تيان انمىن الاڭىندا قازاقستان جاۋىنگەرلەردى ساپ تۇزەپ ءوتتى - فوتو

وسى ساتتە بۇكىل الەم نازارى قازاقستاندىق ارميا وكىلدەرىنە اۋدى. شەرۋدى مىنبەدەن جوعارى باس قولباسشى، ق ر پرەزيدەنتى نۇرسۇلتان نازاربايەۆ باقىلادى.
قازاقستان رەسپۋبليكاسى قورعانىس مينيسترلىگىنىڭ قۇرمەتتى قاراۋىل روتاسىنىڭ 76 اسكەري قىزمەتشىسى الەمدەگى ەڭ ءىرى تيان انمىن الاڭىندا 10 قاتاردا ساپ تۇزەدى، ولاردىڭ اراسىندا تۋ ۇستاۋشىلار توبى، ءۇش اسكەر ءتۇرى بار. اسكەري شەرۋدى ق ر ق م قۇرمەتتى قاراۋىلى روتاسىنىڭ كوماندير، كاپيتان ماقسات بايجىگىتوۆ وتكىزدى. بۇدان بۇرىن وسى شاراعا ازىرلىك بارىسىندا ول قىتايداعى پارادتا قازاقستان اتىنان شىعۋ قۇرمەتىن زور ماقتانىش سەزىمىمەن اتاپ وتكەن بولاتىن. «ءبىز وسى شارادا ەلىمىزدى لايىقتى كورسەتە الاتىنىمىزعا سەنىمدىمىز. ءبىزدىڭ ازىرلىك بارىسىمىزدى كورگەن باسقا ەلدەردىڭ وكىلدەرى دە وسىنداي پىكىردە»، - دەپ اتاپ كورسەتتى ول.
پاراد قارساڭىندا قازاقپارات تىلشىسىمەن سۇحباتتاسقان ق ر قارۋلى كۇشتەرى باس شتابىنىڭ جاۋىنگەرلىك داياپرلىق دەپارتامەنتى باستىعىنىڭ ورىنباسارى، پولكوۆنيك نۇرلان الدياروۆتىڭ ايتۋىنشا، وسى پارادتىڭ ەرەكشەلىگى مىنبەلەردىڭ وتە بيىك، ودان بارلىق پارادقا قاتىسشىلار الىستان دا انىق كورىنەدى، سوندىقتان دا ۇلكەن قاشىقتىقتىقتا ساپ تۇزەپ ءوتۋ ۇلكەن جاۋاپكەرشىلىك. «بۇل ءۇشىن اسكەريلەردىڭ شيراقتىعى مەن توزىمدىلىگى كەرەك»، - دەدى ول.
بەيجىڭدەگى ءبىزدىڭ اسكەري قىزمەتشىلەردىڭ جاسى 22-28 دە. ولار جاقسى ازىرلەنگەن، مورالدىق رۋحى كۇشتى، ساپتا ءجۇرۋ داعدىسىن جاقسى مەڭگەرگەن، - دەدى ن. الدياروۆ. - ءبىزدىڭ پارادقا قاتىسۋشىلار اراسىندا ەكىنشى دۇنيەجۇزىلىك سوعىس قاتىسۋشىلارى مەن باتىرلارىنىڭ نەمەرەلەرى بار».
پارادقا بارلىعى 15 قىتايلىق جانە 17 شەتەلدىك اسكەريلەر قاتىسادى، ولار بەلارۋس، كۋبا، ەگيپەت، قازاقستان، قىرعىزستان، مەكسيكا، موڭعوليا، پاكىستان، سەربيا، تاجىكستان، رەسەي، اۋعانستان، كامبودجا، فيدجا، لاوس، ۆانۋاتۋ، ۆەنەسۋەلا ەلدەرىنەن.
ەسكە سالا كەتەيىك، ەكىنشى دۇنيەجۇزىلىك سوعىس كەزىندە قىتايدى ازات ەتۋدە جاپون باسقىنشىلارىنان قازا تاپقان كەڭەستىك جانە موڭعول جاۋىنگەرلەرىنىڭ مەموريالىندا (بەيجىڭ قالاسىنان 245 شاقىرىم جەردە چجانتسياكوۋ ۋەزىنىڭ چجانبەي قالاسىندا) قازاق ك س ر-ىنىڭ اۋماعىنان شاقىرىلعان 21 ادام جەرلەنگەن.
ەسكەرتكىشتە 13 موڭعول جانە 66 كەڭەس جاۋىنگەرلەرىنىڭ ەسىمدەرى قاشاپ جازىلعان. ولاردىڭ اراسىندا قازاقستاندىق اۋەزحان جاپاروۆ، تولەمبەك وتەبايەۆ جانە اسىلحان بەربەكوۆتەر بار. باۋىرلاستار بەيىتى تۇرعان جەردەگى كەسكىلەسكەن شايقاستا قازا بولعان 60 جاۋىنگەردىڭ مۇردەسى جاتىر. حابار- وشارسىز كەتكەندەردى ىزدەۋ بۇگىنگى كۇندەرگە دەيىن جالعاسۋدا.
1945 -جىلعى يالتاداعى كونفەرەنسيادا قابىلدانعان وداقتاستىق مىندەتتەمەلەرىنە سايكەس ك س ر و جاپونياعا قارسى سوعىسقا گەرمانيانى تىزە بۇكتىرگەننەن جانە ەۋروپاداعى سوعىس اياقتالعاننان كەيىن تۋرا 3-ايدان كەيىن كىرىسكەن بولاتىن. مانجۋرۋريالىق ستراتەگيالىق شابۋىل وپەراتسياسىن زابايكال جانە قيىر شىعىس مايداندارى اسكەرلەرى جۇرگىزدى.
زابايكال مايدانىنىڭ وڭ قاناتىندا كەڭەستىك- موڭعولدىق اتتى- مەحانيكالاندىرىلعان توبى چجۆانتسزياكوۋ جانە چەندە قالالارىنىڭ باعىتىندا سوعىس قيمىلدارىنا قاتىستى. 18 تامىزدا ولار اتالعان قالالارعا شىعىپ، كۆانتۋن ارمياسىن سولتۇستىك قىتايداعى جاپون اسكەرلەرىنەن جولىن كەستى.
كەڭەستىك اسكەرلەر قۇرامىندا ءبىر تانك جانە ەكى موتواتقىشتار بريگادالارى، اتتى اسكەر ديۆيزياسى، جويۋشى- تانكىگە قارسى ارتيللەريالىق بريگادا، موتوسيكلدى، جويۋشى- اۆياتسيالىق جانە مينومەت پولكتارى، ەكى زەنيتتىك- ارتيللەريالىق پولك جانە ينجەنەرلىك- ساپەرلەر باتالونى بولدى. موڭعول حالىقتىق ريەۆوليۋتسيالىق ارمياسىنان تانك پولكى مەن اۆياتسيا ديۆيزياسى قاتىستى.