قازاقستاندىقتاردىڭ ءومىر ءسۇرۋ ۇزاقتىعى ارتتى
بۇل تۋرالى ورتالىق كوممۋنيكاتسيالار قىزمەتىندە ۆەدومستۆو باسشىسىنىڭ ورىنباسارى الەكسەي سوي مالىمدەدى. ونىڭ ايتۋىنشا، قازاقستاندىق دارىگەرلەر دە ءبىرقاتار كۇردەلى وپەراتسيالار جاساپ، ناۋقاس جانداردىڭ دەرتىنە داۋا تابۋدا. سوندىقتان شەتەلدەگى ەمگە جۇمسالاتىن قىرۋار قارجى قىسقارتىلعان. جالپى، ەلدىڭ مەديتسينا سالاسىنا بولىنەتىن قارجى بىلتىر 870 ميلليارد تەڭگەگە جەتتى. 900 دەي اۋرۋحانا جانە 3 مىڭنان استام ەمحانا جۇمىس ىستەۋدە. سالادا 229 مىڭ مامان بار. سولاردىڭ 70 مىڭى دارىگەرلەر. كوڭىل قۋانتارلىق تاعى ءبىر دەرەك، قازاقستاندىقتاردىڭ ورتاشا ءومىر ءسۇرۋ ۇزاقتىعى 1995 -جىلدان بەرى 8 جاسقا دەيىن ارتقان. الەكسەي سوي، ق ر دەنساۋلىق ساقتاۋ جانە الەۋمەتتىك دامۋ ءمينيسترىنىڭ ورىنباسارى:
- قازاقستاننىڭ مەديتسيناسى دامىعان. سوڭعى كەزدە دونور تاۋىپ، ادام اعزالارىن ترانسپلانتاتسيالاۋ مۇمكىندىگى مولايدى. قاجەتتى قۇرالدار، مەديتسينالىق وزىق تەحنولوگيالار كوبەيدى. دەگەنمەن ۇكىمەت تاپسىرماسىنا سايكەس، كۆوتا بويىنشا جىلىنا 50-70 ادامدى شەتەل اۋرۋحانالارىنا جىبەرمەكپىز. بۇل ءتىزىم شەكتەۋلى. ازاماتتاردىڭ كوبى ءبىزدىڭ مەديتسينانىڭ ارقاسىندا تولىق ەمدەلە الادى.
ايتا كەتەيىك، الماتىدا دۇنيەجۇزىلىك دەنساۋلىق ساقتاۋ ۇيىمىنىڭ وكىلدىگى اشىلماق. جوبا جۇزەگە اسسا، جىل سايىن وعان 2 ميلليون دوللار بولىنەتىن بولادى. بۇل باستامانى ءماجىلىس دەپۋتاتتارى دا قۋاتتادى. وكىلدىك قىزمەتى العاشقى مەديتسينالىق كومەك بەرۋگە باعىتتالادى. بۇگىندە رەسەي جانە تۇركيا ەلدەرىندە دە وسىنداي مەديتسينالىق مەكەمە اشۋ تۋرالى ۇسىنىس جاسالعان.
مەليتا ۆۋينوۆيچ، دۇنيەجۇزىلىك دەنساۋلىق ساقتاۋ ۇيىمىنىڭ وكىلى:
- وسىنداي وكىلدىكتىڭ ءاربىرى 2 ميلليون دوللارعا يە بولادى. ولاردىڭ بارلىعى اۋقىمدى جۇمىس ىستەيتىن بولادى. رەسەي ءۇشىن بۇل جوبا 4 ميلليون ، ال تۇركيا ءۇشىن 3,5 ميلليونعا جەتەدى.
www.24.kz
