ۇكىمەتتە ينفلياتسيالىق تارگەتتەۋگە كوشۋ جاعدايىنداعى شۇعىل شارالار تالقىلاندى

وتىرىستا جاڭا ەكونوميكالىق ساياساتقا كوشۋ جاعدايىنداعى ەلدىڭ الەۋمەتتىك- ەكونوميكالىق دامۋ ماسەلەلەرى قارالدى.
بۇل تۋرالى ۇكىمەت باسشىسىنىڭ باسپا ءسوز قىزمەتىنەن حابارلاندى.
اتاپ ايتقاندا، ورتا مەرزىمدى پەرسپەكتيۆادا ەكونوميكالىق ءوسىمدى قامتاماسىز ەتۋگە باعىتتالعان شارالار جوسپارى تالقىلاندى، سونداي- اق ۇكىمەت پەن ۇلتتىق بانكتىڭ ينفلياتسيالىق تارگەتتەۋگە كوشۋ جاعدايىنداعى شۇعىل شارالارى ماقۇلداندى.
ۇلتتىق ەكونوميكا ءمينيسترى ە. دوسايەۆ اتاپ وتكەندەي، شۇعىل شارالار جوسپارى بەس باعىتتان تۇرادى. جوسپار تۇتاستاي ەكونوميكانى دا ءارى ونىڭ جەكەلەگەن سالالارىن دا قورعاۋعا باعىتتالعان.
جوسپارعا سايكەس، ۇكىمەت پەن ۇلتتىق بانكتىڭ قىزمەتى ەكونوميكانىڭ شىنايى سەكتورىن قولداۋعا، جەكە ينۆەستيتسيا تارتۋدى ىنتالاندىرۋعا، جۇمىسپەن قامتۋعا، جاڭا جۇمىس ورىندارىن قۇرۋعا، قارجىلىق تۇراقتىلىقتى ۇستاپ تۇرۋعا، ۇلتتىق قور قاراجاتىن ءتيىمدى پايدالانۋعا، سونداي- اق رەسپۋبليكالىق بيۋدجەت تەڭگەرىمدىگىن قامتاماسىز ەتۋگە باعىتتالاتىن بولادى.
مينيستر «قارجى رەسۋرستارى شەكتەۋلى بولىپ وتىرعان جاعدايدا قاراجات باسىم باعىتتارعا قايتا ۇلەستىرىلىپ، مەملەكەتتىك جانە سالالىق باعدارلامالاردى قارجىلاندىرۋدى وڭتايلاندىرۋ جالعاسىن تابادى، اياقتالادى» دەپ اتاپ ءوتتى. سونىمەن قاتار، ە. دوسايەۆ «شۇعىل شارالار جوسپارى الەۋمەتتىك ماڭىزدى تاۋارلارعا باعانىڭ وسۋىنە جول بەرمەۋ، جەكە تۇلعالار مەن تۇرعىن ءۇي قۇرىلىس جيناق بانكى سالىمشىلارىنىڭ مەرزىمدى دەپوزيتتەرى بويىنشا وتەماقى تولەۋ مەحانيزمىمەن تولىقتىرىلاتىنىن» اتاپ ءوتتى.
جوسپارعا سونداي- اق ونەركاسىپ كاسىپورىندارىن، تۇرعىنداردىڭ الەۋمەتتىك از قامتىلعان توپتارىن قولداۋ جانە جۇمىسپەن قامتۋ بويىنشا جەدەل شارالاردى قامتيتىن وڭىرلىك بلوك تا قوسىلعان.
«شۇعىل سيپاتتاعى باسقا دا امالداردى، سونىڭ ىشىندە جالپى العاندا ەكونوميكانىڭ ناقتى سەكتورىنداعى جاعدايدى تۇراقتاندىرۋعا باعىتتالعان سىرتقى ساۋدانى رەتتەۋ تاريفتىك ەمەس ادىستەرىن، ىشكى نارىقتى قورعاۋ امالدارىن ىسكە اسىرۋ قاراستىرىلىپ وتىر»، - دەپ اتاپ ءوتتى مينيستر.