ينسۋلت دەرتى بۇكىل الەم بويىنشا جاسارىپ كەلەدى - س. كامەنوۆا
بۇل تۋرالى الماتىدا «قازاقستاندا نيەۆرولوگيا بويىنشا بىلىمدەردى جاڭعىرتۋ» تاقىرىبى بويىنشا ءوتىپ جاتقان حالىقارالىق ءبىلىم بەرۋ عىلىمي فورۋمى بارىسىندا س. اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتىنىڭ پروفەسسورى، قازاقستان نيەۆرولوگتارىنىڭ «Neurosciences» ۇلتتىق قاۋىمداستىعىنىڭ پرەزيدەنتى سالتانات كامەنوۆا ءمالىم ەتتى.
ونىڭ ايتۋىنشا، قازاقستاندا جۇيكە اۋرۋلارىنىڭ الدىن الۋ ءۇشىن وتاندىق دەنساۋلىق ساقتاۋ سالاسىنا حالىقارالىق ستاندارتتاردى ەنگىزۋ قاجەت.
«قازىرگى تاڭدا قازاقستاننىڭ ءار وڭىرىندە جىل سايىن شامامەن 1000 ادامنىڭ ىشىندە 3-4 ادام ينسۋلتقا شالدىعادى. ياعني بۇل، ەلىمىز بويىنشا جىل سايىن 49 مىڭ ادام ينسۋلت دەرتىنە شالدىعادى دەگەن ءسوز. ولاردىڭ تەڭ جارتىسى العاشقى جىلى كوز جۇمادى. ال قالعان جارتىسى مۇگەدەك بولىپ قالادى. ويتكەنى، ويلاۋ، سويلەۋ، قوزعالۋ سەكىلدى قىزمەتتەرگە جاۋاپ بەرەتىن ميداعى نەيرونداردىڭ زاقىمدالۋى كەم دەگەندە مۇگەدەكتىككە اكەپ سوعادى»، - دەدى ءوز سوزىندە س. كامەنوۆا.
ونىڭ ايتۋىنشا، ەلىمىزدە ينسۋلت دەرتىنىڭ الدىن الۋ ءۇشىن دياگنوز قويۋ مەن ەمدەلۋگە دەگەن قول جەتىمدىلىكتى بارىنشا ارتتىرا تۇسكەن ابزال.
«قازىر ەلىمىزدە «سالاماتتى قازاقستان» مەملەكەتتىك باعدارلاماسى ويداعىداي جۇزەگە اسىرىلىپ جاتىر. ونىڭ اياسىندا بۇگىندە ەلىمىزدە 48 ينسۋلت ورتالىعى اشىلىپ، جەمىستى جۇمىس ىستەۋدە. ءبىراق شاشىراڭقى سكلەروز، پاركينسون دەرتى، دەمەنسيا سەكىلدى باسقا دا اۋرۋلار بويىنشا ءالى دە شەشەتىن ماسەلەلەر كوپ. الدىمەن ولار بويىنشا ءوز الدىنا بولەك زاڭناما قابىلاۋ قاجەت. جالپى، جۇيكە اۋرۋلارى مەديتسينالىق- الەۋمەتتىك سيپاتقا يە. ياعني، ارتىق سالماق، ماسكۇنەمدىك، تەمەكىگە قۇمارلىق سەكىلدى زياندى ادەتتەر وسىنداي اۋرۋلارعا اكەپ سوعادى. سوندىقتان، سالاماتتى ءومىر سالتىن ۇستانىپ، دارىگەرگە دەر كەزىندە قارالىپ تۇرعان ءجون»، - دەدى س. كامەنوۆا.
بۇگىنگى حالقارالىق عىلىمي فورۋمعا قازاقستاننىڭ ءار وڭىرىنەن جانە الىس جانە جاقىن شەت ەلدەردەن 500 گە جۋىق دەلەگات قاتىسۋدا. ولاردىڭ ىشىندە پروفەسسورلار، نيەۆرولوگ دارىگەرلەر، تەراپيەۆتەر، رەانيماتولوگتار، جالپى پراكتيكالىق دارىگەرلەر جانە باسقا دا مەديتسينالىق ماماندار بار. فورۋم بارىسىندا عىلىمي باياندامالار وقىلىپ، دياگنوستيكا جانە ەمدەۋ بويىنشا تالقىلاۋلار جۇرگىزىلەدى جانە شەبەرلىك سىنىپتارى ۇيىمداستىرىلادى.
اۆتور: جاپپاربەرگەن ايبوتا
