قازاقستاندى «ۇلى دالا ەلى» دەۋ حالىقتىق اتاۋ بولۋى كەرەك - ن. نازاربايەۆ
«ۇلى دالا» ۇعىمى - باياعىدان بار ۇعىم. دەشتى قىپشاق دەگەن ءسوز قىپشاقتىڭ دالاسى دەگەن ءسوز. ۇلى دالا ۇعىمىنا مىناۋ التايدان قارا تەڭىزگە دەيىنگى دالانى اتايتىن بولعان. ونىڭ نەگىزگى اۋماعى - ءبىزدىڭ قازاقتىڭ جەرى. ءبىزدىڭ دالامىزدا كەن دە بولعان، تەمىر دە بولعان، قولونەر دە بولعان، ءبارى بولعان»، - دەپ اتاپ ءوتتى مەملەكەت باسشىسى.
وسى ورايدا ق ر پرەزيدەنتى مۇنداي ۇعىمنىڭ كوپتەگەن ەلدەردە بار ەكەندىگىن اتاپ ءوتىپ، جاپوندار كۇنشىعىس ەلىمىز، قىتايلىقتار اسپان استى ەلىمىز، كارىستەر تاڭعى شىق ەلىمىز دەپ سانايتىندىعىن مىسالعا كەلتىردى.
«بىزدە دە سونداي ۇعىممەن تەڭەستىرەتىن بولساق، بىزگە «ۇلى دالا ەلىمىز» دەپ ايتقان كەلەدى. «ۇلى دالا» مەن «كوك اسپان» دەپ تە ايتۋعا بولار ەدى. كەڭ دالا - ءبىزدىڭ جەرىمىز. وسى جەردە ءبىز تۇرىپ جاتىرمىز، ءوسىپ جاتىرمىز، وركەندەپ جاتىرمىز، ۇرپاق اسىراپ جاتىرمىز. وسى جەردە مەملەكەتىمىزدى قۇرىپ، ونى شاڭىراعىن بيىك قىلىپ، كوك تۋدىڭ استىنا جينالىپ جاتىرمىز. ءبىزدىڭ بايراعىمىزدىڭ وزىندە كوك اسپان، جارقىرعان كۇن بەينەلەنگەن»، - دەدى ن. نازاربايەۆ.
ەلباسى قازاقستان اتاۋى بۇگىنگى كۇنى بارشا الەم حالقىنا تانىلعان اتاۋ بولىپ وتىرعاندىعىن باسا اتاپ ءوتتى. «ءبىراق ءبىز حالىقتىڭ ىشىندە ۇلى دالانىڭ ۇرپاعىمىز دەسەك، كەلىپ تۇرعان سياقتى. ول حالىقتىق اتاۋ بولۋى كەرەك»، - دەدى ەلباسى.
اۆتور: مارلان جيەمباي
