ءبىز بەيبىت اتومدى پايدالانۋعا جاعداي جاسايمىز - ن. نازاربايەۆ

استانا. قازاقپارات - مەملەكەت باسشىسى نۇرسۇلتان نازاربايەۆ ماگاتە- نىڭ باس ديرەكتورى يۋكيا امانونى قابىلدادى، دەپ حابارلادى اقوردانىڭ باسپا ءسوز قىزمەتى.
None
None

كەزدەسۋ بارىسىندا ەلباسى ماگاتە باس ديرەكتورىن قازاقستاندا از بايىتىلعان ۋران بانكىن قۇرۋ تۋرالى كەلىسىمگە قول قويىلۋىمەن قۇتتىقتادى. نۇرسۇلتان نازاربايەۆ بۇل وقيعا جەمىستى ءوزارا ءىس- قيمىلدىڭ قورىتىندىسى بولعانىن اتاپ ءوتتى.

- قازاقستان سەمەي پوليگونىن جاپتى، ءبىز ءىرى يادرولىق قارۋدان باس تارتتىق. ەلىمىز يادرولىق قارۋ تاراتپاۋ ساياساتىن جۇرگىزىپ كەلەدى. بۇل ورايدا ءبىزدىڭ كوزقاراستارىمىز ۇقسايدى دەپ ويلايمىن، - دەپ اتاپ ءوتتى قازاقستان پرەزيدەنتى.

مەملەكەت باسشىسى يراننىڭ يادرولىق باعدارلاماسىنا قاتىستى قازاقستاندا وتكەن كەلىسسوزدەردىڭ ءبىرىنشى راۋندى كەزىندە وسىنداي بانكتىڭ قورىنان يادرولىق وتىن الۋ مۇمكىندىگىن قازاقستان تاراپى بىرنەشە رەت ايتقانىن اتاپ ءوتتى.

يۋ. امانو شارتقا قول قويۋ شىن مانىندە تاريحي وقيعا بولعانىنا توقتالدى.

- بۇگىندە اتوم ەلەكتر ستانساسىن سالۋعا نيەتتى نەمەسە سونداي جولدى قاراستىرىپ وتىرعان ەلدەر ۋران نارىعىنداعى كەز كەلگەن اۋىتقۋلارعا قاراماستان، از بايىتىلعان ۋران ساتىپ الۋ مۇمكىندىگى بار ەكەنىنە سەنىمدى بولا الادى. وسى ماڭىزدى باستامانى جۇزەگە اسىرۋ بارىسىندا ءسىزدىڭ كوشباسشىلىعىڭىز نەگىزگى ءرول اتقاردى. ماگاتە اتىنان جانە بۇكىل حالىقارالىق قوعامداستىق اتىنان سىزگە ءوز ريزاشىلىعىمىزدى بىلدىرگىمىز كەلەدى، - دەدى امانو.

ماگاتە باس ديرەكتورى سونداي- اق يادرولىق قارۋدى تاراتپاۋ رەجىمىن نىعايتۋ تۇرعىسىنان باي تاريحى، سونداي بارلىق قاجەتتى ينفراقۇرىلىمى بار قازاقستان مۇنداي بانكتى ورنالاستىرۋعا ەڭ لايىقتى ۇمىتكەر ەكەنىن ايتتى.

كەزدەسۋ سوڭىندا مەملەكەت باسشىسى قازاقستاندىقتارعا وسى تاريحي قادامدى ءتۇسىندىرۋدىڭ ماڭىزدىلىعىن اتاپ ءوتتى.

- قاندايدا ءبىر ەلدىڭ يادرولىق باعدارلاماسىن ۋراندى بايىتۋدان باستاۋى بارشانى الاڭداتادى. بۇل ونىڭ زاڭسىز تارالۋ ءقاۋپىن تۋدىرادى. ال ءبىز ءوزىمىزدىڭ يادرولىق تسيكلدى قۇرماي- اق بەيبىت اتومدى پايدالانۋعا جاعداي جاسايمىز، - دەدى نۇرسۇلتان نازاربايەۆ.

سوڭعى جاڭالىقتار