ۇلتتىق بانك ءتوراعاسى تەڭگە باعامى مەن بانكيرلەرگە قاتىستى ويىن ايتتى
بۇل تۋرالى بانكتىڭ ءتوراعاسى قايرات كەلىمبەتوۆ «پانوراما» باسىلىمىنا بەرگەن سۇحباتىندا مالىمدەدى. ونىڭ ايتۋىنشا، نارىقتى ەكى- ءۇش ءىرى ويىنشى «الداپ- ارباپ» وتىر. قازىر تەڭگە باعامى 275,75 كە جەتتى. ول تاڭعى سەسسياداعى باعامنان 5 تەڭگەگە جوعارى. مۇنداي باعام ۇلتتىق بانك ارالاسقاننان كەيىن ورناعان بولاتىن.
اقشا ايىرباستاۋ ورىندارى دوللاردى 300 تەڭگەمەن ساتا باستاعاندا ۇلتتىق بانك تەڭگە باعامىن تۇراقتاندىرۋعا شەشىم قابىلدادى. بانك وكىلدەرىنىڭ مالىمدەۋىنشە، شەتەلدىك ۆاليۋتاعا قاتىستى الىپساتارلىق كوبەيىپ بارادى.
«نارىقتى ارباپ وتىرعان ەكى- ءۇش ويىنشى بار. قازىر تالقىلاپ جاتىرمىز. تالقىلاۋ اياقتالعانشا ءبىز ءبىرىنشى رەت ينتەرۆەنتسيامەن شىقتىق. كەز كەلگەن ينتەرۆەنتسيا وسى ساتتەن باستاپ كۇندى قورىتىندىلاۋ بويىنشا رەسمي تۇردە جاريالاناتىن بولادى. ءبىز بۇگىن (سۇحبات 16 -قىركۇيەك كۇنى كەشكە جازىلعان - اۆت. ) ارالاسۋدى شەشتىك، سەبەبى ويىنشىلاردىڭ نارىقتى تارقاتىپ جاتقانىن كوردىك. ءبىز باسىنان باستاپ ايتقان بولاتىنبىز، باعامنىڭ ەركىن اۋىتقۋعا ءوتۋى ورتالىق بانك جوق دەگەندى بىلدىرمەيدى، ءبىز بارلىعىن مۇقيات باقىلاپ وتىرمىز. ءبىز ءورت ءسوندىرۋشى دە، قۇتقارۋشى دا بولعاندىقتان، مۇنداي قيسىنسىز ارەكەتتەر بولىپ جاتسا ارالاسۋعا قۇقىلىمىز جانە الداعى ۋاقىتتا دا سولاي ىستەيمىز. بالكىم، ءبىزدىڭ قاتىسۋىمىز ەرتەڭ دە كەرەك بولىپ قالار جانە نارىق تىنىشتالعانشا دا. وكىنىشكە قاراي، ترەيدەرلەردە(بيرجا ساۋداسىنا قاتىسۋشى؛ بيرجادا مامىلە جاساسۋعا قۇقىعى بار كەز كەلگەن زاڭدى نە جەكە تۇلعا؛ ساۋداگەر - رەد.) جانۋارلىق تۇيسىك بار جانە ولاردىڭ ەسىن ۇنەمى جيىپ وتىرۋ كەرەك. بىزدە الىپساتارلىق ويىنداردى قيراتاتىن مۇمكىندىك ءاردايىم بار، ءبىراق قازىر تاريح قالىپتاسىپ جاتىر جانە دۇرىس تۇسىنىككە قول جەتكىزۋ وتە ماڭىزدى»، - دەپ مالىمدەدى كەلىمبەتوۆ.
ونىڭ مالىمدەۋىنشە، قازاقستاندىق ۆاليۋتا نارىعى 38 بانكتىڭ ترەيدەرىنەن تۇرادى، ولار حالىق پەن كليەنتتەردىڭ مۇددەسىنە قىزمەت ەتەدى. كەلىمبەتوۆ تۋىنداعان پارادوكسقا (داعدىعا، ادەتكە قايشى كەلەتىن جاڭا پىكىر؛ بۇيرەكتەن سيراق شىعارۋ - رەد.) قاتىستى دا مالىمدەمە جاسادى: ونىڭ ويىنشا، تەڭگەنىڭ تومەن باعامى بانكتەر ءۇشىن دە ءتيىمسىز، دەگەنمەن ول كوتەرىلىپ جاتىر.
«ايتايىن، بەلگىلى ءبىر كۇيزەلىس- تەستتەرى بار، ولار بانكتەردىڭ باسىم بولىگى تەڭگەنىڭ قۇلدىراۋىنا قىزىعۋشىلىق تانىتپاي وتىر دەيدى، سەبەبى ولاردا پرۋدەنتسيالىق نورماتيۆتەرمەن پروبلەما بولادى، ناشار اكتيۆتەر دەڭگەيىنىڭ ءوسۋى، سونداي- اق ول قارىزدىڭ ۆاليۋتالىق بولىگى بويىنشا عانا ەمەس. كەيدە كەيبىرەۋلەر قاسانا ارەكەت ەتۋى مۇمكىن، ءبىراق ءبىز سونداي ارەكەتتەردى تۇزەۋ ءۇشىن دە ورتالىق بانكپىز. ءبىز ترەندپەن جانە تۇسىنىكپەن كۇرەسپەيمىز، ەگەر مۇنايدىڭ باعاسى 20 نەمەسە 30 دوللارعا دەيىن تۇسسە، تەڭگە وعان جاۋاپ قايتارۋى ءتيىس. ءبىراق الدىڭگۇنى، كەشە جانە بۇگىن ءبىز قاراما- قارسى تەندەنسيانى كوردىك - رۋبلدىڭ كۇشەيۋى، مۇناي باعاسى قۇلدىراۋىنىڭ توقتاعانى»، - دەدى كەلىمبەتوۆ.
ونىڭ ايتۋىنشا، تەڭگەنىڭ باعامى 188 دەن 257 گە كۇرت كوتەرىلدى. وسىدان كەيىن سالىق اپتاسى مەن نىعايۋ، سودان كەيىن بەلگىلى ءبىر تۇراقتانۋ بولدى. ۇلتتىق بانك باسشىسىنىڭ ويىنشا، سوڭعى كۇندەردە «الىپساتارلىق ويىندارى» بايقالدى.
ايتا كەتەيىك، تەڭگە باعامىن تۇراقتاندىرۋعا تارتىلعان ينتەرۆەنتسيالار قازىردىڭ وزىندە 414 ميلليون دوللاردان استى. ولار 16 جانە 17 -قىركۇيەكتە جۇرگىزىلدى.
Tengrinews.kz
