15:45, 27 - تامىز 2015 | GMT +5
ن. نازاربايەۆ «استانا» فۋتبول كلۋبىن قۇتتىقتادى جانە كومانداعا جارقىن جەڭىستەر تىلەدى
استانا. قازاقپارات - مەملەكەت باسشىسى نۇرسۇلتان نازاربايەۆ «استانا» فۋتبول كومانداسىنىڭ ۋ ە ف ا چەمپيوندار ليگاسىنىڭ توپتىق كەزەڭىنە شىعۋىمەن بايلانىستى قۇتتىقتاۋ جولدادى، دەپ حابارلادى اقوردانىڭ باسپا ءسوز قىزمەتى.

مەملەكەت باسشىسى ەلوردالىق كوماندانى قۇتتىقتاي وتىرىپ، وسىناۋ شىن مانىندەگى تاريحي جەتىستىك جانكەشتى ويىننىڭ، ىنتىماقتىڭ، شەبەر باپكەرلىك جۇمىس پەن جانكۇيەرلەردىڭ قىزۋ قولداۋىنىڭ ناتيجەسى ەكەنىن اتاپ ءوتتى.
«كوماندانىڭ تابىسى بۇكىل قازاقستان حالقىن تۇتاستىرا ءتۇستى. بۇل وقيعا سپورتتى ەلىمىزدە ودان ءارى تانىمال ەتە ءتۇسۋ ءۇشىن تىڭ سەرپىن بەرەتىنىنە سەنىمدىمىن. «استانانى» ەندى فۋتبولداعى الەمدىك الىپ كوماندالارمەن باسەكەلەر كۇتىپ تۇر. بۇل ءبىزدىڭ جانكۇيەرلەرىمىزگە جاڭا ساپالىق دەڭگەيدەگى ويىنداردى كوزبەن كورۋگە مۇمكىندىك بەرەدى»، - دەلىنگەن جەدەلحاتتا.
سوڭىندا نۇرسۇلتان نازاربايەۆ بارشا قازاقستاندىقتاردىڭ اتىنان كومانداعا جارقىن جەڭىستەر تىلەدى.