شىعىس قازاقستاندا ايۋ ەر كىسىنى ازاپتاپ ءولتىرىپ، ەتىن دە جەپ كەتكەن
تۇرعىندار مايماق اياقتىڭ اشۋلانۋىنا - قونجىعىن ادامدار ءولتىردى دەگەن كۇدىگى سەبەپ دەيدى. شىن مانىندە اڭنىڭ بالاسىن جۋىردا جۇك كولىگى قاعىپ كەتكەن ەكەن. ەندى «ايۋ كەگىن بىزدەن دە العالى ءجۇر» دەپ كوپشىلىكتىڭ ۇرەيى ۇشىپ وتىر.
شىعىس قازاقستانداعى مەدۆەدكا اۋىلى - باعزىدان ايۋلى مەكەن. وسىندا تۇراتىن 65 جاستاعى ازامات تاڭەرتەڭمەن توعايدان سىپىرعى جيناپ كەلۋگە كەتكەن. سودان ورالمادى. وتباسى ونى تۇستە كەلەدى دەپ كۇتكەن ەكەن. قاس قارايىپ كەتكەن سوڭ تۋىستارى دابىل قاعا باستاعان.
ۆيتاليي بەلوكوپىتوۆ، مارقۇمنىڭ ۇلى:
- ۋچاسكەلىك ينسپەكتور تۇنگى 11-دە كەلدى. ارىز جازعان سوڭ كەلەسى كۇنى «وزدەرىڭ ىزدەي بەرىڭدەر، ارتتارىڭنان ءبىز دە بارامىز» دەدى دە، جوق بولدى. جاقىندارىمىزبەن جابىلىپ ىزدەگەنىمىزبەن، تابا المادىق. پوليتسيا دەر كەزىندە ارەكەت ەتكەندە اكەمىز امان قالار ما ەدى.. .
تۇرعىندار توعايدى اينالىپ ىزدەگەنىمەن، ونىڭ ىشىنە ەنە الماپتى. اقىرعان ايۋعا بەتتەۋگە قورىققان. قارۋ قولدانۋعا زاڭ تىيىم سالادى. ال پوليتسيا بولسا، تەك ءۇشىنشى كۇنى عانا توبە كورسەتىپتى. اۋىلدىڭ ماڭىن تۇگەل ءتىنتىپ، جوعالعان ەركەكتى بەسىنشى كۇن دەگەندە ارەڭ تاپقان: وندا دا تەك بولشەكتەلگەن دەنەسىن عانا.. .
اندرەي يۋرتايكين، اڭشى:
- اياقتارى ايىرىلىپ كەتكەن، باسى جوق، قارنى جارىلىپ جاتتى. ايۋ جەي باستاعان ەكەن. ەتتەرى يىستەنىپ كەتكەن ەكەن. ءبىز مۇردەنى سول ءيىس ارقىلى تاپتىق. ايۋ سول كەزدە دەنەنى اينالشىقتاپ ءجۇردى. ونى اسپانعا وق اتىپ ۇركىتۋىمە تۋرا كەلدى.
ادام ەتىمەن اۋىزدانعان كىرەكەي قازىر اۋىلدى تورۋىلداپ ءجۇر. كۇنى كەشە تۇرعىن ۇيلەردىڭ ءدال ىرگەسىنەن اپانى تابىلىپتى. جىرتقىشتىڭ يسىنەن جىلقىلار ۇركىپ، شىلبىرىن ءۇزىپ كەتسە، بايلاۋلى يتتەر دە شىنجىرىن شايناپ ءجۇر. ال وبلىستىق تابيعي رەسۋرستار جانە تابيعاتتى پايدالانۋدى رەتتەۋ باسقارماسىنداعىلار ادام جەگىش ايۋدى اۋلاۋعا اسىعار ەمەس. بۇل ۋاقىتتا مەدۆەدكانىڭ كوشەلەرى كۇندىزدىڭ وزىندە قاڭىراپ بوس تۇر.
