنان قازا بولعانداردىڭ جاقىندارى مەن تۋىسقاندارىنا كوڭىل ايتىپ، اسكەري قىزمەتشىلەردىڭ دەنەسىن جەتكىزۋگە اسكەري- كولىك اۆياتسياسىنىڭ ۇشاقتارىن ءبولۋ جانە ولاردىڭ وتباسىنا ماتەريالدىق كومەك كورسەتۋ جونىندە نۇسقاۋ بەردى.

ارنايى وتكىزىلگەن جيىندا قورعانىس مينيسترلىگى باس ينسپەكتسياسىنىڭ باستىعى گەنەرال- لەيتەنانت قۇربان قاراجانوۆ مينيسترگە ءتورت اسكەري قىزمەتشىنىڭ قازاسىنا اكەپ سوقتىرعان وقيعانى تەكسەرۋدىڭ الدىن- الا قورىتىندىسىن باياندادى. العاشقى تەكسەرۋ ناتيجەلەرى كورسەتكەندەي، اتالعان قايعىلى وقيعا دەسانتتى- ءتۇسىرۋ قۇرالدارى جوق كەزدە تەڭىز دەسانتىن ءتۇسىرۋ پراكتيكالىق ەپيزودىن ورىنداۋ بارىسىندا دۇرىس شەشىم قابىلداماۋ سالدارىنان ورىن العاندىعى انىقتالدى.

سونداي-اق، قورعانىس ءمينيسترى ارنايى كوميسسياعا قىزمەتتىك تەكسەرۋ جۇرگىزۋدى تاپسىرىپ، اسكەري قىزمەتشىلەردىڭ ءومىرى مەن قاۋىپسىزدىگىنە جاۋاپتى كىنالى لاۋازىمدى تۇلعالاردى انىقتاۋدى تاپسىردى.

 ەسكە سالا كەتەيىك، 18 -قىركۇيەكتە، اقتاۋدا «ورتالىق-2015» وقۋ- جاتتىعۋىنىڭ «ورتالىق ازيالىق ستراتەگيالىق باعىتتا اسكەر توبىمەن وپەراتسيا جۇرگىزۋ» 2- كەزەڭىنىڭ «تەڭىز دەسانتىن ءتۇسىرۋ جانە پلاسدارمدى بۇعاتتاۋ» ەپيزودى بارىسىندا تەڭىزگە 6 بىرلىك ب ت ر-80 مەن 52 اسكەري قىزمەتشى شىقتى. تەڭىز بەتىمەن 150 مەتردى ەڭسەرگەن كەزدە قاتتى جەل سالدارىنان تولقىن جوعارى كوتەرىلىپ، 4 بىرلىك ب ت ر-80 سۋعا باتىپ كەتتى. ەكى بىرلىك تەحنيكا ءوز كۇشىمەن جاعالاۋعا جەتتى. الدىن الا دەرەك بويىنشا، مەرزىمدى قىزمەتتىڭ 4 اسكەري قىزمەتشىسى سۋعا كەتكەن.