قازاق حاندىعى ءبىزدىڭ تەرەڭ تاريحىمىزدىڭ ءبىر ءداۋىرى عانا - م. جولداسبەكوۆ

استانا. قازاقپارات - ءۇيسىن مەملەكەتى، قاڭلى مەملەكەتتەرىنىڭ تاريحىن ايتپاعاندا، قازاق ۇلتىنىڭ كەمىندە ءۇش مىڭ جىلدىق تاريحى بار.

 ال 550 جىلدىعى تويلانىپ جاتقان قازاق حاندىعى - ءبىزدىڭ بايتاق، تەرەڭ تاريحىمىزدىڭ ءبىر عانا ءداۋىرى. بۇگىن قازاق حاندىعىنىڭ 550 جىلدىعىنا ارنالعان سالتاناتتى شارا باراسىندا قازاقپارات تىلشىسىنە پىكىرىن بىلدىرگەن مەملەكەت جانە قوعام قايراتكەرى، عالىم، فيلولوگيا عىلىمىنىڭ دوكتورى، پروفەسسور ، اكادەميك مىرزاتاي جولداسبەكوۆ وسىنداي ويىن ايتتى.

 «جالپى، ءبىز نەبىر سۇمدىقتاردى، نەبىر سوعىستاردى، نەبىر قيىندىقتاردى باسىمىزدان كەشكەن ەلمىز عوي. ءبىزدى وتكەنى جوق، تاريحى جوق، جۇرتى جوق، كوشىپ- قونىپ جۇرگەن قاڭباق سياقتى ەل قىلىپ كورسەتتى. ول، ارينە، سولاقاي ساياسات ەدى. رەسەيگە بودان بولعان ءۇش عاسىردىڭ ىشىندە ءبىزدىڭ تاريحىمىز تابانعا تاپتالدى. ەل بيلەگەن حاندارىمىزدى، بيلەرىمىزدى، دانالارىمىزدى، جىراۋلارىمىزدى، باي مەن بولىستارىمىزدى «اقىماق» قىلىپ كورسەتتى. وسىنداي قورلىقتى كورگەن حالىق دۇنيەجۇزىندە ەكەۋ بولسا، بىرەۋى قازاق، جالعىز بولسا، ول دا قازاق دەر ەدىم. ايتپەسە، ءبىز ونداي ەل ەمەسپىز عوي»، - دەگەن قايراتكەر مەملەكەت باسشىسى نۇرسۇلتان نازاربايەۆتىڭ  ۇلىتاۋ وڭىرىندەگى سۇحباتىن ەسكە الدى.

«وتكەن جىلى اۋليەبۇلاقتىڭ باسىندا، ۇلىتاۋدىڭ ەتەگىندە وتىرىپ، ەلباسىمىز قازاققا ارناعان سۇحباتىندا كوپ دۇنيە ايتىلدى. ەلباسى «قازاق تاريحى ەشكىمنەن ۇيالاتىن تاريح ەمەس، ءبىزدىڭ ۇلى دالادا بابالارىمىز نەشە ءتۇرلى ىلگەرى مەملەكەتتەر ورناتقان. ول - ساق مەملەكەتى، عۇن مەملەكەتى، ودان كەيىن تۇرىك قاعاناتىنا جالعاسادى، تۇرىك قاعاناتى التىن ورداعا، التىن وردا قازاق حاندىعىنا، قازاق حاندىعى بۇگىنگى تاۋەلسىز قازاقستانعا جالعاسادى» دەدى. مىنە، بۇدان ارتىق ەشتەڭە ايتۋدىڭ قاجەتى جوق. ءۇيسىن مەملەكەتى، قاڭلى مەملەكەتىن ايتپاعان كۇننىڭ وزىندە، ءبىزدىڭ كەمىندە ءۇش مىڭ جىلدىڭ تاريحىمىز بار. ال 550 جىلدىعى تويلانىپ جاتقان قازاق حاندىعى - ءبىزدىڭ بايتاق، تەرەڭ تاريحىمىزدىڭ ءبىر عانا ءداۋىرى»، - دەدى ءسوزىن تۇيىندەگەن م. جولداسبەكوۆ.

اۆتور: كەنجەكەي توقتامۇرات قىزى