قازاقستان مەن تاجىكستان ستراتەگيالىق ارىپتەستىك تۋرالى شارتقا قول قويدى
بۇل تۋرالى بۇگىن ق ر پرەزيدەنتى نۇرسۇلتان نازاربايەۆ تاجىكستان رەسپۋبليكاسىنىڭ باسشىسى ەمومالي راحمونمەن كەلىسسوزدەرىنىڭ قورىتىندىسى بويىنشا ب ا ق وكىلدەرىنە ارنالعان بىرلەسكەن مالىمدەمەدە حابارلادى.
«ەكونوميكالىق بايلانىستاردىڭ ۇلكەن ماڭىزى بار، دامۋ ۇستىندە، ءبىراق كەيبىر ساتتەردە كەڭ كولەمدە دامۋ قارقىنى مىقتى دەپ ايتا المايمىن. سوندىقتان، بۇگىن ءبىزدىڭ ەلدەر اراسىنداعى 80 شارتقا قوسىمشا رەتىندە قول قويىلعان ستراتەگيالىق ارىپتەستىك تۋرالى شارت - جاقسى بازا بولماق»، - دەدى ن. نازاربايەۆ.
مەملەكەت باسشىسى قازاقستان مەن تاجىكستان اراسىندا ەشقانداي داۋلى ماسەلەلەر جوق ەكەنىنە اتاپ ءوتتى.
«بىزدە قانداي دا ءبىر سالادا تۇسىنبەۋشىلىك جوق، كەرىسىنشە، ءوزارا تۇسىنىستىك قالىپتاسقان»، - دەدى ەلباسى.
اتاپ وتەيىك، قازاقستان مەن تاجىكستان اراسىنداعى ساۋدا اينالىمى 2014 -جىلدىڭ قاڭتار- جەلتوقسان ايلارىندا 700,4 ميلليون دوللاردى قۇرادى. ال 2015 -جىلدىڭ ءبىرىنشى جارتى جىلدىعىندا 299,2 ميلليون دوللار بولدى. بۇل وتكەن جىلعى سايكەس كەزەڭمەن سالىستىرعاندا 7,9 پايىزعا تومەن. 2014 -جىلدىڭ ءبىرىنشى جارتى جىلدىعىندا 325 ميلليون دوللارعا جەتكەن ەدى.
اتاپ، ايتقاندا، ەكسپورت 211,1 ميلليون دوللاردى قۇراپ، 2014 -جىلدىڭ سايكەس كەزەڭىنەن 13,5 پايىزعا تومەن (2014 -جىلى - 244,1 ميلليون دوللار) بولدى. ال، يمپورت 88,1 دوللاردى قۇراپ، 2014 -جىلدىڭ سايكەس كەزەڭىمەن سالىستىرعاندا 8,8 پايىزعا ارتىق بولدى (2014 -جىلى 80,9 ميلليون دوللار).
قازاقستان تاجىكستانمەن اراداعى سىرتقى ساۋدا كولەمى جاعىنان تۇراقتى تۇردە رەسەيدەن كەيىنگى ەكىنشى ورىن الادى.
قازاقستان ءۇشىن ىنتىماقتاستىقتىڭ باسىمدىقتى باعىتتارى - تاۋ- كەن ونەركاسىبى، ءتۇستى مەتاللۋرگيا، ماشينا قۇرىلىسى، ەنەرگەتيكا، تاماق ونەركاسىبى، كولىك جانە كوممۋنيكاتسيا، اۋىل شارۋاشىلىعى سالالارى.
