قازاق مەملەكەتتىك قىزدار پەداگوگيكالىق ۋنيۆەرسيتەتىندە ءۇش جاڭا نىسان بوي كوتەردى
شارا بارىسىندا ۋنيۆەرسيتەت رەكتورى دينار نوكەتايەۆا ارداگەر ۇستازدار، اتا- انالار مەن جينالعان قاۋىمعا جاڭا وقۋ جىلىندا تۇساۋى كەسىلەتىن جاڭا ستۋدەنتتەر ءۇيى، «اققۋ» سۋعا ءجۇزۋ باسسەينى جانە «اق شاتىر» جازعى ويىن- ساۋىق الاڭىن تانىستىردى.
ساحنا تورىنە كوتەرىلگەن قىزدار ۋنيۆەرسيتەتىنىڭ رەكتورى د. نوكەتايەۆا: «كۇزدىڭ العاشقى كۇنى ءبىرىمىز مەكتەپ تابالدىرىعىن جاڭا اتتاپ ەندى عانا الىپپەمەن تانىسساق، ەندى ءبىرىمىز ۇلكەن جاۋاپكەرشىلىكپەن ءبىر سىنىپ، ءبىر توپقا جەتەكشى بولىپ «ۇستاز» دەگەن ابىرويلى اتاقتى يەلەنىپ، ارداقتى كاسىپتى قولعا الىپ وتىرمىز. ءدال بۇگىن ورتامىزعا جۇرەكتەرى لۇپىلدەپ، اسقاق ارمان قۋىپ، كەشە عانا التىن ۇيا مەكتەپتەرىمەن قوشتاسقان بالاۋسا جاستار كەلىپ وتىر. جاڭا لەك - جاڭا لەپ! ءاربىر جاڭا وقۋ جىلىنداعى جۇمىستى ءبىز تىڭ كۇش- قۋاتپەن باستاۋىمىز كەرەك. ءبىزدىڭ قىزمەتىمىز - قاتەلەسۋگە بولمايتىن جاۋاپتى ءىس. ەلباسى نۇرسۇلتان ءابىش ۇلى نازاربايەۆ: «ەلىمىزدىڭ ەرتەڭى - بۇگىنگى جاس ۇرپاقتىڭ قولىندا، ال جاس ۇرپاقتىڭ تاعدىرى - ۇستازداردىڭ قولىندا» دەگەنى ءاردايىم جادىمىزدا جاتتالىپ تۇر. ق ر تۇڭعىش پرەزيدەنتىنىڭ بۇل ءسوزى پەداگوگ- ۇستازدارعا بىرىنشىدەن ۇلكەن سەنىم ارتسا، ەكىنشىدەن بولاشاق ۇستاز رەتىندە ۇرپاقتىڭ تاربيەسى، دەمەك، ەلدىڭ بولاشاعى سىزدەرگە سەنىپ تاپسىرىلادى، ۇشىنشىدەن بىرەگەي تۇلعا، قاسيەتتى ەسىم ۇستازعا دەگەن قۇرمەت پەن ىقىلاستىڭ ەرەكشە ەكەندىگىن بىلدىرەدى»، - دەپ، بارشا قاۋىمدى ءبىلىم كۇنى مەرەكەسىمەن قۇتتىقتاپ، وقۋ ورنىنىڭ جەتىستىكتەرىمەن، جاڭا وقۋ جىلىنداعى جوسپارلارىمەن تانىستىرىپ ءوتتى.
قازىرگى تاڭدا قازاق مەملەكەتتىك قىزدار پەداگوگيكالىق ۋنيۆەرسيتەتى - ۇلتتىق رەيتينگ بويىنشا پەداگوگيكالىق جوو ىشىندە ءبىرىنشى ورىندى يەلەنگەن ەڭ ۇزدىك ۋنيۆەرسيتەت. 2015 -جىلى ۇلتتىق اككرەديتاتسيا اگەنتتىگىنىڭ قورىتىندىسى بويىنشا قىزدار ۋنيۆەرسيتەتى قازاقستانداعى 40 جەتەكشى ۋنيۆەرسيتەتتىڭ اراسىنان 7-ورىنعا كوتەرىلدى. سونىمەن قاتار، قازاق مەملەكەتتىك قىزدار پەداگوگيكالىق ۋنيۆەرسيتەتى ۇلتتىق بيزنەس رەيتينگتىڭ حالىقارالىق رەيتينگ وداعىنىڭ شەشىمىمەن «سالا كوشباسشىسى - 2015» سەرتيفيكاتىمەن جانە «سالا كوشباسشىسى - 2015» قابىرعا مەدالىمەن ماراپاتتالدى.
وتانىمىزعا ۇلت تاربيەسىنىڭ جارشىسى بولعان بىلىكتى ماماندار دايىنداۋدا كوش باستاپ كەلە جاتقان قىزدار ۋنيۆەرسيتەتىندە بۇگىنگى كۇنى 7000 عا جۋىق جاستار ساپالى زاماناۋي ءبىلىم الۋدا، ولارعا 600 دەي تاجىريبەلى عالىم- ۇستاز ءدارىس وقيدى.
بۇل وقۋ ورنىنان العان ءبىلىم مەن تاربيەنىڭ ءجونى بولەك، جولى دا ەرەك. كيەلى شاڭىراققا اينالعان قىزدار ۋنيۆەرسيتەتى بىلىممەن قاتار تاربيەگە دە ەرەكشە نازار اۋدارىپ، ادامگەرشىلىك، يماندىلىق يناباتتىلىق، پاراساتتىلىق جانە ۇلتتىق تاربيە مەن وتباسىلىق قۇندىلىقتارىمىزدى بويلارىنا ءسىڭىرىپ كەلەدى. بۇگىندە قىزدار ۋنيۆەرسيتەتى تاربيە ماسەلەلەرى بويىنشا ەلىمىزدە عىلىمي- ادىستەمەلىك ورتالىق بولىپ تابىلادى.
مەرەكەلىك شارا اياسىندا جينالعان جۇرتقا ۋنيۆەرسيتەت اۋماعىندا بوي كوتەرگەن، الداعى ۋاقىتتا پايدالانۋعا بەرىلىپ، تۇساۋى كەسىلەتىن 9 قاباتتى ستۋدەنتتەر ءۇيى، «اققۋ» سۋعا ءجۇزۋ باسسەينى جانە «اق شاتىر» جازعى ويىن- ساۋىق الاڭى تانىستىرىلدى. جاڭا وقۋ جىلىندا پايدالانۋعا بەرىلەتىن 450 ورىنعا ارنالعان جاڭا ستۋدەنتتەر ءۇيى ەلباسىنىڭ تاپسىرماسىنا وراي ستۋدەنتتەردى جاتاقحانامەن قامتۋ ماسەلەسىنە باعىتتالعان «ستۋدەنتتىك باسپانا» مەملەكەتتىك باعدارلاماسىنىڭ اياسىندا سالىنسا، 32 ورىندىق ءجۇزۋ باسسەينى جاستاردىڭ دەنساۋلىعىن جاقسارتۋ ماقساتىن كوزدەيتىن «سالاماتتى قازاقستان» باعدارلاماسى اياسىندا بوي كوتەردى. ءۇش نىسان جاقىن كۇندەرى ۇكىمەتتىك دەڭگەيدە اشىلادى دەپ كۇتىلۋدە.
«اق شاتىر» الاڭىنا شىققان ءبىرىنشى كۋرس ستۋدەنتتەرى دە وزدەرىنىڭ جۇرەكجاردى نيەتتەرىن ءبىلدىرىپ، «بالاماسى جوق ۋنيۆەرسيتەتكە تۇسكەن» قۋانىشتارىن جاسىرا المادى. جيىن بارىسىندا قازاق قىزدارىنىڭ تاريحىنان سىر شەرتەتىن قۇندىلىقتار مەن ۋنيۆەرسيتەت عالىمدارىنىڭ عىلىمي جاڭالىقتارىنان تۇراتىن ۇلكەن كورمە ءبىلىم ورداسىنىڭ تىنىس- تىرشىلىگىن پاش ەتتى. سالتانات سوڭى ارۋلاردى قۇتتىقتاپ كەلگەن ەسترادا جۇلدىزدارى مەن ۋنيۆەرسيتەت ونەرپازدارىنىڭ كونتسەرتىنە ۇلاستى.
ايتا كەتەيىك، بيىلعى جىلى ۋنيۆەرسيتەتكە 1630 باكالاۆر، ماگيسترانت، دوكتورانت وقۋعا ءتۇستى. سونىمەن قاتار، جوعارى وقۋ ورىنعا وقۋعا تۇسۋگە دايارلايتىن دايىندىق بولىمىنە 300 تالاپكەر قابىلداندى.
