ەلباسى ساۋد ارابياسىنىڭ كورولىنە مەككەدەگى «ءال- حارام» مەشىتىندە بولعان قايعىلى وقيعاعا بايلانىستى كوڭىل ايتتى

استانا. قازاقپارات - مەملەكەت باسشىسى ساۋد ارابياسىنىڭ كورولى سالمان بەن ابدەل ءازيز ءال ساۋدقا مەككە قالاسىنىڭ «ءال- حارام» مەشىتىندە بولعان قايعىلى وقيعاعا بايلانىستى كوڭىل ايتۋ جەدەلحاتىن جولدادى، دەپ حابارلادى اقوردانىڭ باسپا ءسوز قىزمەتى.

جەدەلحاتتا مەملەكەت باسشىسى كوپتەگەن ادام قازا تاۋىپ، جاراقات العان قايعىلى وقيعا تۋرالى حاباردى زور كۇيزەلىسپەن قابىلداعانى ايتىلعان.

 نۇرسۇلتان نازاربايەۆ جەكە ءوزىنىڭ جانە قازاقستان حالقىنىڭ اتىنان جاقىندارىنان ايرىلعان وتباسىلارعا كوڭىل ايتتى، سونداي- اق زارداپ شەككەندەردىڭ تەزىرەك ساۋىعىپ كەتۋىنە تىلەكتەستىك ءبىلدىردى.

ەستەرىڭىزگە سالا كەتەيىك،  مەككەدەگى ءال- حارام مەشىتىندە قۇرىلىس كرانى قۇلاپ 107 ادام قازا تاپتى، قۇرباندار سانى ارتا تۇسۋدە.

ەل ازاماتتىق قورعانىس باسقارماسى تۆيتتەردە حابارلاعانىنداي، 230 دان استام ادام زارداپ شەككەن. وقيعا ورنىندا قۇتقارۋشىلار جۇمىس جاساۋدا.

الەۋمەتتىك جەلىلەردە جاريالانعان فوتوسۋرەتتەردە مەشىتتىڭ توبەسىن تەسىپ وتكەن قىزىل- اق ءتۇستى كراننىڭ ءبىر بولىگى كورىنەدى.

كران مەشىتتىڭ شىعىس بولىگىنە قاتتى جەل مەن جاڭبىردىڭ سالدارىنان قۇلاعان.

 قازىر مەككەدە مۇسىلمانداردىڭ جىل سايىنعى قاجىلىق ساپارىنا دايارلىق ءجۇرىپ جاتىر.