ن. نازاربايەۆ شىعىس قازاقستان وبلىسىنىڭ اكىمىنە ءبىرقاتار تاپسىرمالار بەردى

 استانا. قازاقپارات - ەلباسى نۇرسۇلتان نازاربايەۆ شىعىس قازاقستان وبلىسىنىڭ اكىمى دانيال احمەتوۆپەن كەزدەستى.

بۇل تۋرالى اقوردانىڭ باسپا ءسوز قىزمەتىنەن حابارلادى.

كەزدەسۋدە د. احمەتوۆ مەملەكەت باسشىسىنا الەۋمەتتىك- ەكونوميكالىق جاعداي، مەملەكەتتىك باعدارلامالاردى ىسكە اسىرۋ، وڭىردە اگرارلىق سەكتوردى دامىتۋ جايىندا بايانداپ بەردى.

قازاقستان پرەزيدەنتى الەمدىك ەكونوميكاداعى قيىندىقتار ءبىزدىڭ ەلدەگى جاعدايعا دا ىقپال ەتىپ جاتقانىن اتاپ ءوتتى. ن. نازاربايەۆ جاڭا جاعدايدا ەلدىڭ ءىرى ونەركاسىپتىك ورتالىعى شىعىس قازاقستان وبلىسى بۇل كەزەڭدى وڭتايلى ەڭسەرگەنى ماڭىزدى ەكەنىنە توقتالدى.

ش ق و اكىمى ونەركاسىپتىك سالانىڭ جاعدايى تۋرالى ايتتى.

«تەك ءبىر ونەركاسىپتىك ءونىم كولەمىن قوسپاعاندا، وتكەن كەزەڭدە بارلىق الەۋمەتتىك- ەكونوميكالىق كورسەتكىش جوعارى. بۇل، اسىرەسە، ۆاليۋتالىق نارىقتارداعى جاعدايعا بايلانىستى. الايدا بۇگىندە جاعداي تۇزەلىپ كەلەدى. مىسالى، «قازمىرىش» كاسىپورنىندا ءبىرىنشى جارتىجىلدىقتا ءونىمدى وتكىزۋدە ارتتا قالۋشىلىق 10 ميلليارد تەڭگەنى قۇرادى، بۇگىندە ول 3 ميلليارد تەڭگەگە قىسقارتىلدى»، - دەدى د. احمەتوۆ.

بۇدان باسقا، د. احمەتوۆ «ازيا اۆتو» اۆتوموبيل قۇراستىرۋ زاۋىتىنداعى جاعدايدى باياندادى.

«رۋبلمەن باعام ايىرىمى سالدارىنان زاۋىت ساتىلىمدا 55 ميللياردتى جوعالتتى، بۇل شامامەن 12 مىڭ ماشينا. قازىر بۇل ماسەلە شەشىلۋدە. ۆاليۋتالىق پاريتەتتى قالپىنا كەلتىرۋدىڭ ارقاسىندا كولىكتەردى ساتۋ جاعىنان ءوسىم بار»، - دەپ اتاپ ءوتتى شقو اكىمى.

كەزدەسۋ قورىتىندىسى بويىنشا ن. نازاربايەۆ ءبىرقاتار تاپسىرمالار بەردى.