قازاقستان تاجىكستانمەن بايلانىستى ءۇزۋدى ەمەس، نىعايتۋدى قولدايدى - ن. نازاربايەۆ
بۇل تۋرالى بۇگىن تاجىكستان رەسپۋبليكاسىنىڭ باسشىسى ەمومالي راحمونمەن كەلىسسوزدەر ناتيجەسى بويىنشا ب ا ق وكىلدەرىنە ارنالعان بىرلەسكەن مالىمدەمەدە ق ر پرەزيدەنتى نۇرسۇلتان نازاربايەۆ ايتتى.
«ءبىز تاۋەلسىزدىكتىڭ العاشقى كۇندەرىنەن باستاپ سەنىم مەن دوستىقتىڭ ورتاق ساياساتىن جۇرگىزىپ كەلەمىز. تاجىكستان تاۋەلسىزدىكتىڭ العاشقى كۇندەرىنەن قيىن كەزەڭدەردى باستان كەشتى، ءبىز تاجىك حالقىمەن ءارقاشاندا بىرگە بولدىق»، - دەدى ەلباسى.
سونداي-اق، مەملەكەت باسشىسى قازاقستان ءارقاشان قيىن- قىستاۋ كەزەڭدەرگە قاراماستان تاجىكستانعا گۋمانيتارلىق جاعىنان، اسكەري- ساياسي سالادا، حالىقارالىق ارەنادا دا بارىنشا جاردەمدەسىپ، قولداعانىن اتاپ ءوتتى.
«ءبىز وسىندا، ورتالىق ازيادا بىرگە ءومىر ءسۇرۋدى ادەتكە اينالدىردىق، ءبىزدىڭ حالىقتارىمىز ءبىر- ءبىرىن جاقسى بىلەدى. ءبىز ساۋدا- ساتتىق جاسادىق، ءبىزدىڭ مادەنيەتىمىز ورتاق، وزدەرىڭىز دە جاقسى بىلەسىزدەر، قازاقستان بۇل بايلانىستاردى ءۇزۋدى ەمەس، ودان ءارى نىعايتۋدى قولدايدى»، - دەدى ن. نازاربايەۆ.
ەسكە سالا كەتسەك، بۇگىن ق ر پرەزيدەنتى رەسمي ساپارمەن تاجىكستانعا كەلدى.
