ايدىن ايىمبەتوۆ جەرگە قونعاننان كەيىن ءوزىن جاقسى سەزىنۋدە - تالعات مۇسابايەۆ
اتاپ ايتقاندا، بۇگىن تاڭەرتەڭ گەننادي پادالكا (رەسەي عارىش)، قازاقستاندىق عارىشكەر ايدىن ايىمبەتوۆ، سونداي- اق دانيانىڭ العاشقى استروناۆتى اندرەاس موگەنسەن قازاقستاندا ەسەپتەلگەن اۋدان ماڭىنا امان- ەسەن قوندى.
«بۇگىن عارىشتان تاعى ءبىر قازاق جىگىتى ورالدى. ءبىز ايدىندى شىن جۇرەكتەن قۇتتىقتايمىز. ونىڭ الداعى جۇمىستارىنا جەمىس تىلەيمىن. وسى بۇگىنگى ماڭىزدى وقيعامەن بارشا وتانداستارىمدى قۇتتىقتايمىن»، - دەدى ت. مۇسابايەۆ.
ونىڭ سوزىنە قاراعاندا، عارىشكەرلەر ەكيپاجى قازاقستان جەرىنە امان- ەسەن قوندى. «بۇگىن ءبىز ونى جەزقازعان جازىعىندا كۇتىپ الدىق. ۇشۋ ساپارى ءساتتى ءوتتى دەپ تولىق ايتا الامىز. قازعارىش باسشىسى رەتىندە بۇگىن ۇزاق ۋاقىتتان بەرى جوسپارلاعان جۇمىسىمىزدى اياعىنا دەيىن جەتكىزگەنىمە ماقتان تۇتامىن. اتاپ ايتقاندا، ۇلكەن عىلىمي ماڭىزدى باعدارلاما جۇزەگە اسىرىلدى. وسى شارانىڭ بارلىعى حالقىمىز قازاق حاندىعىنىڭ 550 جىلدىعى مەرەيتويىن اتاپ ءوتۋ كەزىندە ىسكە اسىرىلدى»، - دەدى قازعارىش باسشىسى.
سونىمەن قاتار ول ايدىن ايىمبەتوۆ قازاقستان تۋىن ەلباسىعا تاپسىراتىندىعىن اتاپ ءوتتى. ەستەرىڭىزگە سالا كەتەيىك، ا. ايىمبەتوۆ عارىشقا قازاق حاندىعىنىڭ 550 جىلدىعىنا، قازاقستان حالقى اسسامبلەياسىنىڭ 20 جىلدىعىنا ارنالعان تۋلار مەن ەلىمىزدىڭ كوك بايراعىن الىپ ۇشقان بولاتىن.
اۆتور: رۋسلان عابباسوۆ
