جاڭا جىبەك جولىنىڭ قازاقستان ارقىلى وتەتىن بولىگى تولىعىمەن دايىن - ن. نازاربايەۆ

كەزدەسۋدە نۇرسۇلتان نازاربايەۆ پەن ق ح ر ءتوراعاسى شي جينپيڭمەن جۇزدەسۋ بارىسىندا قول جەتكەن ۋاعدالاستىقتاردى ىسكە اسىرۋ ماسەلەلەرى تالقىلاندى.
مەملەكەت باسشىسى قازاقستان- قىتاي قارىم- قاتىناستارىن دامىتۋعا قوسقان ۇلەسى ءۇشىن لي كىشياڭعا العىس ايتىپ، ق ح ر مەملەكەتتىك كەڭەسى پرەمەرىنىڭ بىلتىرعى جەلتوقسانداعى ساپارىنىڭ ماڭىزىنا توقتالدى.
ءسىز قازاقستان مەن قىتاي اراسىنداعى ىنتىماقتاستىقتىڭ جاڭا كەزەڭىن قالىپتاستىرۋ ىسىنە زور ۇلەس قوستىڭىز. قازىر ءبىز قول جەتكىزگەن ۋاعدالاستىقتار مەن ءبىرقاتار ونەركاسىپ ورىندارىن قازاقستانعا كوشىرۋ جونىندەگى ۇسىنىس تولىق قارقىنمەن جۇزەگە اسىرىلۋدا. سونىڭ ناتيجەسى رەتىندە بۇگىنگە دەيىن بىرلەسكەن يندۋستريالىق نىساندار قۇرۋ تۋرالى 25 كەلىسىمگە قول قويىلدى، - دەدى نۇرسۇلتان نازاربايەۆ.
قازاقستان پرەزيدەنتى سونداي- اق «نۇرلى جول» جانە «جاڭا جىبەك جولى» باعدارلامالارىنىڭ سينەرگياسى ەكى ەلدىڭ ستراتەگيالىق ىنتىماقتاستىعىن نىعايتۋ ءۇشىن جاڭا مۇمكىندىكتەرگە جول اشاتىنىن ايتتى.
قازىرگى ۋاقىتتا قازاقستاننان رەسەيگە قاراي اۆتوموبيل جولى، يران ارقىلى پارسى شىعاناعىنا قاراي تەمىرجول سالىندى، كاسپي تەڭىزىندە تەڭىز پورتى قۇرىلدى، ورتالىق ازيانىڭ بارلىق مەملەكەتتەرى قورعاس ارقىلى بايلانىستىرىلدى. جاڭا جىبەك جولىنىڭ قازاقستان ارقىلى وتەتىن بولىگى تولىعىمەن دايىن دەپ سەنىممەن ايتۋعا بولادى، - دەدى مەملەكەت باسشىسى.
لي كىشياڭ قازاقستان مەن قىتاي حالقى اراسىنداعى دوستىقتى نىعايتۋداعى ءرولى مەن ەلدەرىمىزدىڭ قارىم- قاتىناستارىن جاڭا ساپالى دەڭگەيگە شىعارۋ ىسىندە نۇرسۇلتان نازاربايەۆتىڭ ۇلەسى زور ەكەنىن اتاپ ءوتتى.