ن. نازاربايەۆ ۋرال فەدەرالدىق ۋنيۆەرسيتەتىنىڭ قۇرمەتتى دوكتورى اتاندى
كەزدەسۋ بارىسىندا سۆەردلوۆ وبلىسىنىڭ گۋبەرناتورى ە. كۋيۆاشيەۆ ەكى ەلدىڭ اراسىنداعى تاتۋ كورشىلىك قارىم- قاتىناستاردى دامىتۋعا جانە شەكارالىق وڭىرلەر اراسىنداعى بايلانىستاردى نىعايتۋعا قوسقان زور ۇلەسى ءۇشىن قازاقستان پرەزيدەنتىنە العىس ايتتى.
ال ۋرال فەدەرالدىق ۋنيۆەرسيتەتىنىڭ رەكتورى ۆ. كوكشاروۆ نۇرسۇلتان نازاربايەۆقا مەملەكەتتىك قىزمەتتەگى ايرىقشا ەڭبەگىن باعالاۋدىڭ بەلگىسى رەتىندە قۇرمەتتى دوكتور ديپلومىن تاپسىردى. ول سونداي- اق مەملەكەت باسشىسىنا بىرلەسكەن ءبىرقاتار يننوۆاتسيالىق جوبالار بويىنشا قازاقستاننىڭ جوعارى وقۋ ورىندارىمەن ىنتىماقتاسىپ وتىرعانىن، بۇل جوبالار تانىستىرىلىمى استاناداعى «ەكسپو-2017» حالىقارالىق كورمەسىندە وتەتىنىن ايتتى.
اڭگىمە بارىسىندا نۇرسۇلتان نازاربايەۆ سۆەردلوۆ وبلىسى مەن ۋرال فەدەرالدىق ۋنيۆەرسيتەتى قازاقستان مەن رەسەي حالىقتارى اراسىنداعى تىعىز دوستىق قارىم- قاتىناستاردى نىعايتۋدا زور ءرول اتقارىپ وتىرعانىن اتاپ ءوتتى.
«ءسىزدىڭ ۋنيۆەرسيتەت يندۋستريالىق ايماقتاردىڭ كادرلىق الەۋەتىن قالىپتاستىرۋ جانە دامىتۋ ىسىنە رەسەيدە عانا ەمەس، ءبىزدىڭ ەلدە دە زور ۇلەس قوسىپ وتىر. مەنىڭ بىلۋىمشە، بۇگىندە قازاقستاننان 700 گە جۋىق ستۋدەنت ب. ەلتسين اتىنداعى ۋرال فەدەرالدىق ۋنيۆەرسيتەتىندە ءبىلىم الۋدا. قازاقستاننىڭ جەتەكشى جوعارى وقۋ ورىندارىمەن ۋنيۆەرسيتەتتىڭ ىنتىماقتاستىق تۋرالى كەلىسىمى بولعانى ماڭىزدى»، - دەدى مەملەكەت باسشىسى.
قازاقستان پرەزيدەنتى مۇمكىندىك تۋعان جاعدايدا ۋنيۆەرسيتەت ستۋدەنتتەرى مەن وقىتۋشى- پروفەسسورلار قۇرامى الدىندا ءدارىس وقۋعا دايىن ەكەنىن دە مالىمدەدى.
