قازاقستان رۋبلگە قاتىستى «بەسكە ءبىر» تەپە- تەڭدىگىنە قايتا ورالمايدى

استانا. قازاقپارات - قازاقستان رەسەي رۋبلىنە قاتىستى «بەسكە ءبىر» تەپە- تەڭدىگىنە تاياۋارالىقتىڭ ىشىندە قايتا ورالمايدى.

 بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندەگى بريفينگتە ۇلتتىق ەكونوميكا ۆيتسە- ءمينيسترى تيمۋر جاقسىلىقوۆ ءمالىم ەتتى.

«وسىدان ەكى جىل بۇرىن بولعان ءدال وسى «بەسكە ءبىر» تەپە- تەڭدىگى (تەڭگەنىڭ رەسەيلىك رۋبلگە قاتىستى) بولۋى قاجەت دەپ سانايتىندىقتارىڭىز تۇسىنىكسىز. ءيا، بۇل - تاريحي تەپە- تەڭدىك رەسەي مەن قازاقستاندا 1998 - جىلى قۇنسىزدانۋ ورىن العاننان كەيىن ساقتالعان بولاتىن. ءبىراق 90- جىلداردا بىزدە مۇلدەم بولەك تەپە- تەڭدىك بولعان ەدى»، - دەدى ۆيتسە- مينيستر ب ا ق وكىلدەرىنىڭ ساۋالىنا وراي.

 ونىڭ پايىمىنشا، اتالعان تەپە- تەڭدىك قانداي دا ءبىر نەگىزدەلگەن نەمەسە قاتاڭ ەكونوميكالىق العىشارتتى ەمەس. سوندىقتان دا قازىرگى ۋاقىتتا ەكى ەلدىڭ ۇلتتىق ۆاليۋتالارى اراسىندا باسقا تەپە- تەڭدىك بار. «بەستە ءبىر» تەپە- تەڭدىگىنە بىزدەردىڭ قايتا ورالۋىمىز مۇمكىن ەمەس»، - دەپ قوستى ول.

ت. جاقسىلىقوۆتىڭ ايتۋىنشا، وتكەن جىلدارى ىشىندە رەسەيدە ديەۆالۆاتسيالىق پروتسەستىڭ قارقىندى ورىن الۋىمەن قاتار ينفلياتسيالىق پروتسەستىڭ دە ۇدەي تۇسكەنى بايقالادى.

«ياعني، ءونىم قۇنى كۇرت ءوستى. جىلدىق ماندە ينفلياتسيا 22-24 پايىزعا (رەسەيدە) دەيىن جەتتى، ال كەيبىر ونىمدەردە ودان دا جوعارى. ءدال وسى ارالىقتا بىزدە 2015 - جىلدىڭ ءبىرىنشى جارتى جىلدىعى بويىنشا ينفلياتسيا 3,9 پايىزدى قۇرادى» ، - دەدى ول.

 ونىڭ سوزىنە قاراعاندا، وسى باعا وزگەرىستەرى بەسكە ءبىر تەپە- تەڭدىگىنە كۇرت تۇزەتۋلەر ەنگىزدى.

 «تەڭگەنىڭ ەركىن باعام اينالىمىنا كوشكەنىمىزگە كوپ ۋاقىت بولا قويعان جوق. سونىمەن بىرگە بىزدەردىڭ جەرگىلىكتى جەرلەردەن الىپ جاتقان اقپاراتتارىمىز، كەرىسىنشە، بيزنەستىڭ، ونىڭ ىشىندە ازىق- تۇلىك سالاسىنىڭ دامۋى ءۇشىن زور سەرپىن العانىن ايتۋدا»، - دەدى ت. جاقسىلىقوۆ.

 اۆتور: مارلان جيەمباي