ادامزاتتى مويىنداتقان جەتى قازىنا

توردە بىرنەشە قاريا جاپ-جاقسى اڭگىمە ايتىپ وتىر ەكەن. ولار كونە تۇركى تاريحىن، ورتا عاسىرداعى شىڭعىسحاننىڭ داۋىرلەگەن كەزەڭىن، التىن ورداداعى وركەندەۋ، بەرگى جاعى 30- جىلدارى اتىلىپ كەتكەن زيالى تۇلعالار تۋرالى تولعاپ شىقتى.
سالدەن سوڭ اسىعىستاۋ ەكى-ءۇش قارت قوشتاسىپ، ەرتە شىعىپ كەتتى. توردە وتىرعان قاريا مەنى قاسىنا شاقىرىپ الدى دا بوس ورىنعا جايعاستىردى. ەت جەلىنىپ بولعان سوڭ ءۇي يەسى «ساكە، قۇران وقىپ، دۇعا ەتىپ جىبەرسەڭىزشى» دەپ ءوتىندى. مەن داۋىستاپ قۇران وقىپ، دۇعا قايىردىم. قۇراننان سوڭعى ءبىر ساتتىك ءۇزىلىستى پايدالانىپ، مەن دە ارۋاقتارعا ارناپ قۇران وقىپ، دۇعا جولداۋ ءداستۇرىنىڭ شىعۋ سەبەبى تۋرالى قيسسالاردى ايتا باستادىم.
قاريا ەلەڭ ەتىپ، ۇيىپ تىڭداي قالدى. سودان ەكەۋىمىز سول جەردە شۇيىركەلەستىك تە كەتتىك. قاريانىڭ كوكىرەگى تولعان قازىنا ەكەن. سۇراقتاردى جاۋدىردى.
«تاعى قانداي قيسسا بىلەسىڭ، ايتا بەر. شىرىن ەكەن مىنا اڭگىمە. جاسىم سەكسەنگە تاقاسا دا تاپ مىناداي قىزىق قيسسالاردى ءبىرىنشى رەت ەستىپ وتىرمىن» دەپ ايىزى قانىپ وتىر. اقساقالىڭ سوۆەت كەزىندە پارتيانىڭ ادامى بولعان. ءبىراق ەڭ قىزىعى - سوۆەت وداعى قۇلاعان سوڭ ەشقانداي دا پسيحولوگيالىق سوققى الىپ، ديپرەسسياعا تۇسپەگەن.
داستارحان باسىندا ماعىنالى اڭگىمە ايتىپ، ەلدى جاقسىلىققا ۇيىتىپ وتىراتىن قاسيەتىنەن تانباعان. سۇراي كەلە بىلىستىك. سويتسەم، قاريا بالا كەزىندە اۋىلداعى اتا- اجەلەردىڭ اڭىز- اڭگىمەسىن قۇلاعىنا قۇيىپ العان ەكەن. فۋندامەنتى اۋىز ادەبيەتىمەن قالانعان. سسسر قۇلاعان سوڭ پارتيانىڭ وتىرىگىن لاقتىرىپ تاستاپ، باياعى كلاسسيكالىق اڭگىمەسىنە قايتا ورالعان. ونىڭ بۇرىنعى پارتيا وكىلى ەكەنىن تەك كيىم ۇلگىسى عانا ايتىپ تۇر. وتە اقىلدى كىسى ەكەن. دەنساۋلىعىن مىقتاپ كۇتكەن. اقىل- ەسى ساپ- ساۋ. زايىبىن دا كۇتىپ ۇستاعان دجەنتەلمەن بولسا كەرەك، كەمپىرى جەتپىستەن اسسا دا سىنى كەتپەگەن ساليقالى ايەل.
«تىڭداۋشى ىقىلاستى بولسا، ايتۋشى شەشەن كەلەدى» دەمەكشى، مەن دە كوسىلىپ وتىردىم. ءبىر كەزدە ول:
- وسى سەن جەتى قازىناعا نە جاتادى، سونى بىلەسىڭ بە؟ - دەپ سۇرادى مەنەن. مەن ساسىپ قالدىم دا:
- وي، ونىڭ ۆاريانتى كوپ قوي. بىرەۋلەر انانى جاتقىزادى. بىرەۋلەر مىنانى جاتقىزادى. مىسالى قىران، تازى، جۇيرىك جىلقى، سۇلۋ ايەل دەپ تە جاتادى، دەپ ساناعان بولدىم.
- مەنىڭشە سونىڭ ءبارى قاتە. مەنىڭ كوڭىلىمە ەش قونبايدى وسى ايتقاندارىڭ.
- نەگە؟ ناقتى نە ۇنامايدى سوندا؟
- بالام، ءوزىڭ ويلاپ قاراشى. جەتى قازىنا دەگەن ادام اتا مەن حاۋا انا جەرگە تۇسكەندە ءولىپ قالماي ومىرلەرىن جەڭىلدىكپەن ءسۇرۋ ءۇشىن بەرىلگەن ەڭ قات، ەڭ كەرەك، ەڭ ءزارۋ زاتتار بولۋ كەرەك. ەگەر سۇلۋ ايەل قازىناعا جاتاتىن بولسا، ايەل ادام ەركەكتىڭ مەنشىكتى زاتى سياقتى بولىپ قالماي ما؟ سوندىقتان ول دۇرىس ەمەس. ەر مەن ايەل تەڭ. ەكەۋى وتاۋ قۇرىپ، جۇپتاسقاندا عانا دۇنيەگە جاڭا بالا كەلىپ، ادام ءومىرى جالعاسىن تابادى. سوندىقتان، ايەلدى قازىناعا جاتقىزۋدى مەنىڭ اقىلىم ولسە دە قابىلدامايدى، - دەدى.
- ال، جۇيرىك ات پەن قىران بۇركىت شە؟ ول نەگە كوڭىلىڭىزگە جاقپادى؟
- مۇندا بىلاي. بۇل ەكەۋى دە قۇداي جاراتقان جاقسى ماقۇلىق. قازاقتىڭ ءومىرىن ولارسىز ەلەستەتۋ مۇمكىن ەمەس. ءبىراق جەتى قازىنا دەگەننىڭ فيلوسوفياسى وتە تەرەڭ بولۋ كەرەك. ياعني، «ادام اتا حاۋا انادان تارادىق» دەپ ايتاتىن بولساق، ونداعى قازىنا دا جالپى ادامزاتقا ورتاق بولۋى ءتيىس. ال جۇيرىك جىلقى مەن قىران بۇركىت قازاقتىڭ عانا تىرشىلىگىنە ءسان بەرىپ تۇرعان ماقۇلىقتار. وسى ەكى ماقۇلىق بولماسا ادامنىڭ تىرشىلىگى توقتاپ قالادى دەگەن تۇسىنىك بولماۋ كەرەك. قىران بۇركىت ادامدى اشتان الىپ قالاتىن قازىنادان كورى، كوڭىل كوتەرەتىن ساۋىق - سايراننىڭ سالتاناتىنا كوبىرەك ۇقسايدى. ال جىلقىنى لاتىن امەريكاسىنداعى ۇندىستەر كونكيستادورلار ءمىنىپ بارعاندا ءبىرىنشى رەت كورىپ تاڭ قالعان. سول سياقتى قىران بۇركىتتى دە اسىراپ اڭعا سالماي- اق ءومىرىن ءسۇرىپ جاتقان ەلدەر جەتەرلىك، - دەپ ءبىر توقتادى.
- سوندا سىزدىڭشە جەتى قازىناعا نە جاتۋ كەرەك؟
- مەنىڭشە، جەتى قازىنا دەگەن كونە زاماندا ماڭىزدى بولىپ، قازىرگى كەزدە قاجەتى مەن كەرەگى جوعالاتىن نارسە بولماۋى كەرەك. ەگەر ول كەرەكتەن قالىپ، قولدانىستان شىعاتىن بولسا، ولاردى ىرىكتەپ الىپ، «جەتى قازىنا» دەپ كيەلەندىرۋدىڭ نە قاجەتى بار؟
- مىنا لوگيكاڭىز ماعان ۇناي باستادى. تارقاتا ءتۇسىڭىز.
- مىسالى، سەن ايەلىڭ ەكەۋىڭ روبينزون سياقتى ارالدا قالىپ قويدىڭ دەلىك. سول كەزدە سەن اشتان ولمەي، ءومىرىڭدى ءسۇرىپ، تىرشىلىكتى ارى قاراي جالعاستىرىپ اكەتۋگە ءتيىسسىڭ. ياعني، قولىڭدا ناعىز قازىنا بولۋى كەرەك.
- ءسىز سوندا اقىلىڭىزبەن ەلەپ- ەكشەپ، جەتى قازىنانى وزىڭىزشە ىرىكتەپ شىقتىڭىز با؟
- جوق. ونى ماعان دەيىنگى اقىلدى قازاقتار ىرىكتەپ قويعان. تەك كەيىنگى كەزدە وتىرىك فولكلور جيناعىشتار اقىلدىڭ سۇزگىسىنەن وتكىزبەستەن، نە بولسا سونى قازىناعا قوسا بەرگەن. قاي جىلى ەكەنى ەسىمدە جوق، بىردە كولىكتە كەلە جاتىپ، قازاق راديوسىنان ءبىر حابار تىڭدادىم. سول كەزدە ءبىر كىسى جەتى قازىنانا وسىلاي لوگيكاعا سالىپ ساناپ شىقتى. ونىڭ اتى- ءجونىن جاتتاپ قالا المادىم. ەسى- دەرتىم جەتى قازىنادا بولدى. ماعان سول نۇسقاسى كەرەمەت ۇناپ قالدى.
- يا، ول نەنى كىرگىزدى جەتى قازىناعا؟
- ەڭ ءبىرىنشى - شاقپاق! وت شىعاراتىن شاقپاق. وتسىز كۇنىڭ جوق. سولاي عوي؟ جىلىنۋ كەرەك. تاماق تەك وتقا پىسەدى. تۇندە جاعىپ قويىپ، جىرتقىش اڭنان قورعانۋعا دا بولادى. شاقپاق بولماسا تىرشىلىكتىڭ توقتاۋى ابدەن مۇمكىن. ەندى مىنا جاعىنا نازار اۋدار. ءقازىر دە اس ۇيدە شاقپاق تۇرادى. ۇيىڭدە وتتىق تاۋسىلىپ قالدى دەلىك. بالاڭدى شاقپاققا جۇمساماي نەشە ساعات وتىرا الام دەپ ويلايسىڭ؟ وتتىقسىز ءومىرىڭدى ەلەستەتە الاسىڭ با؟
- جوق. راسىمەن دە وتتىقسىز كۇنىمىز جوق. ۇيدە سىرىڭكە تاۋسىلسا سول زامات مازاڭ قاشادى.
- انە، كوردىڭ بە؟ نە دەيسىڭ ەندى؟!
- سوسىن؟
- ەكىنشى ساداق! ساداق جاساماي ەل بولعان ءبىر دە ءبىر ەجەلگى تايپانى تابا المايسىڭ. سوعىس قۇرالىنان بولەك، اڭدى الىستان اتىپ قۇلاتاتىن جالعىز قۇرال - ساداق! اشتان ولمەۋدىڭ كەپىلى. البەتتە، كەيىن وتتى قارۋ شىققان سوڭ ونىڭ ورنىن مىلتىق باستى. مىلتىق دامي كەلە اۆتوماتتى قارۋعا اينالدى. سولاي كەتە بەرەدى. ءبىراق سوندا دا تۇپكى پرينتسيپ ساقتالىپ قالعان. ياعني وق ادىرنادان ۇشسا دا، ستۆولدان ۇشسا دا الىستاعى اڭدى اتىپ قۇلاتىپ، ادامعا ازىق تاۋىپ بەرەدى. ءقازىر دە قارۋسىز ەل بولا ما؟ ىشكى، سىرتقى اسكەرىڭ قارۋ اسىنباي جۇرە الا ما؟ مىلتىقتىڭ كۇشىنسىز پوليتسياڭ ءتارتىپ ورناتا الا ما؟ سونىمەن ساداق زامانعا ساي مىلتىق بولىپ وزگەردى. كەلىسەسىڭ عوي؟
- كەلىسەم!
- ارى قاراي كەتتىك. ءۇشىنشى - ارقان! ءيا، كادىمگى ارقان. قۇداي بىلەدى دەپ ايتايىن، ەڭ ءبىرىنشى ارقاندى شىرماۋىقتان بولسا دا ەڭ ءبىرىنشى ادام اتانىڭ ءوزى ەسكەن شىعار. ونسىز قورا- قوپسىسىن قالاي تۇرعىزادى؟ ول كەزدە مەتالل سىم جوق. ءبارىن ارقانمەن بايلاعان. ءتورت تۇلىك مالدىڭ ءبارى الىگە دەيىن ارقانمەن بايلانادى. ەڭ اياعى حاۋا انا كىر جۋمادى دەيسىڭ بە؟ جۋىلعان كيىم كەشەكتەرىن ارقان تارتىپ، جىپكە جايعان شىعار. ءقازىر دە سولاي ەمەس پە، - دەدى.
- ءيا، راس، - دەدىم مەن. ويلاپ قاراسام راسىمەن دە سولاي. قورادا مال
ۇستاماسام دا دالاعا كىر جايعاندا ءجىپ تارتادى ەكەم. قالاي دەسەك تە ارقاننىڭ جىڭىشكە ءتۇرى عوي. مالمەن وتىرعان حالىقتىڭ تۇرمىسىن ارقانسىز كوزگە ەلەستەتۋ تىپتەن مۇمكىن ەمەس.
- ارى قاراي، - دەدىم قىزىعىپ.
- ءتورتىنشى - كەزدىك! كادىمگى پىشاق. ەڭ ءبىرىنشى تاستان جاسالعان كەزدىكتەن باستاپ، قازىرگى توت باسپايتىن مىقتى پىشاقتاردىڭ اراسىندا اناۋ ايتقانداي ايىرماشىلىق جوق. راس قوي؟ كەزدىكتىڭ دە مىندەتى وزگەرمەستەن سول كۇيى قالدى. كۇندەلىكتى تۇرمىس- تىرشىلىگىڭدى پىشاقسىز ەلەستەتە الاسىڭ با؟ مالدى كومپيۋتەرمەن باۋىزداپ، ەتتى قولىڭنان تاستاماي وتىرعان مىنا تەلەفونمەن بورشالامايتىن شىعارسىڭ، - دەدى ازىلدەپ. ءبارى تەگىس كۇلىپ جىبەردى. مەن «شىنىندا دا بۇرىندارى نەگە ويلانباعام» دەدىم. «كومپيۋتەر، تەلەفونسىز كۇن جوق» دەپ قويامىز. قاراپ تۇرسام كەزدىكسىز كۇنىمىز جوق ەكەن- اۋ دەپ قالدىم.
- ەندى نە قالدى؟
- بەسىنشى - ءيت! بۇل ەندى ەلدىڭ ءبارى بىلەتىن اقيقات! ءيتتى كىم جاقسى كورمەيدى؟ ءيت تارالماعان ايماق بار ما ءوزى؟ ادامنىڭ تۇرمىسىنا ءيت سياقتى تىعىز ارالاسقان ءبىر دە ءبىر ماقۇلىق جوق. ادامنىڭ ناعىز اينىماس سەرىگى. قازىرگە دەيىن ءيتتى قاۋىپسىزدىك ورگاندارى ارنايى اسىرايدى. بومبانى دا، ەسىرتكىنى دە سولار ىزدەپ تابادى. مىنە، ناعىز قازىنا! ادام اتانىڭ كىندىگىنەن جارالعالى بەرى كادەمىزگە جاراپ كەلەدى. سوندىقتان، يتپەن قوشتاسۋعا ءالى ەرتە.
- التىنشىعا نە الامىز؟
- التىنشى - قازان! قازانسىز كۇنىڭ جوق! كورمەيسىڭ بە، ارحەولوگتار كونە قىتايدى قازعان كەزدە كوبىنە قازان تاۋىپ الادى. وسىعان قاراپ- اق قازاننىڭ وتە كونەدەن كەلە جاتقان قاسيەتتى قۇرال ەكەنىن بىلۋگە بولادى. تاماق پىسىرەتىن ىدىسسىز كۇنىڭدى ەلەستەتە الاسىڭ با؟ ادامزات وركەنيەتى باستالعالى نەشە مىڭ جىل ءوتتى. سودان بەرى اس- اۋقات پەن تاعام- تاماقتىڭ نەشە ءتۇرى شىقتى. كۋليناريا - ءوز الدىنا بولەك عىلىم! وزگەرمەگەن قارا قازان عانا. سوعىستا عانا سولداتتارعا ىڭعايلى بولسىن دەپ كىشكەنە كوتەلەك بەرەدى. ءبىراق ءپرينتسيپى بىرەۋ. تاماقتى ساقتاۋ جانە سوعان جىلىتىپ جەۋ. ەگەر قازان سونشالىقتى ماڭىزدى بولماسا سولداتقا كوتەلەكتى جۇك ەتىپ ارتپاس ەدى، - دەدى.
- سوڭعىسى قالدى.
- مەنىڭشە سوڭعىسى - بالتا! بىرەۋلەر ونىڭ ورنىنا قاقپان دەگەن ەكەن. ونى ونشا قابىل كورمەدىم. سەبەبى، ارقانمەن دە تۇزاق قۇرىپ اڭ اۋلاۋعا بولادى. قازىرگى ومىردەن الىپ قاراساڭ دا ادامدار قاقپانسىز تىرشىلىگىن سۇرە بەرەدى. ال بالتاسىز قالانىڭ دا، دالانىڭ دا ءومىرىن ەلەستەتە المادىم. ارحەولوگتاردىڭ قازباسىن قاراپ وتىرساڭ تاس پەن اعاشتان جاساپ العان بالتانىڭ تالاي ءتۇرى تابىلادى. سەن انا وتسي دەگەن مۇردەنى بىلەتىن شىعارسىڭ. سونى ادامدار ءالپى تاۋىنان 5500 جىلدان كەيىن تاۋىپ الدى. اسىنعان ساداعى مەن بەلىندەگى بالتاسى جانە كىشكەنتاي تاس كەزدىگى سول كۇيى ساقتالعان. قازىر وتسيدىڭ ءمايىتى قۇرال- سايمانىمەن بىرگە يتاليادا مۋزەيدە جاتىر. ول ولگەن كەزدە مىسىرداعى پيرامادىنىڭ ءوزى تۇرماق، ورنى دا سىزىلماعان. قاراپ تۇرسام بالتا دا سودان بەرى ەش وزگەرىسكە ۇشىراعان جوق. بالتا، سول بالتا كۇيىندە قالدى. سەمسەر، قىلىش، قانجار سوعىستا عانا سەرىك. ال بالتامەن وتىنىڭدى شاپساڭ دا، جاۋىڭدى شاپساڭ دا پايداڭا اسادى. ادام اتا ەڭ ءبىرىنشى ءۇيى مەن قورا- قوپسىسىن اعاشتان سوققان كەزدە قالىڭ بۇتاقتاردى كەزدىكپەن جونىپ قۇلاتپاعان شىعار؟ دۇرىس پا مەنىڭ ويىم؟ ءقازىر دە ادامدار بالتادان باس تارتىپ، تىرشىلىك كەشە الا ما؟ وتىن سۋىڭدى ايتپاعاندا - سوعىمعا سويىلعان ءىرى قارانىڭ جىلىكتەرىن پىشاقپەن شاپپايسىڭ عوي. ءبارى دە بالتامەن تىناتىن ءىس، - دەپ توقتادى دا، - قالاي بالام، كوڭىلىننەن شىقتى ما؟ - دەدى.
- شىقتى، - دەدىم. مەن ءۇشىن بۇل زور جاڭالىق بولدى. «وسىعان دەيىن تاپ وسى قاريا سياقتى تەرەڭ لوگيكامەن قالاي ويلانباعام» دەپ تاڭعالدىم. سودان نە كەرەك، قوناقتىق تارقاپ، ۇيىمىزگە قايتتىق. قىزىق ءالى الدا ەكەن. اۋىلعا كەلگەن سوڭ وزىمنەن التى جاس ۇلكەن اعامنىڭ ۇيىنە سوعىپ بولعان اڭگىمەنى ايتىپ بەردىم. ول روسو- دا قۇتقارۋشى بولىپ جۇمىس ىستەيدى. ەكى كۇننىڭ بىرىندە تاۋدا جوعالعان، سەل مەن جەلدىڭ استىندا قالعان بەيباقتاردى قۇتقارىپ تۇزدە جۇرەدى. مەنى تىڭداپ بولىپ اعام مەنەن دە بەتەر تاڭعالدى. ول:
- ويپىرماي، قالاي راس ايتقان انا كىسى! بۇرىن نەگە ويلاماعانبىز. مىنا بىزدەر، پروفەسسيونال قۇتقارۋشىلار ارنايى بازادا سمەنمەن تاۋلىكتەپ جاتامىز. بازادا ءار ءبىر قۇتقارۋشىنىڭ جەكە جاشىگى بولادى. جاشىكتە ءبىزدىڭ جەكە ريۋكزاك ساقتالىپ تۇر. قۇتقارۋشى تاۋدا، يا ورمان- توعايدا ءوزى دە اداسىپ، قيىندىققا تاپ بولسا، ونىڭ ريۋكزاگىندا ءتىرى قالۋ ءۇشىن قولداناتىن ەڭ كەرەكتى زاتتار ساقاداي ساي تۇرۋى ءتيىس. «ادام جوعالدى» دەپ دابىل قاققاندا قۇتقارۋشى ويلانباستان سول ريۋكزاكتى ءىلىپ الىپ شىعىپ كەتەدى. ونىڭ ىشىندە مىنا، سەن ساناپ شىققان جەتى قازىنانىڭ قارۋدان باسقاسى تۇگەل بار. سىرىڭكە سۋ وتكىزبەيتىن تسەللوفانعا ورالىپ تۇرادى. كوتەلەكتا نز تاماق. پىشاق بولسا دا. ماعان ەڭ قىزىعى ارقان بولدى. زاڭ بويىنشا ەڭ كەمى ون مەتر ارقان مىندەتتى تۇردە بولۋ كەرەك. ءبىزدى كوميسسيا ءجيى تەكسەرەدى. ەگەر ءبىر زات كەم بولسا ايعاي- شۋ باستالادى. سول ءۇشىن جالاقىڭدى قىرقىپ جازالايدى. نەگىزى ءبىز عانا ەمەس، مىنا تاۋعا سەرۋەندەپ شىققاندار ءجاي ادامدار دا سولاي ءجۇرۋى ءتيىس. وتكەندە اقپاننىڭ باسىنداعى قاھاعان ايازدا تاۋدا ءبىر جىگىت جوعالدى. ءۇش كۇن ىزدەپ زورعا تاپتىق. مارقۇم جىگىت كەشكە ۇيىنە قايتارىندا تاۋدىڭ توبەسىمەن ەمەس، تاۋەكەل ەتىپ، سايدىڭ تابانىمەن كەتكەن. توتە جولمەن اسفالتقا تۋرا شىقپاقشى بولعان. 27 جاسار ءىرى دەنەلى جىگىت قالىڭ قاردى كەشىپ كەلە جاتقاندا ءبىر اياعى جەردە جاپىرىلىپ قۇلاپ جاتقان اعاشتاردىڭ اراسىنا قىستىرىلىپ قالعان. قانشا ارپالىسسا دا اياعىن شىعارا الماعان كۇيى سول جەردە سۋىقتا ءۇسىپ ولگەن. ارقاسىندا ريۋكزاگى بار. اشساق - بوس. نە تاماق، نە شاقپاق الماعان. ەگەر سىرىڭكەسى بولعاندا قول جەتكەن جەردەگى شوپتەرمەن اعاش، بۇتالاردى وتقا جاعىپ جىلىنىپ، قاردى ەرىتىپ، اياعىن دا سۋىرىپ الۋعا شانس بار ەدى. دەنەسىن قازىپ الىپ جاتىپ ءوزىمىز دە سۋىقتا قاتىپ قالدىق. قايتا- قايتا وت جاعىپ، دەنەمىزدى جىلىتىپ، مۇزدى ەرىتىپ، سىرەسكەن ءمايىتتى ازەر دەگەندە بوساتىپ الدىق. سالماعى 90 كيلوگرام تارتاتىن اۋىر مۇردەنى ارقاندارعا بايلاپ شاتقالدان تارتىپ شىعاردىق. كەدەرگى كەلتىرگەن بۇتاقتىڭ ءبارىن بالاتامەن شاۋىپ تازارتتىق. قارنىمىز اشىپ، ءولىپ قالا جازدادىق. كوتولەكتاعى تاماقتى ىسىتىپ، سول جەردە سوعىپ الدىق. ونداي جەردە جانىڭدى ساقتاپ قالاتىن ەڭ كەرەك زاتتار اتام زاماندا ادام اتا قولدانعان سول باياعى قارابايىر قۇرالدار. تاۋدىڭ سايىندا تەلەفون مەن كومپيۋتەردەن قايران جوق. تاۋدا انتەننا ۇستاماعان سوڭ ول ەشكىمدى تەلەفونمەن كومەككە شاقىرا الماعان. بولماسا، قالتاسىندا تەلەفونى سول كۇيى ىستەپ تۇر. انا قاريا كىسى راس ايتقان. ونداي كەزدە جىلقى مەن بۇركىتتەن دە پايدا جوق. ودان دا قاسىندا ءيتى بولسا ۇرەر مە ەدى، كىم ءبىلسىن؟ ! قازىر دە قۇتقارۋ ىسىندە بىزبەن بىرگە جاتتىعاتىن جالعىز ماقۇلىق يت قانا. ولاردى ەۋروپادان قىمبات باعاعا ساتىپ الادى. قاردىڭ استىندا قالعان ادامداردى يىسكەپ سول تابادى. جەر سىلكىنىپ اپات بولعاندا دا يتتەر الدىعا تۇسەدى. قازىنا دەسە، قازىنا عوي شىركىن! ادام اتا، حاۋا انادان بەرى نەشە مىڭ جىل ءوتتى. سودەن بەرى جەتى قازىنا سول وزگەرمەگەن كۇيى قالىپتى، - دەدى.
سانجار كەرىمباي
degdar.kz