بۇگىن الاشتىڭ ايبوز ۇلى عارىشقا ۇشادى - اي مەن ايدىن

قىمىزىن ۇرتتاپ، قويىن قۇرتتاپ، ىرگەسى ءتۇرۋلى كيىز ءۇيدىڭ ىشىندە جاتىپ، تۇتاس ادام بالاسىنىڭ مىنەزىن اشاتىن ءبىر اۋىز ءسوزدى قولمەن قويعانداي ەتىپ ايتا سالعانىنا قايران قالاسىڭ. بۇگىندە بەس اكادەميا تاۋىسسا دا تىلىنە ورامدى تىركەس تۇسپەيتىن، ويى وراۋلى، ساناسى بۇعاۋلى كەيبىرەۋلەردى كورگەندە بابالاردىڭ كورەگەندىلىگىنە تاڭدانباۋعا ءداتىڭ شىدامايدى. «الەمدى تۇگەل كورسە دە، التىن ۇيگە كىرسە دە» ومىردەن وكىنىشسىز كەتكەن ادام جوق ەكەن. قازاقتىڭ بايتاعىندا عۇمىر كەشىپ، قاراعا قاراپايىم قالپىمەن، حانعا قامقورشى كوڭىلىمەن جاققان قارا شالدىڭ وسيەتى جەر بەتىندە ادامزات بالاسى باردا ماڭگىلىك بولماق. ويتكەنى، زامان ءتۇرلى فورماتسياعا كوشىپ، ءوڭىن وزگەرتىپ، العا ادىمداپ دامي بەرگەنمەن ادامنىڭ كوڭىلى مەن پەيىلى ءباز- باياعىسىنشا قالا بەرمەك. وقىسام، بىلسەم، كورسەم دەگەن نيەت ءاربىر سانالىعا تيەسىلى سەبەبى.
عارىشقا عاشىقتىق
جەردىڭ اپشىسىن قۋىرىپ، مىڭ- ميلليون ازوتتى تەسىپ ءوتىپ، ءبىر عالامنان ەكىنشىسىنە زۋلاپ جەتەتىن زىمىراننىڭ بايقوڭىردان كوتەرىلگەنىنە دە جارتى عاسىردان استى. قۇس قاناتىنا دەگەن ىڭكارلىك ادامزات بالاسىن ءتۇبى ۇشاق قۇراستىرۋعا اكەلدى. تاقتايعا شەگە قاعىپ جاسالعان تالاي ۇشاق قيراپ قالعانىمەن، اقىر سوڭى اسپاندا ەركىن سامعايتىن، قاناتىنا قوندىرىپ الىپ زىمىراي ۇشاتىن جاعدايعا جەتتى. ءبىراق ادامعا بۇل دا ازدىق ەتتى. زەڭگىر كوكتىڭ ار جاعىن قيالىمەن شارلاي بەردى. ون سەگىز مىڭ عالامدى ەركىن ارالايتىن اپپارات قۇراستىرۋعا تالپىندى. كۇندەردىڭ كۇنى وعان دا قولى جەتتى. سويتسە، قوس عالامنىڭ اراسىن تەز جالعايتىن، توتە جول سالاتىن جەرىڭىز بايقوڭىر ەكەن. ءيت پەن مىسىققا ەسپەريمەنت جاساپ بولعان سوڭ، زىمىرانعا ادامدى سالىپ، ايعا ۇشىرىپ جىبەردى. سولايشا، يۋري گاگاريننىڭ اتى ماڭگىلىككە تاريحتا قالدى. ال وسى تىرلىكتىڭ بارلىعى ادام قيالىنان تۋىنداعان شارۋالار ەدى. ارمان مەن اڭساردىڭ ناتيجەسى ناقتى جەتىستىككە ۇلاستى.
سودان بەرى ادامي زاتىڭىز اسپان الەمىن زەرتتەۋمەن كەلەدى. ءارى- بەرىدەن سوڭ حالىقارالىق عارىش كەشەنىن سالىپ تاستادى. دەگەنمەن، بۇگىنگى جەتىستىكتىڭ ءوزى ادام ساناسىنىڭ شىرقاۋ شەگى دەي المايسىز. ويتكەنى، عالامدا ءبىز بىلمەيتىن تىلسىم سىرلار ءالى كوپ. ونى اشۋعا، قۇپياسىنا ۇڭىلۋگە قۇشتارلىق سونگەن جوق. قايتا ۋاقىت ساناپ ارتىپ كەلەدى. وسىنداي عالامات تىرلىكتىڭ اراسىندا تەڭىزگە تامشىداي بولسىن ۇلەس قوسىپ جۇرگەن ۇلتىڭنىڭ بار ەكەنى ەسىڭە تۇسكەندە كوكىرەگىڭدى قۋانىشتىڭ سەزىمى كەرنەپ كەتەدى. كەڭەس وداعىنىڭ ىدىرار الدىندا اسپانعا ۇشىپ، تاۋەلسىز قازاقستاننىڭ تۇڭعىش عارىشكەرى رەتىندە جەرگە قونعان توقتار اۋباكىروۆتىڭ اتى ءارقايسىمىز ءۇشىن قادىرلى. عارىشقا ءبىر ەمەس، ءۇش رەت ساپار شەگىپ، موينىنا ارتىلعان ءزىلباتپان جۇكتى ابىرويمەن اتقارعان تالعات مۇسابايەۆتىڭ ەسىمى ءبىز ءۇشىن التىننان دا ارداقتى. ءبىراق جۇرت كوكەيىندە: «توقتار مەن تالعاتتىڭ ءىسىن جالعار ازامات جوق پا؟ » دەگەن ساۋالدىڭ جۇرگەنىنە كوپ بولعان. بار ەكەن. ءبىر ەمەس، قازاقتىڭ ەكى بىردەي قىران جىگىتى توماعاسىن سىپىرساڭ تۇرا ۇشۋعا دايىن وتىرىپتى.
عاسىر باسىندا رەسەيدەگى عارىشكەرلەردى دايىندايتىن ورتالىققا وقۋعا جىبەرىلىپتى. تورتتىك دەگەن باعاڭىزدىڭ ەكىلىك قۇنى جوق وقۋ ورنىن ەكى ازامات تا ۇزدىك ءبىتىرىپ شىقتى. عارىشقا جىبەرسەڭىز، قارىشتاپ بارىپ- قايتۋعا دايىن بولدى. ولار ايدىن ايىمبەتوۆ پەن مۇحتار ايماحانوۆ ەدى. وسى ەكى جىگىتتىڭ ءبىرى جاڭا زاماننىڭ العاشقى ونجىلدىعىندا اسپانعا ۇشۋعا ءتيىس بولاتىن. جوسپار بويىنشا. دەي تۇرعانمەن، داعدارىس دەگەن دۇنيە تىرسەكتەن شالىپ، ويعا العان ماقسات ورىندالماي قالدى. بۇل جاڭالىقتان كەيىن مۇحتار ايماحانوۆ ازاماتتىعىن اۋىستىردى. ال ايدىن ايىمبەتوۆ استاناعا اتباسىن بۇردى. وسىلاي جۇرگەندە بيىل ويدا- جوقتا جاعىمدى جاڭالىق ەستىپ، بوركىمىزدى اسپانعا اتتىق. «قازاقستان عارىشكەرىنە عارىشقا ۇشۋعا رۇقسات بەرىلدى» ، دەگەن. سولايشا، ايىمبەتوۆتىڭ ارمانى التى جىلعا كەشىگىپ ورىندالىپ جاتقان جاعدايى بار.
ءبارى جاقسى ءھام دۇرىس قوي. ءبىراق ءبىر مەزەت وزىڭىزگە: «مەن وسى ايدىن تۋرالى نە بىلەمىن؟ » دەپ سۇراق قويىپ كورىڭىزشى. نە بىلەدى ەكەنسىز؟ اسپانعا اتتانايىن دەپ تۇرعان ازاماتىڭىز جايىندا قانداي اقپارات بار؟ ءبىز بۇگىن وسى ءبىر ولقىلىقتىڭ ورنىن تولتىرماققا تالپىندىق. قاسيەتىڭنەن اينالايىن قازاق بايتاعىنىڭ قاي پۇشپاعى دا كيەلى عوي. تەڭىزدىڭ تولقىنى تابانىن تەۋىپ، اقجايىعى جايقالىپ جاتقان باتىس، اقسەلەۋى اق كىلەمدەي ارقا، ۇلىستىڭ ۇيىتقىسىنداي بولعان قاراتاۋ، قويناۋى قۇت، تابيعاتى تامىلجىعان ءور التاي، ءبارى- ءبارى ءاربىر قازاق ءۇشىن قادىرلى مەكەن. ايتىپ- ايتپاي نە كەرەك، بابالار كىرپىك قاقپاي، قاسىق قانىن اياماي قورعاپ بىزگە اماناتتاعان ابىز دالانىڭ ءار سۇيەمى سۇيكىمدى ءام سۇيىكتى. سوندا دا بولسا، الاشتىڭ الاتاۋعا دەگەن كوڭىلى، مەيىرىم- ماحابباتى الابوتەن. جەردىڭ ءجانناتىنا بالايدى. جەتى وزەنى سىڭعىر قاققان، باۋ- باقشاسى، تال- داراعى، ەمەن- قاراعايى سىڭسىپ شىققان، اق باستى تاۋىنىڭ ماڭدايىنا بۇلت قونعان، حانتاڭىرى شىڭى ەشكىمگە باعىنباستاي پاڭ قالپىنان تايماعان ءوڭىر، شىنىندا دا، تامىلجىعان تابيعاتىمەن تارتادى دا تۇرادى. جەتى سۋدى قاتار ەمىپ جاتقان الاقانداي عانا تالدىقورعان قالاسى تىنىشتىقتىڭ مەكەنى سەكىلدى. مىنە، ايدىن ايىمبەتوۆ وسى جەردە دۇنيە ەسىگىن اشتى.
تالدىقورعاننان ىرگەسى بولىنبەي جاتقان، بۇگىندە وتەناي دەپ اتالاتىن اۋىلدا ەر جەتتى. اكە- شەشەسى قاراپايىم عانا وتباسى ەدى. بىلەتىندەر، ايدىننىڭ بالا كەزىنەن ويى وزىق، قيالى جۇيرىك بولعانىن ايتادى. كىشكەنە كەزىندە ءۇيدىڭ جانىندا ۇيىلگەن شومەلەنىڭ توبەسىنە شىعىپ، شالقاسىنان جاتىپ جۇلدىز ساناپ، اسپان الەمىنە عاشىقتىعى باستالعان دەسەدى. التىعا اياق باسقانىندا اكەسى اقان اقساقال بالاسىنان قىزىق ءۇشىن بولاشاقتا كىم بولاتىنىن سۇراپتى. «عارىشكەر» دەپ تاق ەتە قالعان ەكەن ايدىن سوندا. گاگاريننىڭ اسپانعا كوتەرىلگەنىنە 11 جىل بولعان تۇس قوي. ول زاماننىڭ بالالارىنىڭ بارلىعى عارىشكەر نەمەسە ۇشقىش بولۋدى ارماندايتىن. ۇلكەندەر جاعىنىڭ ايدىننىڭ ارمانىنا جىميىپ قاراعانى دا سول شىعار. ءبىراق ايىمبەتوۆ ءوزىنىڭ بولاشاقتاعى جولىن بالا شاعىنان باستاپ جوسپارلاعانداي. ويتكەنى، وقۋدا وزات بولدى. تالدىقورعان قالاسىنداعى №20 ورتا مەكتەپتى التىن مەدالمەن اياقتادى. بىلىمگە قۇشتار، دەنساۋلىعى شىمىر تۇلەك ارماۆير جوعارى اسكەري ۇشقىشتار ۋچيليشەسىنە بىردەن قابىلداندى. ايدىننىڭ اتالعان وقۋ ورنىنا قۇجات تاپسىرۋى دا زاڭدىلىق ەدى. سەبەبى، عارىشكەر بولۋدىڭ توتە جولى ۇشقىش بولۋدا جاتىر. ونى وسى وقۋ ورنىن ءبىتىرىپ، كەيىننەن كوك جۇزىنە اتتانعان توقتار اۋباكىروۆ اعاسىنىڭ جولى انىق كورسەتكەن. ول وسىلايشا عارىشكەر بولۋ ارمانىنا العاشقى قادامىن جاسادى. رەسەيدەگى ەڭ تانىمال وقۋ ورداسىن 1993 -جىلى ءبىتىرىپ، ۇشقىش- ينجەنەر ماماندىعىن الىپ شىقتى.
قىراننىڭ قاناتى قالاي قاتايدى؟
ارماۆير جوعارى اسكەري ۇشقىشتار ۋچيليشەسىن ءتامامداپ كەلگەسىن قازاقستاننىڭ قورعانىس جۇيەسىندەگى جۇمىسى باستالىپ كەتتى. جاس جىگىتتى جامبىل وبلىسى لۋگوۆوي ستانساسىندا ورنالاسقان №64207 اسكەري بولىمىنە ۇشقىش رەتىندە جىبەردى. ءبىر جىلعى ناتيجەلى جۇمىستان كەيىن تۋعان توپىراعى تالدىقورعانعا اۋىستى. ءبىلىمى مەن بىلىگىن كۇن ساناپ ارتتىردى. بىلايشا ايتقاندا، ۇشاقتىڭ قۇلاعىندا وينايتىن دارەجەگە جەتتى. التى جىل بويىنا اعا ۇشقىش قىزمەتىن اتقارعان. جاڭا عاسىردا اسكەري ءبولىمنىڭ باسشىلىعى سۋ-27 اۋە ەسكادريلياسىنىڭ اۋە زۆەنوسىن باسقارۋدى تاپسىردى. ءبىز اتىن بىلگەنمەن، زاتىنا اسا كوپ بويلاي المايتىن، دەگەنمەن اۋە قورعانىسىندا ەرەكشە ماڭىزى بار ل-39, ميگ-23, ميگ-23ملد، ميگ-27, سۋ-27 ۇشاقتارىن ۇرشىقشا ءيىردى. بەس بىردەي ۇشاقتىڭ ءتۇرىن تىزگىندەي الاتىن ماماننىڭ اسپانداعى ءومىرى 470 ساعاتتان اسادى.
قىسقاسى، ول كۇن ساناپ ءوزىنىڭ تۇپكى ماقساتىنا جاقىنداي بەردى. ءتۇرلى سىناقتاردىڭ بارىنەن ءوتتى. توزىمدىلىگى ءسات سايىن شىڭدالا ءتۇستى. ايدىن ۇشقىشتار ۋچيليشەسىن ءبىتىرىپ كەلگەن جىلى بىردەن عارىشكەر بولۋعا قۇجات تاپسىرعان. جاستىقتىڭ جالىنى بويىندا ارىنداپ تۇرعان جىگىتتىڭ بۇل ارەكەتىن تۇسىنۋگە بولاتىن ەدى. ويتكەنى، جاسقا ءتان ماكسيماليزم بولماسا، جانارىنان وت شاشىپ، ازۋىن ايعا بىلەپ تۇرماسا، وندا ونىڭ بولاشاقتاعى باعىندىرار بيىگى دە اسا ۇلكەن بولماس ەدى. العاشقى تالپىنىس ءساتسىز بولدى. سول ساتتە ول ءوزىن شىڭداي ءتۇسۋى كەرەك ەكەنىن، قايراققا ءتۇسىپ، قاناتىن قاتايتۋ قاجەتتىگىن انىق ءتۇسىندى. قانشا جىلعى ەڭبەك پەن قاجىر- قايرات جەمىسىن بەردى.
2001 - جىلعى 16 - ماۋسىم كۇنى ايدىن ايىمبەتوۆتى عارىشكەرلىككە ۇمىتكەر رەتىندە تىركەدى. بۇل كۇندى ايدىننىڭ ءوزى بىلاي ەسكە الادى. - قانشا جىلعى توگىلگەن تەر مەن ەتكەن ەڭبەكتىڭ وتەۋىندەي بولدى بۇل. ءالى عارىشكەر اتاعىن العانىمىز جوق. جاي عانا ۇمىتكەر بولعاننىڭ ءوزى كوڭىلدى تەربەپ جىبەردى. ەڭ عاجابى، ءدال ۇمىتكەر رەتىندە تىركەلگەن كۇنى مەن ايەل زاتىنىڭ ىشىنەن شىققان تۇڭعىش عارىشكەر ۆالەنتينا تەرەشكوۆامەن تانىستىم. مۇنى ىشتەي جاقسىلىققا بالادىم، - دەيدى. مەديتسينالىق تەكسەرۋدەن جان- جاقتى ءوتتى. ونىڭ ءوزى بىرنەشە ساتىدان تۇردى. اقىر سوڭى ماسكەۋدە تەكسەردى. دەنساۋلىعىنان ينەنىڭ جاسۋىنداي كىنارات تاپپادى. ودان بولەك، ماماندىققا دا باسىمدىق بەرىلدى. ءبىزدىڭ كەيىپكەرىمىزدىڭ ءبىلىمى وعان دا ساي بولاتىن. عارىشقا ۇشۋ ءۇشىن ينجەنەرلىك- تەحنيكالىق سالانىڭ ءرولى زور. ال ايىمبەتوۆ ۇشقىش- ينجەنەر. جاس ەرەكشەلىگى دە ماڭىزدى ماسەلەنىڭ ءبىرى. ەگدە تارتىپ تۇرساڭ، ول دا بولمايدى. بۇل رەتتە دە ايدىننىڭ ايى وڭىنان تۋدى. ايتەۋىر ۇزاق ۋاقىت بويعى تالاپتان كەيىن قازاق بالاسى يۋري گاگارين اتىنداعى عارىشكەرلەر دايىندايتىن ورتالىققا جىبەرىلدى.
تاڭنىڭ اتىسى، كۇننىڭ باتىسى وقۋ مەن جاتتىعۋ ۇزىلمەيتىن. ءبىر عانا نارسە ايتايىق: بۇل جەردە وقىعان ءبىر جىلىڭىز قاراپايىم وقۋ ورىندارىنداعى 3,5 جىلعا تەڭ ەكەن. ساناعا سىڭىرىلەتىن ءسوز بەن بەرىلەتىن ءبىلىمدى جاتتاپ الۋعا تۋرا كەلەدى. ال ونىڭ ءمانى مەن ماڭىزىنا بويلاپ، تەرەڭىنە ءۇڭىلۋ تاعى قاجەت. عارىش كەمەسىندەگى ءاربىر جاعدايدى باعامداپ، ءاربىر تەتىكتى جاتقا بىلگەنگە دەيىن دايىندايدى. قول مەن مي قاباتتاسىپ جۇمىس ىستەيتىن دارەجەگە جەتكىزىلەدى. ولاردىڭ ورتالىقتاعى ءاربىر ساعاتىڭىز نە، سەكۋندىنا دەيىن ەسەپتەۋلى -ءتىن. وسىدان كەيىن- اق ورتالىقتاعى دايىندىقتىڭ باعاسىن باعامداي بەرۋگە بولاتىن شىعار.
- ۇيگە كەلگەننەن كەيىن كەمى 2-3 ساعات دايىندىققا ۋاقىتىم كەتەدى. ويتكەنى، جاڭا اقپاراتتاردى بويعا ءسىڭىرىپ، ودان تۋىندايتىن سۇراقتاردى قاعازعا ءتۇسىرۋ كەرەك. ەرتەسى ۇستازداردان سۇراپ الماساڭ بولمايدى. ارينە، العاشقى كەزدە قينالدىم. عارىشكەرلەردى دايىندايتىن ورتالىقتىڭ پسيحولوگتارى بىلاي دەيدى: ورتالىقتىڭ وقۋ جۇيەسى عارىشكەرلەردى ۇنەمى ينەنىڭ ۇشىندا وتىرعانداي سەزىمدە ۇستاۋعا قۇرىلعان. ول ءبىر قاۋىپ- قاتەردى سەزىنۋدەن ەمەس. سەرگەك جۇرۋگە، ءاربىر جاعدايعا سالقىنقاندى قاراۋعا ۇيرەتەدى، - دەيدى ايدىن. جالپى دايىندىقتى قانداسىمىز 2005 -جىلى اياقتادى. وقۋ ناتيجەسى بويىنشا وعان «عارىشكەر- سىناقشى» اتاعى بەرىلدى. ەندىگى كەزەك ودان دا قيىن. الدا ءۇش جىل بويىنا حالىقارالىق عارىش كەشەنىنە بارۋ ءۇشىن توپتىق دايىندىق تۇرعان. ويتكەنى، ايدىن ايىمبەتوۆ نەمەسە مۇحتار ايماحانوۆ 2009 -جىلدىڭ 30 - قىركۇيەك كۇنى اسپانعا ساپار شەگەدى دەگەن كەلىسىم بولعان.
ءۇمىت پەن كۇدىك
عارىشقا ادام اتتاندىرۋ وڭاي شارۋانىڭ قاتارىنان ەمەس. ونىڭ ۇستىنە، قازاقستاننىڭ حالىقارالىق عارىش كەشەنىنە عارىشكەر اتتاندىراتىن تىكەلەي رۇقساتى جوق. بۇل جاعدايدا ءبىز رەسەيگە ارقا سۇيەيمىز. سولارعا بەرىلگەن ورىنعا ورتاقتاسامىز. ەكى ەلدىڭ اراسىندا بۇرىننان كەلە جاتقان كەلىسىمنىڭ رەتى سولاي. قازاقستان مەن رەسەي ۇكىمەتتەرىنىڭ اراسىنداعى ۋاعدالاستىق بويىنشا ايدىن ايىمبەتوۆ پەن مۇحتار ايماحانوۆ عارىشقا ۇشۋعا ۇمىتكەر بولدى. ءبىراق 2009 - جىلىڭىزدا جاھاندىق داعدارىستىڭ العاشقى لەگى لاق ەتىپ كەلە قالماسى بار ما؟ عارىشقا ادام اتتاندىرىپ، توقتار مەن تالعات باستاعان زەرتتەۋ جۇمىستارىن ودان ءارى جالعاستىرۋ كەرەك- اق. ءبىراق داعدارىس كەزەڭىندە حالىقتىڭ اۋزىنان اقشا جىرىپ جىبەرگەنىمىز قالاي بولادى؟ ! ويلاسا كەلە، عارىشكەر اتتاندىرمايتىن بولدىق.
ايدىن مەن مۇحتاردىڭ سول ساتتەگى كوڭىلىنىڭ قانداي بولعانىن وزدەرى عانا بىلەتىن شىعار. ءبىراق شامالاۋعا بولادى. قانشا جىلدىق دايىندىقتىڭ وتەۋىنە، بالا كەزدەگى ارماننىڭ ورىندالۋىنا ءبىر- اق قادام قالعاندا توقتاۋ دەگەنىڭىز ادامدى شايقاپ جىبەرەدى عوي. مىنە، ماقساتقا جەتەم، ويىمداعىنى ورىندايمىن دەپ تۇرعاندا كەرى شەگىنۋدىڭ ءوزى پەندە پسيحولوگياسىنا وڭاي سوقپاسى انىق. ولار دا ىشتەي وكىنگەن، مۇجىلمەسە دە ۇگىلگەن شىعار- اۋ. ونىسىن تىرس ەتىپ ەشكىمگە ايتپادى. ايتپەسە، سول ساتتە رەپورتەرىن جالاڭداتىپ تالاي جۋرناليست باردى. ءارى- ءسارى كەزدەگى ايدىننىڭ سۇحباتتارىن قاراپ شىقتىق. ءۇمىتتى ەكەنىن عانا ايتقان. جالعىز ايىمبەتوۆ قانا ەمەس، تۇتاس قازاق جۇرتشىلىعى، اسىرەسە، ونىڭ وتباسى وسى ارماننىڭ جەتەگىندە بولدى دەسەك، اقيقاتتان الىس كەتپەيتىن شىعارمىز. وتباسى دەمەكشى، ايدىن جۇبايى ليليا ايىمبەتوۆا ەكەۋى ءبىر ۇل، ەكى قىز تاربيەلەپ وتىر. ۇلكەن ۇلى ءامىر وسى كەزدەن اكە جولىن جالعايمىن دەپ الدىنا ماقسات قويعان. ال قىزدارى ديانا مەن دايانا جەلكىلدەپ ءوسىپ كەلە جاتىر.
اڭگىمەمىزدىڭ ءالقيسساسىندا بۇقار جىراۋدىڭ ولەڭىنەن ءۇزىندى كەلتىرىپ ەدىك قوي. سول جىر بىلاي اياقتالادى: «جاقىنداپ اجال تۇرسا دا، جانىنا قىلىش ۇرسا دا، قالجىراپ، كوڭىلى قارايىپ، قاراۋىتىپ كوزى تۇرسا دا - ءۇمىتىن قويماس ادامزات. « ءۇمىتسىز - شايتان» . « ءۇمىت ەڭ سوڭىنان ولەدى» دەيدى ورىستار. ادامزات بالاسىن العا سۇيرەپ كەلە جاتقان ۇلكەن كۇشتىڭ ءبىرى وسى بولسا كەرەك. ايتپەسە، مىنا دۇنيەنىڭ استاڭ- كەستەڭى شىعار ما ەدى؟ ! «بالا كۇنگى ارمانىم ءتۇبى ورىندالادى دەپ ۇمىتتەنەمىن. زاماننىڭ وڭاي ەمەس ەكەنىن كورىپ وتىرمىز. ءبىراق قازاقستانعا عارىشتى زەرتتەۋدى توقتاتپاۋ كەرەك»، - دەپتى ايدىن ءبىر سۇحباتىندا.
داعدارىس دەگەنىڭىز سۇيكىمسىز قوناقتاي قايتا- قايتا اينالىپ سوعىپ جاتقاندا ايدىننىڭ كوكەيىندە «ەندى عارىشقا ۇشپايمىن- اۋ» دەگەن كۇدىك بولمادى دەيسىز بە؟ ارينە، بولدى. ءبىراق ءۇمىتى باسىم ەدى. اقىرى، سول ءۇمىت جەڭىپ شىقتى. اياق استى، ويدا جوقتا ايدىن عارىشقا اتتاناتىن بولدى. «سويۋز تما - 18م» عارىش كەمەسىمەن حالىقارالىق عارىش كەشەنىنە اتتانادى دەلىنگەن اعىلشىندىق ءانشى سارا برەيتمان ويىنان اينىپ قالدى. ونىڭ ورنىنا ايدىن ايىمبەتوۆ قوسىلدى. سولايشا، ايدىننىڭ نانى ءجۇردى دە كەتتى. ال ءبىز بۇگىن 2 - قىركۇيەك كۇنى ساعات 10.30-دا «بايقوڭىر» عارىش ايلاعىندا تاريحتاعى ءۇشىنشى قازاقتى اسپانعا اتتاندىرىپ تۇرمىز. اق جول، الاشتىڭ ايبوزى!
ەرجان بايتىلەس، «ەگەمەن قازاقستان» . قىزىلوردا وبلىسى.
قىزىق دەرەك
ءداستۇر دەيمىز بە، الدە ادەت دەيمىز بە، ءبىراق، عارىشكەرلەردىڭ قالىپتاسقان جولى بار. ولار عارىشقا اتتانعانعا دەيىن ەشكىمگە قولتاڭبا بەرمەيدى. مەيلى، ول عارىشكەرلەردى دايىندايتىن ورتالىققا ەندى وقۋعا تۇسكەن تۇلەك بولسىن، مەيلى، دايىن عارىشكەر بولسىن. ودان كەيىن ءاربىر عارىشكەر يۋري گاگاريننىڭ تۋعان جانە قايتىس بولعان جەرىنە بارۋعا مىندەتتى. گاگاريننىڭ ءۇيىنىڭ جانىنداعى قۇدىقتان سۋ ءىشۋ دە ءداستۇر. ال عارىشقا ساپار الدىندا ولار «بەلوە سولنتسە پۋستىني» فيلمىن كورەدى. ايدىن ايىمبەتوۆ عارىشقا كەنجە قىزىنىڭ قولدان جاساعان سىيلىعىن الىپ كەتپەكشى. حالىقارالىق عارىش كەشەنىنە ءبىزدىڭ حالىقتىڭ ەتى مەن قازىسىن ءھام قىمىزىن اپارىپ، قازاق داستارقانىن جايادى.