ن. نازاربايەۆ كەڭەس زامانىنىڭ سۇرقاي ساياساتىنىڭ اشى شىندىعىن ايتتى
مەملەكەت باسشىسى ءوز سوزىندە ەلىمىزدە حاننىڭ نە باتىردىڭ ەسكەرتكىشى تۇرماق، ولاردىڭ اتىندا ءبىلىم، مادەنيەت نىساندارى، كەرەك دەسەڭىز جالعىز- جارىم كوشە دە بولماعانىن، قازاق حاندارىنىڭ اتى اتالعان جاعدايدا ولارعا ۇستەم تاپ وكىلدەرى رەتىندە كەلەڭسىز باعا بەرىلىپ، قيسىنسىز ايىپ تاعىلعانىن باسا ايتتى.
«بۇل تۋرا اقىن عافۋ قايىربەكوۆ كەزىندە: «باسقانىڭ پاتشاسىنىڭ ءبارى جاقسى، نەلىكتەن ءبىزدىڭ حاندار جامان بولعان»، دەپ اشىنا سويلەگەنىن بىلەمىز. بۇل ۇلت جادىنىڭ تامىرىنا بالتا شابۋعا ارنالعان. وسىنداي سۇرقاي ساياساتتىڭ نەبارى شيرەك عاسىر بۇرىن ورىن العانىنا سەنۋدىڭ ءوزى قيىن. ءبىراق، كەڭەس زامانىنىڭ اشى شىندىعى وسىلاي بولاتىن. تاۋەلسىزدىك قازاق حالقىنىڭ وتكەنىن جاندىرىپ، وشكەنىن ءتىرىلتتى»، - دەدى ەلباسى.
ق ر پرەزيدەنتى ءوز سوزىندە الماتى مەن استانادا، وبلىس ورتالىقتارى مەن ءىرى ەلدى مەكەندەردە كەرەي مەن جانىبەك، ابىلاي، ءابىلقايىر سياقتى ايگىلى حاندارىمىزدىڭ، قابانباي، بوگەنباي، ناۋرىزباي باتىرلاردىڭ ەڭسەلى ەسكەرتكىشتەرى بوي كوتەرىپ، ولاردىڭ ەسىمدەرى ەلدى مەكەندەرگە، جوعارى وقۋ ورىندارىنا، مەكتەپتەرگە بەرىلە باستاعانىن ايتتى.
«بابالاردىڭ ەرلىك پەن كۇرەسكە تولى ونەگەلى ءومىر جولدارى جايلى توم- توم عىلىمي ەڭبەكتەر مەن ادەبي شىعارمالار جازىلدى. تاۋەلسىزدىكپەن بىرگە ۇرپاعىنا ۇلان عايىر قونىس قالدىرعان باتىر بابالارىمىزدىڭ بيىك رۋحى، قازاقتاردىڭ، اسىرەسە، جاڭا بۋىننىڭ اراسىندا اسا زور پاتريوتتىق ورلەۋ تۋعىزىپ، ۇلت تاريحىنا دەگەن ماقتانىش سەزىمىن وياتتى»، - دەدى ن. نازاربايەۆ.
اۆتور: مارلان جيەمباي
