استانا اكىمى «شاپاعات» بازارىندا ءتارتىپ ورناتۋدى تاپسىردى

وتكەن اپتادا قازاقستان ۆاليۋتا ءدالىزىن الىپ تاستاۋ ارقىلى تەڭگە باعامىن ەركىن جىبەرىپ، جاڭا قارجىلىق ساياساتتى جۇزەگە اسىرۋعا كىرىسكەن بولاتىن. وسىعان وراي، ەلوردادا نەگىزگى ازىق- تۇلىك ونىمدەرى باعالارىنىڭ قىمباتتاماۋىن قاداعالايتىن ارنايى جەدەل شتاب قۇرىلدى.
اكىمنىڭ ايتۋىنشا، تاۋارلار باعاسىنا كۇندەلىكتى مونيتورينگ جۇرگىزىپ، باعالاردى ءجون- جوسىقسىز كوتەرەتىن كاسىپكەرلەردىڭ الىپساتارلىق ىستەرىنىڭ الدىن- الۋ كەرەك.
- مەن بۇعان دەيىن رەسپۋبليكامىزدىڭ وڭىرلەرىنىڭ قاتىسۋىمەن اۋىلشارۋاشىلىق ونىمدەرىنىڭ جارمەڭكەسىن وتكىزۋدى تاپسىرعانمىن. العاشقى ناتيجەلەر دە بار. تامىزدىڭ 22 سىنەن باستاپ ءبىر اي كولەمىندە «مەگا» ساۋدا ورتالىعىنىڭ الدىندا جامبىل وبلىسى تاۋار وندىرۋشىلەرىنىڭ اۋىلشارۋاشىلىق جارمەڭكەلەرى وتەتىن بولادى، - دەدى اكىم.
قالا باسشىسىنىڭ پىكىرىنشە، مۇنداي شارالار تۇرعىندار تاراپىنان ۇلكەن سۇرانىسقا يە، سوندىقتان جارمەڭكەلەرگە بارلىق وڭىرلەردى تارتىپ، تاۋار كولەمىن ارتتىرۋ قاجەت. ەلورداداعى جارمەڭكەگە اكەلىنەتىن تاۋارلار باعاسى نارىقتاعى باعالاردان الدەقايدا ارزان بولۋى شارت.
- قازىرگى جاعدايدا مۇنداي شارالار وتە قاجەت، - دەپ اتاپ ءوتتى اكىم.
جارمەڭكە وتكىزۋگە بەرىلەتىن ارنايى اۋماقتارعا توقتالا وتىرىپ، ءا. جاقسىبەكوۆ «شاپاعات» بازارىنىڭ وسى ماقساتتارعا ارنالعانىن باسا ايتتى. الايدا ونىڭ اۋماعى كوبىندە باسقا ماقساتتاردا قولدانىلادى.
- بازار الىپساتارلارعا تولى. تۇرعىندار ول جەرگە تاۋار وندىرۋشىلەردەن ارزان باعاعا ءونىم ساتىپ الۋ ءۇشىن بارۋلارى كەرەك. «شاپاعات» بازارىندا ءبىر اپتانىڭ ىشىندە ءتارتىپ ورناتۋدى تاپسىرامىن، - دەدى اكىم.
ەلوردا باسشىسى دارىلەردىڭ، اسىرەسە، ومىرلىك ماڭىزى بار پرەپاراتتاردىڭ باعاسى وسپەۋىن قاداعالاۋ كەرەكتىگىن دە اتاپ ءوتتى.
جيىن بارىسىندا ءا. جاقسىبەكوۆ ەلوردا ساياباقتارى مەن گۇلزارلارىندا قالا تۇرعىندارىنىڭ دەمالىسىن ۇيىمداستىرۋ جۇمىستارىنا دا توقتالدى. اكىمنىڭ ايتۋىنشا، استانالىقتاردىڭ قاتىسۋىمەن مادەني- بۇقارالىق شارالار كوپتەپ ۇيىمداستىرىلا باستادى. بۇل باعىتتاعى جۇمىس تۇراقتى تۇردە ۇيىمداستىرىلۋى كەرەك، الاڭدار، ساياباقتار مەن گۇلزارلار قالا تۇرعىندارى مەن تۋريستەردى تارتۋ ورىندارىنا اينالۋلارى قاجەت.