ۇلى دالادا كىل مىقتىلار كىم مىقتىنى انىقتاماق

استانا. قازاقپارات - ءتول سپورتىمىز «قازاقشا كۇرەس» سوڭعى بەس جىلدىڭ ىشىندە ەلىمىزدىڭ ءوز سپورتىمىزعا دەگەن كوزقاراسىن جاقسى جاققا قاراي بۇردى.

بۇرىن وزگەنىڭ سپورتىنا قىزىعاتىن حالقىمىز قازىردە وزىمىزدىكىن جوعارى قويا باستادى. وعان كۋا، جىل سايىن دۇبىرلەپ وتەتىن «قازاقستان بارىسى» رەسپۋبليكالىق تۋرنيرى. قازاق كۇرەسىنىڭ دامىتۋ قورى وسى جوبانى تولىقتاي قولعا الىپ، مۇنىمەن توقتالىپ قالمادى. ءتول ونەرىمىزبەن وزگەلەردىڭ دە اينالىسقانىن قالادىق. وسى ماقساتتا «ەۋرازيا بارىسى» جوباسى جۇزەگە اسىرىلدى.

ياعني، سارى قۇرلىق پەن كارى قۇرلىقتىڭ كىل مىقتىلارى ۇلى قازاق دالاسىندا بەلدەسىپ، ءوزارا كىم مىقتىنى انىقتايدى. بۇل ايتۋلى دودا وسىمەن ءۇشىنشى رەت جالاۋىن جەلبەرتپەكشى. قازاننىڭ 9- كۇنى تاراز جەرىندە وتەتىن الامان بايگە بۇكىل الەمنىڭ نازارىندا بولماق.

العاش رەت «ەۋرازيا بارىسى» 2013-جىلدىڭ جەلتوقسان ايىندا تاراز قالاسىندا وتكىزىلدى. ەۋروپا مەن ازيا حالىقتارىنىڭ اراسىنان قازاقشا كۇرەستەن حابارى بار سەگىز مەملەكەت تاڭداپ الىنىپ، سىنعا ءتۇستى. پولشا، موڭعوليا، يران، رەسەي، تاجىكستان، قىتاي جانە تۇركيا ەلىنىڭ بالۋاندارى كوماندالىق جاساق قۇرىپ، ەۋرازيا تورىنە ات باسىن بۇردى. قازاق كۇرەسى الەمگە ايگىلى ەمەس، ول انىق.

ءبىراق، كەيبىر ەلەمەنتتەرى سامبو، دزيۋدو سىندى كۇرەس تۇرلەرىمەن ۇقساستىق تاپقان. سول سەبەپتى، اتالعان ەلدىڭ بالۋاندارى بۇرىن وسى سپورت باعىتىمەن اينالىسقان بولاتىن. ارتىنشا، قازاق كۇرەسىنىڭ الىپبيىمەن تانىسىپ، وسى دوداعا شاقىرتىلدى. تەك قازاق جۇرتى ەمەس، سونداي-اق الەمنىڭ تەڭ جارتىسى تاماشالاعان بۇل سايىستا بەس سالماق بويىنشا بالۋاندار سىنعا ءتۇستى. «قازاقستان بارىسى» قازاق كۇرەسىن دامىتۋ قورى بۇل بايگەگە 79 مىڭ ا ق ش دوللارىن سىياقى رەتىندە بەلگىلەدى. بۇل سوماعا قول جەتكىزۋگە تىرىسقان بالۋاندار سايىستى قىزدىرا ءتۇستى. العاش رەت بايراعىن جەلبىرەتسە دە، تارتىسقا تولى بولعان «ەۋرازيا بارىسى» شەت ەلدىك ازاماتتاردىڭ دا قىزىعۋشىلىعىن وياتتى. سايىس بولعان سوڭ، جەڭىسكە جەتەتىن دە جالعىز بولادى. ناتيجەسىندە، فينالدىق كەزەڭگە قازاقستان مەن موڭعوليا بالۋاندارى جولداما الدى. شەشۋشى كەزدەسۋلەر جان بەرىسىپ ايقاسۋمەن ءوتتى. ەلدىڭ نامىسى سىنعا تۇسكەندە ەشبىر ازامات بەرىلە قويمايدى. ءبىرىنشى رەت ۇيىمداستىرىلعان تۋرنيردىڭ العاشقى جەڭىمپازدارى بولىپ ءوزىمىزدىڭ ارىستانداي ۇلدارامىز اتاندى. فينالدا كورشىلەرىن 4:1 ەسەبىمەن تىزە بۇكتىرىپ، ءتول سپورتتا مىقتى ەكەندىكتەرىن دالەلدەدى.

اتالعان جارىس وسىدان سوڭ الەمنىڭ بىرنەشە ەلدەرىنىڭ قىزىعۋشىلىعىن ارتتىردى. قازاق كۇرەسىنىڭ قايتالانباس تۇلعالارىنىڭ ءبىرى بالۋان شولاقتىڭ 150 جىلدىق مەرەيتويىنا ارنالعان II حالىقارالىق «ەۋرازيا بارىسى» تۋرنيرى باستاۋ الماستان بۇرىن، قاتىسۋعا نيەت ءبىلدىرىپ، باق سىناۋدى قالايتىن مەملەكەتتەر سانى ارتا ءتۇستى. بۇل جولى قاتىسۋشىلار سانى 12 گە ءوستى. 2014-جىلدىڭ قاراشا ايىندا تاعى دا تاراز توپىراعىندا ءوتتى. قازاقستان تۋرنيردىڭ باستى ءفاۆوريتى سانالدى. ەلىمىزدەن بولەك، رەسەي، قىتاي، تۇركيا، موڭعوليا، ءازىربايجان، گرۋزيا، ۋكراينا، پولشا، تاجىكستان، قىرعىزستان جانە وزبەكستان بالۋاندارى باسەكەنى قىزدىرا ءتۇستى.

العاشقىسىنا قاراعاندا، ەكىنشى ماۋسىمدا مىقتى كوماندانى انىقتاۋ وتە قيىنعا سوقتى. اقىرى، قازاق جانە موڭعول «بارىستارىنىڭ» جولى فينالدا قايتا ءتۇيىستى. وتكەن جىلى كەتكەن ەسەنى قايتارۋعا بەرىلگەن تاماشا مۇمكىندىكتى كورشىلەرىمىز ءتيىمدى پايدالانا الدى. الدە ءبىز السىزدىك تانىتتىق پا، نەمەسە ولار جەڭىلىستەن ساباق الدى ما، ايتەۋىر بىزدىكىلەر بۇل جولى جەڭىستى قارسىلاستارىنا بەرىپ قويدى. 2013-جىلعى ەسەپ قايتا تىركەلدى، ءبىراق موڭعول بالۋاندارىنىڭ پايداسىنا. سىياقى رەتىندە بەلگىلەنگەن 100 مىڭ ا ق ش دوللارى كورشىلەرىمىزدىڭ قورجىنىندا كەتتى.

قاتارىنان ەكى جىل ۇيىمداستىرىلعان «ەۋرازيا بارىسى» تۋرنيرىن تاماشالاعان كورەرمەندەردىڭ قاراسى وتە كوپ بولدى. رەكوردتىق كورسەتكىش ورناتتى دەپ ايتساق دا بولادى. وعان دالەل، 2013-جىلى بۇل تۋرنيردى تۇركيالىق «ТRT AVAZ» بەن رەسەيدىڭ «بوەتس» سپورتتىق جەكپە-جەك ارنالارى تىكەلەي ەفيردە تاراتىپ، كوپشىلىك قاۋىمنىڭ نازارىن اۋداردى. فينالدىق كەزەڭ مەن ماراپاتتاۋ راسىمدەرىن تولىق كورسەتكەندەرىن دە ەستەرىڭىزگە سالامىز. جەتى ساعات ۋاقىتقا سوزىلعان بۇل بايراقتى باسەكەنى الەمنىڭ 126 مەملەكەتى كوگىلدىر ەكراننان تاماشالادى. ال ەلىمىزدىڭ التى ميلليوننان استام ازاماتى تەلەديدارعا ءۇڭىلىپ، الامان دودانىڭ كەرەمەت اسەرىنە بولەندى.

مىنە، جاقىن كۇندەرى «ەۋرازيا بارىسىنىڭ» ءۇشىنشى ماۋسىمىنا دا كۋا بولماقپىز. قازاننىڭ 9- كۇنى كيەلى تاراز جەرىندە داستۇرگە اينالعان باسەكە الاۋىن قايتا تۇتاتپاق. بۇل جولى تۋرنير قازاق حاندىعىنىڭ 550-جىلدىعىنا ارنالماق.

ەگەر موڭعول بالۋاندارىمەن فينالدا تاعى دا جولىعىپ جاتساق، چەمپيوندىق اتاعىمىزدى قايتارىپ الۋعا تاماشا مۇمكىندىك بار. تەك جىگىتتەرىمىز نامىستى قولدان بەرمەۋگە تىرىسۋى قاجەت. سوندا عانا ابىرويىمىزدى ساقتاي الامىز. ءتول سپورتىمىزدان ءوزىمىز مىقتى بولماساق، وزگەنىڭ وزا شاپقانى ءبىز ءۇشىن ۇيات بولارى انىق. ءۇشىنشى ماۋسىمدا بالۋاندارىمىز جەڭىسكە جەتۋى قاجەت. تاقىمىمىزدى قىسىپ، اسىل ۇلدارىمىزعا قولداۋ تانىتايىق!

دايىنداعان: ەسبول قاراعۇل

سۋرەت «الامان سايتىنان» الىندى