ايەلىن باسكە تىككەن جىگىتتىڭ ويىنى وسىلدى
ويىننىڭ سوڭىنا تۇسكەن جىگىت مۇناي كومپانياسىندا ىستەگەن، جىل سايىن ەڭبەك دەمالىسىن ا ق ش- تىڭ لاس- ۆەگاس قالاسىندا وتكىزەتىن كورىنەدى. اقىلعا سىيمايتىن قادامعا ول وتكەن جىلى قاپشاعايداعى كازينولاردىڭ بىرىندە بارعان.
ۇيىنە كىرىس اكەلۋدى قويعان جىگىت «كولىگىمدى سوعىپ الدىم، اقشانى سونىڭ جوندەۋىنە بەردىم» دەپ ۇزاق ۋاقىت ايەلىن الداپ كەلىپتى. ارتىنشا كولىگى ءىزىم- عايىم جوعالعان. كوپ ۇزاماي جۇمىسىنان دا ايىرىلادى، ءبىراق قۇمار ويىننان باس تارتا الماعان. جارى مەن تۋىستارى ونىڭ قارىزعا بەلشەسىنەن باتقانىن كەشقۇرىم ۇيگە باسا- كوكتەپ كىرگەن ءبىر توپ ەڭگەزەردەي جىگىتتەردەن بىلگەن. كازينوعا تىگەرگە تۇگى قالماعان ويىنقۇمار ۇتىستىڭ سوڭىنا دەيىن بارىپ، ءتىپتى ايەلىن دە باسكە قويعان. ءبىراق كازينو قىزمەتكەرلەرى كەپىلگە كەلىنشەكتى ەمەس، ويىنشىنىڭ ءوزىن الىپ قالعان.
ويىنحاناداعىلاردىڭ ايتۋىنشا، جىگىتتىڭ قارىزى ءجۇز مىڭ دوللارعا جەتكەن. ءبىر اي بويى ءۇش بالالى وتباسىعا قوقان- لوقى جاساعان كازينوشىلار اقىر سوڭىندا ولاردىڭ اتاكەنت اۋماعىنداعى جالعىز باسپانالارىن ءوز اتتارىنا اۋدارىپ الىپتى.
ءبىراق بۇل وقيعا وتاعاسىنا ساباق بولماعان. باسپاناسىنان، بارىنان ايرىلعان سوڭ ءتۇزۋ جولعا ءتۇسۋدىڭ ورنىنا ول تالاي ادامدى جۇمىسقا تۇرعىزىپ بەرەمىن دەپ الداپ، قوماقتى اقشا جيعان. اڭقاۋ جۇرتتىڭ اقشاسىن دا كازينوعا سالعان. ارتىنان وتىرىگى اشىلىپ، الاياقتىق فاكتىسى بويىنشا بەس جىلعا سوتتالىپ تىندى. كۇيەۋىنەن قايىر بولماعان سوڭ كەلىنشەگى ءۇش بالاسىن جەتەكتەپ، توركىنىنە كەتكەن. «ويىنى وسىلدى» دەپ قازاق وسىندايدا ايتسا كەرەك.
