استانادا «ۇلى بابالار جولى» اتتى كورمە اشىلدى - فوتو
«2015 - جىل قازاقستان رەسپۋبليكاسىندا تاريحي وقيعالارعا تولى بولدى. سوندىقتان، تاۋەلسىزدىك سارايى، استانا قالالىق سۋرەتشىلەر وداعى مەن حالىق سۋرەتشىسى اۋباكىر ىسمايلوۆتىڭ وتباسى بىرلەسە وتىرىپ، «ۇلى بابالار جولى» دەگەن كورمەنى ۇيىمداستىرىپ وتىرمىز.
كورمەگە استانا قالاسىنداعى سۋرەتشىلەر وداعىنا مۇشە شەبەرلەردىڭ، سونداي- اق قازاقستاننىڭ حالىق سۋرەتشىسى جانە قازاقستان سۋرەتشىلەر وداعىنىڭ نەگىزىن قالاعان، تۇڭعىش ءتوراعاسى بولعان اۋباكىر ىسمايلوۆتىڭ سۋرەتتەرى قويىلدى. جالپى، كورمەگە 34 سۋرەتشىنىڭ 125تەن استام جۇمىسى قويىلعان»، - دەيدى تاۋەلسىزدىك سارايى ديرەكتورىنىڭ ورىنباسارى، تاريح عىلىمدارىنىڭ كانديداتى ءبيبىنۇر ساناقۇلوۆا.
كورمەگە قويىلعان قۇندى تۋىندىلاردىڭ ءبىرازى اۋباكىر ىسمايلوۆ پەن كامىل مۋللاشيەۆتىڭ قولىنان شىققان سۋرەتتەر.
ايتا كەتەيىك، اۋباكىر ىسمايىلوۆ - ەلىمىزدىڭ العاشقى كاسىبي سۋرەتشىلەرىنىڭ ءبىرى، ونەر قايراتكەرى بولسا، كامىل مۋللاشيەۆ قازاقستان رەسپۋبليكاسىنا ەڭبەگى سىڭگەن مادەنيەت قايراتكەرى، تاتارستان رەسپۋبليكاسىنىڭ حالىق سۋرەتشىسى.
