نۇرسۇلتان نازاربايەۆ: بارلىق قيىندىقتار مەن جەڭىستەردى باسىمىزدان بىرگە وتكەرەتىن بولامىز- فوتو

استانا. كوكشەتاۋ. استانا - اۋىل شارۋاشىلىعىنىڭ قۇرىلىمىن وزگەرتۋ قاجەت، ونىڭ وزەگى كۇشتى كووپەراتيۆتەر بولۋى ءتيىس.

 بۇل تۋرالى اقمولا، قوستاناي جانە سولتۇستىك قازاقستان وبلىستارىنىڭ اكىمدەرىمەن كەڭەس وتكىزگەن مەملەكەت باسشىسى نۇرسۇلتان نازاربايەۆ ءمالىم ەتتى.

اقوردانىڭ باسپا ءسوز قىزمەتىنىڭ حابارلاۋىنشا، زەرەندى اۋدانىندا وتكەن كەڭەس بارىسىندا اۋىل شارۋاشىلىعى ءمينيسترى ا. مامىتبەكوۆ، اقمولا وبلىسىنىڭ اكىمى س. كۋلاگين، قوستاناي وبلىسىنىڭ اكىمى ن. ءسادۋاقاسوۆ جانە سولتۇستىك قازاقستان وبلىسىنىڭ اكىمى ە. سۇلتانوۆ اۋىل شارۋاشىلىعىنىڭ دامۋىنا جانە جيىن- تەرىن ناۋقانىن وتكىزۋ دايىندىعىنا قاتىستى ەسەپ بەردى. ءوڭىر باسشىلارى سونداي- اق مەملەكەت باسشىسىنا وبلىستاردىڭ الەۋمەتتىك- ەكونوميكالىق دامۋىنىڭ نەگىزگى قورىتىندىلارى مەن الداعى كەزەڭدەگى مىندەتتەر تۋرالى باياندادى.

مەملەكەت باسشىسى ءۇش وبلىستىڭ جيىن- تەرىن ناۋقانىن وتكىزۋگە دايىندىعىنا توقتالا كەلىپ، ونىڭ قارقىنىن كۇشەيتۋ قاجەتتىگىن ايتتى.

بۇگىندە مەملەكەت اۋىل شارۋاشىلىعىن دامىتۋعا زور كوڭىل ءبولىپ وتىر. دەگەنمەن، اگرارلىق سەكتور ءالى ەكونوميكانى ءارتاراپتاندىرۋدىڭ تىرەگىنە اينالا قويعان جوق. بۇل ەڭبەك ونىمدىلىگىن دامىتۋ سالاسىنداعى ۇلكەن رەزەرۆكە، اۋىل شارۋاشىلىعى ونىمدەرى ءوندىرىسىن كەڭەيتۋگە، سالاعا سىرتقى ينۆەستيتسيالاردى تارتۋعا قاتىستى، - دەدى قازاقستان پرەزيدەنتى.

نۇرسۇلتان نازاربايەۆ بۇل رەتتە اۋىل شارۋاشىلىعىن سۋبسيديالاۋ ماسەلەلەرىنە مۇقيات نازار اۋدارۋ قاجەتتىگىن اتاپ ايتتى.

بەس جىلدا ءۇش وبلىس سۋبسيديا تۇرىندە 135 ميلليارد تەڭگە جانە ليزينگپەن 3,5 مىڭ تەحنيكا، «سىباعا» باعدارلاماسى بويىنشا 51 مىڭ باس اسىل تۇقىمى ءمۇيىزدى ءىرى قارا الدى، - دەدى مەملەكەت باسشىسى.

مەملەكەت باسشىسى اۋىل شارۋاشىلىعى ونىمدەرىنە سۇرانىستى وتەۋگە ەلىمىزدىڭ زور مۇمكىندىكتەرى بار ەكەنىن اتاپ ءوتتى.

كورشى ەلدەردىڭ قازاقستان ونىمدەرىنە سۇرانىسىنىڭ الەۋەتى 210 ميلليارد تەڭگە بولادى، ءبىز مۇنداي مولشەردى قامتاماسىز ەتە الامىز، - دەدى قازاقستان پرەزيدەنتى.

نۇرسۇلتان نازاربايەۆ بۇگىنگى تاڭدا الەمدە قارجى تۋربۋلەنتتىلىگى ساقتالىپ وتىرعانىنا، ول ەلدىڭ ەكونوميكالىق كورسەتكىشتەرىنە ىقپال ەتەتىنىنە نازار اۋداردى. ءبىراق داعدارىستىق قۇبىلىستارعا قازاقستاننىڭ دايىندىعى بار، قىتاي جانە رەسەي سياقتى جەتەكشى ەكونوميكالىق سەرىكتەستەرمەن ىنتىماقتاستىق كەڭەيۋدە. بۇل ىقپالداستىق «جاڭا جىبەك جولى» اياسىنداعى ءبىرقاتار يندۋستريالىق جوبالاردى جۇزەگە اسىرۋدى، وڭتۇستىك جانە سولتۇستىك- باتىس باعىتتا سىرتقى نارىقتارعا شىعاتىن كولىك ينفراقۇرىلىمىن دامىتۋ ءىسىن قامتيدى.

سونىمەن قاتار مەملەكەت باسشىسى ەلىمىزدە جۇزەگە اسىرىلىپ جاتقان، اگرارلىق سەكتوردى دا قامتيتىن ينستيتۋتسيونالدىق رەفورمالاردىڭ ماڭىزدىلىعىنا ايرىقشا توقتالدى. بۇل ورايدا قازاقستان پرەزيدەنتى ەلدە اۋىل شارۋاشىلىعى كووپەراتيۆتەرىن الەمدىك تاجىريبەنى قولدانا وتىرىپ دامىتۋدىڭ، سونداي- اق ۇلتتىق زاڭناماعا وزگەرىستەر ەنگىزۋدىڭ ماڭىزدىلىعىنا نازار اۋداردى.

باستى ماقسات - اۋىل شارۋاشىلىعىنىڭ تيىمدىلىگىن جوعارىلاتۋ جانە ونى وڭدەۋشى سەكتورمەن ەكسپورتقا شىعارۋ. ول ءۇشىن اۋىل شارۋاشىلىعىنىڭ قۇرىلىمىن وزگەرتۋ قاجەت، ونىڭ وزەگى كۇشتى كووپەراتيۆتەر بولۋى ءتيىس. بۇل بيزنەس ءۇشىن كەڭ مۇمكىندىك اشادى، - دەدى مەملەكەت باسشىسى.

قازاقستان پرەزيدەنتى زووۆەتەريناريا، اۋىل شارۋاشىلىعى ونىمدەرىن تاسىمالداۋ جانە ساقتاۋ سياقتى قوسالقى سەرۆيستىك قىزمەتتەردى دامىتۋدىڭ ماڭىزدىلىعىنا توقتالدى.

نۇرسۇلتان نازاربايەۆ وتاندىق اۋىل شارۋاشىلىعى ەلدىڭ ەكونوميكالىق ءوسىمىنىڭ قوزعاۋشى كۇشىنە اينالاتىنىنا سەنىم ءبىلدىردى. وسى ماقساتپەن سالاعا شيكىزاتتى وڭدەۋمەن اينالىساتىن ينۆەستورلاردىڭ كەلۋىنە جاعداي جاساۋ قاجەت.

اۋىل شارۋاشىلىعى ءونىمىن قايتا وڭدەۋ، قوسىمشا قۇنىن ارتتىرۋ ارقىلى ونىڭ باعاسىن وسىرگەن ءجون، - دەدى مەملەكەت باسشىسى.

سونىمەن قاتار، قازاقستان پرەزيدەنتى اۋىل شارۋاشىلىعىنا يننوۆاتسيالاردى ەنگىزۋ، عىلىمدى اۋىل شارۋاشىلىعى وندىرىستەرىنە كادر دايارلاۋ ىسىمەن بىرلەستىرۋ قاجەتتىگىنە توقتالدى.

مەملەكەت باسشىسى اۋىل شارۋاشىلىعى جەرلەرىن پايدالانۋ تيىمدىلىگىن ارتتىرۋدىڭ ماڭىزدىلىعىن اتاپ كورسەتتى. بۇل رەتتە قازاقستان پرەزيدەنتى اۋىلداعى ەڭبەككە ىجداعاتتى كوزقاراستىڭ، ءتيىمدى مەنشىك يەسىن قالىپتاستىرۋدىڭ، سونداي- اق جەرگە قاتىستى مامىلەلەر ۇدەرىستەرىن جەڭىلدەتۋدىڭ ءمانى زور ەكەنىن ايتتى.

جەرگە ونى كۇتىپ- باپتايتىن ناعىز يە قاجەت، - دەدى قازاقستان پرەزيدەنتى.

جالپى، نۇرسۇلتان نازاربايەۆ ەلدىڭ اۋىل شارۋاشىلىعى سالاسىندا 20  جىلدىڭ ىشىندە بولعان وڭ وزگەرىستەردى اتاپ ءوتتى.

قازاقستاننىڭ اۋىل شارۋاشىلىعى كاسىپورىندارىنىڭ وڭ تاجىريبەلەرى تۋرالى كوبىرەك بىلە ءتۇسىپ، جاقسىلارىنان ۇلگى الىپ، ءارى قاراي دامۋ قاجەت، - دەدى مەملەكەت باسشىسى.

قازاقستان پرەزيدەنتى قيىندىقتاردىڭ ۋاقىتشا ەكەنىنە، ولاردى ەڭسەرىپ، دامۋ جولىمەن ىلگەرىلەۋگە ەلدەگى جۇزەگە اسىرىلىپ جاتقان باعدارلامالاردىڭ سەپتىگىن تيگىزەتىنىنە سەنىم ءبىلدىردى.

بارلىق قيىندىقتار مەن جەڭىستەردى باسىمىزدان بىرگە وتكەرەتىن بولامىز، - دەدى نۇرسۇلتان نازاربايەۆ.

وبلىستاردىڭ اگرارلىق كاسىپورىندارىنىڭ وكىلدەرى اۋىل شارۋاشىلىعى ماسەلەلەرىنە دەگەن ۇدايى قامقورلىعى ءۇشىن مەملەكەت باسشىسىنا العىس ءبىلدىرىپ، سالانى دامىتۋ جونىندەگى شارالار ۋاقتىلى قابىلدانىپ كەلە جاتقانىن اتاپ ءوتتى.