قىمىز بەن قازى جۇمىس ىستەۋ قابىلەتىمىزدى ارتتىرىپ، شارشاعانىمىزدى باساتىنىنا سەنىمدىمىن - ايدىن ايىمبەتوۆ
عارىش ەكسپەديتسياسىنا ارناپ قازاق تاعامتانۋ اكادەمياسىنىڭ عالىمدارى ازىقتىق جانە بيولوگيالىق قۇندىلىعى، ءارى مەديتسينالىق- بيولوگيالىق قاسيەتتەرى جوعارى بيە ءسۇتى مەن جىلقى مايىنىڭ نەگىزىندە قازاقتىڭ ۇلتتىق ءمازىرىنىڭ ارنايى دايىندالعان ونىمدەرىن ازىرلەگەن بولاتىن.
«داستارقان» دەپ اتالاتىن بۇل ۇلتتىق تاعام كەشەنىن ا. ايىمبەتوۆ وزىمەن بىرگە حالىقارالىق عارىش ستانساسىنا الىپ باردى.
«ءبىرىنشى تاعام - قاتىرىلعان تۇردەگى قازاقتىڭ «ەت تاعامى». سالماقسىزدىق جاعدايىندا تاماقتانۋ ۇيرەنشىكتى ءىس ەمەس. ەت ءدامدى، ءبىراق قۇرعاق. سورپا جەتىسپەيدى»، - دەپ جازدى ول Twitter الەۋمەتتىك جەلىسىندەگى ءوز پاراقشاسىنا.
«عارىش ستانساسىندا ەكيپاج مۇشەلەرى قازاقستاندىق ءونىمدى سىناقتان وتكىزەدى. بۇل تاعامداردىڭ جۇمىس ىستەۋ قابىلەتىمىزدى ارتتىرىپ، شارشاعانىمىزدى باساتىنىنا سەنىمدىمىن»، - دەيدى قازاق عارىشكەرى. قازاقستاندىق ونىمدەردىڭ حالىقارالىق عارىش ستانساسىندا عارىشكەرلەر پايدالاناتىن تاعامداردىڭ قاتارىنا ەنۋى ابدەن مۇمكىن. قازاقتىڭ ۇلتتىق تاعامىنىڭ ءدامىن تاتقان رەسەيلىك عارىشكەر سەرگەي ۆولكوۆ تا ءوز پىكىرىمەن ءبولىستى. «بارلىعى وتە ءدامدى بولدى، پاكەتتەلگەن قىمىزدى كورىپ، ەرەكشە تاڭ قالدىق. حالىقارالىق عارىش ستانساسىنىڭ بورتىندا تاعام تۇرلەرى كوپ ەمەس، سوندىقتان دا ايدىن ايىمبەتوۆتىڭ الىپ كەلگەن «داستارقان» قازاقستاندىق تاعام كەشەنى ەكيپاجدىڭ كۇندەلىكتى اسىنا ۇيلەسىمدى قوسىمشا بولىپ وتىر»، - دەيدى عارىشكەر.
