ۇزاقباي قارابالين: وسى ايدا قازاقستانعا قاجەتتى بەنزين كولەمى جەتكىزىلەدى
بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ق ر ەنەرگەتيكا ءبىرىنشى ۆيسە- ءمينيسترى ۇزاقباي قارابالين وسىلاي مالىمدەدى.
«ۇكىمەتتىڭ بەنزيننىڭ باعاسىنا قاتىستى جاساعان سوڭعى شەشىمىنىڭ ارقاسىندا ەلىمىزگە بەنزيننىڭ جەتكىزىلىمى جاقساردى. ونى ءبىز ءبىرىنشى كۇننەن بايقاپ وتىرمىز. قىركۇيەكتىڭ باسىنان بەرى 22 مىڭ توننا بەنزين قازاقستانعان جەتكىزىلگەن. 11 مىڭ تونناداي بۇگىندە جولدا كەلە جاتىر. سونىمەن قاتار 80 مىڭ توننانى الۋ ءۇشىن ءتيىستى شارتتارعا قول قويىلدى. ەندى قىركۇيەك ايىنىڭ ىشىندە ونىڭ كولەمى 110 مىڭ تونناعا دەيىن جەتەدى دەپ ەسەپتەپ وتىرمىز»، - دەدى ۇ. قارابالين.
وسى ورايدا ول بۇل شارالاردىڭ ناتيجەسىندە اعىمداعى ايدا قاجەتتى بەنزين كولەمى تولىق قامتاماسىز ەتىلەتىندىگىن اتاپ ءوتتى.
ەستەرىڭىزگە سالا كەتەيىك، قىركۇيەكتىڭ تورتىندە ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ق ر پرەمەر- ءمينيسترىنىڭ ءبىرىنشى ورىنباسارى باقىتجان ساعىنتايەۆ ۇكىمەت ا ي-92/93 بەنزينى باعاسىن مەملەكەتتىك رەتتەۋدەن باس تارتقاندىعىن حابارلاعان بولاتىن. ب. ساعىنتايەۆتىڭ ايتۋىنشا، ۇكىمەت بەنزين تاپشىلىعىن بولدىرماس ءۇشىن ا ي-92/93 بەنزينى باعاسىنا مەملەكەتتىك رەتتەۋدەن باس تارتىپ وتىر. قازاقستان بۇرىندارى رەسەيدەن جەتپەيتىن بەنزيندى 97 تەڭگەدەن العان ەدى، ياعني 1 رۋبل - 2,95 تەڭگە باعامى بويىنشا. بۇگىندە تەڭگەنىڭ ەركىن باعامى اياسىندا بەنزين 120 تەڭگەدەن ساتىپ الىنىپ، 108 تەڭگەدەن ساتىلۋدا. «سايكەسىنشە، شىعىنمەن ەشكىم دە جۇمىس ىستەگىسى كەلمەيدى. ەگەر وسىلاي جالعاسسا، جاقىن ارادا، قىركۇيەكتىڭ اياعىنا قاراي بەنزين تاپشىلىعى تۋىندايدى»، - دەدى ول.
ونىڭ سوزىنە قاراعاندا، ەلىمىزدەگى ءوندىرىس پەن تۇتىنۋ بالانسىندا ا ي-92/93 بەنزينىن ءۇش مۇناي زاۋىتىندا ءوندىرۋ كولەمى 2,1 ميلليون توننا، ال تۇتىنۋ دەڭگەيى 3,2 ميلليون توننانى قۇراپ وتىر. ياعني، 1,1 ميلليون توننا كولەمىندە جەتىسپەۋشىلىك بار. بۇل قاجەتتىلىكتىڭ نەگىزگى كولەمى رەسەيدەن جەتكىزىلۋدە.
اۆتور: رۋسلان عابباسوۆ
