بەيجىڭدەگى پارادقا قاتىسقان اسكەريلەر ماراپاتتالدى - فوتو
بۇل تۋرالى قورعانىس ۆەدوموستۆوسىنىڭ باسپا ءسوز قىزمەتىنەن حابارلادى.
«سىزدەرگە ق ر ق ك جوعارعى باس قولباسشىسىنىڭ اتىنان العىس بىلدىرگىم كەلەدى. جۇكتەلگەن مىندەتتەردى ابىرويمەن اتقاردىڭىزدار، ءبىز سىزدەردى ماقتان تۇتامىز. بارشا قازاقستان حالقى وسى پارادتى تاماشالادى جانە ەلىمىزدىڭ قارۋلى كۇشتەرىن ماقتان ەتتى. وسىناۋ پارادقا قاتىسۋدىڭ ماڭىزى ەرەكشە. ويتكەنى، قىتاي تاياۋ كورشىمىز رەتىندە ەكى ەل اراسىندا مىعىم دوستىق قارىم- قاتىناس ورناعان. پارادقا قاتىسۋ ارقىلى سىزدەر ۇلكەن تاجىريبە جيناقتادىڭىزدار» ، - دەدى ق ر قورعانىس ءمينيسترى يمانعالي تاسماعامبەتوۆ.
قازاقستاندىق اسكەرلەردىڭ اتىنان وسىناۋ اۋقىمدى پارادقا ق ر قورعانىس مينيسترلىگىنىڭ قۇرمەت قاراۋىلى روتاسى قاتىستى. اناعۇرلىم ەرەكشە كوزگە تۇسكەن سەگىز اسكەري قىزمەتشى ق ر قورعانىس ءمينيسترىنىڭ قولىنان «حالىقارالىق ىنتىماقتاستىقتى دامىتۋعا قوسقان ۇلەس ءۇشىن» مەدالىن الدى. «ءبىز بەيجىڭدە وتەتىن شەرۋگە ءبىر ايعا جۋىق استانادا جانە 10 كۇندەي قىتايدا دايىندالدىق. مۇنداي اۋقىمدى ءىس- شارادا بۇكىل الەم الدىندا ەلىمىزدى، قارۋلى كۇشتەرىمىزدى كورسەتۋ ءبىز ءۇشىن ۇلكەن ماقتانىش. بىزگە اسكەرىمىزدى، ساپتىق داعدىمىزدى جوعارى دەڭگەيدە كورسەتۋىمىز قاجەت ەدى. جوعارعى باس قولباسشى، ەلىمىزدىڭ قورعانىس ءمينيسترى، الەمدىك دەرجاۆالاردىڭ كوشباسشىلارى الدىندا ءبىز لايىقتى دەڭگەيدە ادىمداپ وتتىك دەپ ويلايمىن» ، - دەدى ق ر ق م قۇرمەت قاراۋىلى روتاسىنىڭ كومانديرى ماقسات بايجىگىتوۆ.
پارادقا 17 ەلدىڭ اسكەري قىزمەتشىلەرى قاتىستى. قازاقستاننىڭ قارۋلى كۇشتەرىنەن 76 اسكەري قىزمەتشى قاتىستى. «مەن الدىمەن تۋ ۇستاۋشى توپتىڭ قۇرامىندا سول جاقتاعى اسسيستەنت بولىپ كەلە جاتتىم. بەيجىڭدەگى اپتاپ ىستىق جاتتىعۋ جاساۋعا بەلگىلى ءبىر قيىندىقتار تۋعىزدى. استانادا جاتتىعۋ جۇرگىزۋ الدەقايدا ىڭعايلى بولدى. الايدا، بۇعان قاراماستان، جوعارعى باس قولباسشىمىزدىڭ بەرگەن جوعارى باعاسى جانە قورعانىس ءمينيسترىنىڭ قۇرمەت قاراۋىلى روتاسىن ماراپاتتاۋى ءبىزدىڭ ءتيىستى دەڭگەيدە ادىمداپ وتكەنىمىزدى جانە بۇكىل الەمگە اسكەرىمىزدى پاش ەتكەنىمىزدىڭ ايعاعى بولىپ تابىلادى. قازىر ءبىز ءوزىمىزدىڭ تىكەلەي قىزمەتتىك مىندەتتەرىمىزگە، ياعني، وتانىمىزدى قورعاپ، ساپتىق ماشىعىمىزدى ارتتىرۋعا كىرىسۋدەمىز» ، - دەدى بەيجىڭدەگى پارادقا قاتىسقان ق ر ق م ق ق ر ۆزۆود كومانديرى اعا لەيتەنانت يالكۋنجان چۋگاروۆ.
قۇرمەت قاراۋىلى روتاسىنا ەلىمىزدىڭ قارۋلى كۇشتەرىن كورسەتۋگە ماشىقتانعان 22 مەن 28 جاس ارالىعىنداعى قازاقستاندىق ارميانىڭ ۇلگىلى اسكەري قىزمەتشىلەرى ىرىكتەلىپ الىنعانىن ەستەرىڭىزگە سالا كەتەيىك.
