مەكتەپ وقۋشىلارى وزبەكستاننان كەلگەن قىلمىسكەرلەردى ۇستاۋعا كومەكتەستى

استانا. قازاقپارات - سارى اعاش اۋدانىنداعى ورتا مەكتەپتىڭ وقۋشىلارى شەكارا بۇزعان ەكى وزبەكستان ازاماتىن قولعا تۇسىرۋگە كومەكتەستى.

«تاياۋدا وڭتۇستىك قازاقستان وبلىسىنىڭ سارى اعاش اۋدانىندا ورنالاسقان سارى اعاش شەكارا زاستاۆاسىنىڭ كۇزەتىندەگى مەملەكەتتىك شەكارا اۋماعىندا (قازاقستان - وزبەكستان شەكاراسى)، شەكارادا ءجۇرىپ- تۇرۋ رەجىمىن بۇزعان ەكى وزبەكستان ازاماتى ۇستالدى.

 اتالمىش اۋدانداعى اقنيەت اۋىلىندا پايدا بولعان ەكى ادامنىڭ ءتۇر- تۇسىنەن، ءجۇرىس- تۇرىسىنان سەكەم العان وسى اۋىلدىڭ  ۇلىقبەك اتىنداعى ورتا مەكتەبىنىڭ 5 جانە 7 «ا» سىنىپتارىندا وقيتىن ەكى وقۋشى، نۇرداۋلەت پەن ەرنۇر سۋىت جۇرگەن بەيتانىس جانداردىڭ توقتاعان ۇيلەرىن ەستەرىنە ساقتاپ قالىپ، ءىز كەسە كەلگەن شەكاراشىلارعا حابارلاپ، ءجون سىلتەيدى. ءارى قاراي شەكاراشىلار وزدەرىنىڭ ۇيرەنشىكتى ءىسى بويىنشا، مەملەكەتتىك شەكارانى بۇزۋشىلاردى تۇتقيىلدان، تىرپ ەتكىزبەي قولعا ءتۇسىردى»، - دەپ حابارلايدى ق ر  ۇ ق ك  ش ق باسپا ءسوز قىزمەتى.

كەيىن بەلگىلى بولعانداي، ۇستالعانداردىڭ ءبىرى كورشى مەملەكەت اۋماعىندا جاساعان قىلمىستارى ءۇشىن وزبەكستان تاراپىنان كۇدىكتى رەتىندە تانىلىپ، 2014 - جىلدىڭ جەلتوقسانىنان بەرى حالىقارالىق ىزدەۋدە جۇرگەن ازامات بولىپ شىقتى. ءبىزدىڭ ەلىمىزدىڭ اۋماعىندا دا قىلمىستىق ىستەرىن مۇقيات جوسپارلاپ، ءوز قانداستارىن مەملەكەتتىك شەكارادان زاڭسىز وتكىزۋدىڭ «قالتارىس» جولدارىن قاراستىرىپ قويعاندىعى اشكەرەلەندى.

 وقۋشى بالالار دەر كەزىندە كومەكتەسپەگەندە وقيعا قالاي وربىگەن بولار ەدى، كىم ءبىلسىن. وسىنداي وتانشىل، ەلگەزەك ءارى العىر شاكىرتتەردى تاربيەلەگەن ۇستازدارى مەن سول وقۋشىلاردىڭ وزدەرىنە العىس سەزىمدەرىن ءبىلدىرۋ ءۇشىن سارىاعاش شەكارا وتريادىنىڭ باسشىلىعى ۇلىقبەك اتىنداعى ورتا مەكتەپكە ارنايى كەلدى. مەكتەپتىڭ وسى وقيعاعا وراي ۇيىمداستىرىلعان جالپى جيىنىندا ءسوز سويلەگەن اسكەري ءبولىم كومانديرى پودپولكوۆنيك ب. ابساماتوۆ مەكتەپ ديرەكتورى ا. ايتبايەۆاعا جانە 5-7 سىنىپتاردىڭ ۇستازدارىنا گراموتالار تابىستاپ، گۇل شوقتارىن ۇسىندى. سالتاناتتى شارانىڭ نەگىزگى «قاھارماندارى» نۇرداۋلەت حاسانوۆ پەن ەلنۇر ىلەس تە شەكاراشى اعالارىنىڭ العىستارىنا، سىي- سياپاتتارىنا بولەندى.