تەڭگەنىڭ ەركىن اينالىمعا جىبەرىلۋىن اقشانىڭ قۇنسىزدانۋىمەن شاتاستىرماۋ كەرەك - ع. ساتىبالدينا، ب ق و

ورال. قازاقپارات - تەڭگەنىڭ ەركىن اينالىمعا جىبەرىلۋىن اقشانىڭ قۇنسىزدانۋىمەن شاتاستىرماۋ كەرەك.

بۇل تۋرالى ق ر ۇلتتىق بانكى باتىس قازاقستان فيليالىنىڭ ديرەكتورى عاليا ساتىبالدينا ءمالىم ەتتى.

ونىڭ ايتۋىنشا، تەڭگە قۇنسىزدانعان جوق، ول تەك ەركىن اينالىمعا شىعارىلدى. بىلايشا ايتقاندا، قازاقستان جاڭا ەكونوميكالىق ساياساتقا كوشتى. مەملەكەت باسشىسى تەڭگەنىڭ ەركىن اينالىمداعى باعامىن ەنگىزۋ جانە ينفلياتسيالىق تارگەتتەۋگە ءوتۋ ەڭ دۇرىس قادام ەكەنىن ايتتى.

شىن مانىسىندە قازاقستان - الەمدىك قوعامداستىقتىڭ ءبىر بولشەگى، سوندىقتان ءبىرىڭعاي ەكونوميكالىق كەڭىستىكتەن ءبولىنىپ، ءوز الدىنا توماعا- تۇيىق تىرلىك ەتە المايدى. مىسالى، قىتاي ءوز ۆاليۋتاسىنا دەۆالۆاتسيا جاسادى. رەسەي ءرۋبلدى وتكەن جىلى ەركىن اينالىمعا جىبەردى. بىزدە جاعداي تۇراقتى بولىپ كەلدى. رەسەيدە وتكەن توقساندا ينفلياتسيا دەڭگەيى 17 پايىز بولسا، ءبىزدىڭ ەلىمىزدە 4 پايىز بولدى. ينفلياتسيا ءدالىزى 6,8 پايىز بولىپ بەلگىلەنسە، بۇگىندە سوعان جاقىندادىق. ول كورسەتكىش جىل اياعىنا دەيىن ساقتالادى دەپ بولجانۋدا.

تەڭگە باعامىنىڭ ەركىن اينالىمعا جىبەرىلۋىنەن شوشۋدىڭ ءجونى جوق.

ءيا، تەڭگەنىڭ باعامى ءالى تۇراقتالعان جوق. ويتكەنى بۇدان بىلاي ۆاليۋتانىڭ باعامىن ۇلتتىق بانك ەمەس، نارىقتىڭ ءوزى رەتتەيدى. بۇل تەك ءبىزدىڭ قازاقستانعا عانا ءتان ءۇردىس ەمەس، دامىعان ەلدەردىڭ بارلىعى وسى جولدان وتكەن. تەڭگەنىڭ باعامىن سۇرانىس پەن ۇسىنىس قانا وزگەرتىپ وتىرماق. مىسالى، كەيبىر كليەنتتەرگە تەڭگەنى ايىرباستاۋ قاجەت، ەكىنشىلەرىنە كەرىسىنشە دەگەندەي، سوندا تەڭگەگە سۇرانىس كوپ بولسا، ونىڭ باعامى وسەدى. سۇرانىس بولماي، ۇسىنىس كوبىرەك بولسا، وندا تەڭگەنىڭ باعامى تۇسە بەرەدى.

بۇگىن قازاقستاندىق بيرجادا تەڭگەنىڭ دوللارعا شاققانداعى باعامى 253, وڭىردەگى ەكىنشى دەڭگەيدەگى بانكتەر ونى 240 تان ساتىپ جاتىر. ال كەشە بيرجاداعى تەڭگەنىڭ باعامى 255 بولدى. تەڭگەگە سۇرانىستىڭ ازايۋىنا بايلانىستى باعامى تومەندەۋدە، ول ءارى كەتكەندە ءبىر اپتانىڭ ىشىندە تۇراقتالادى. بۇدان بۇرىن رەسەيدىڭ ءرۋبلى تۇسكەندە وبلىستاعى بانكتەر بيىلعى التى ايدا 10 ملرد. 731 ملن. -نان استام ءرۋبلدى ساتىپ جىبەردى. سوندا 30 ميلليارد تەڭگەمىز تىكەلەي رەسەيگە كەتتى. كورشىلەس ەلدىڭ كاسىپكەرلەرىنىڭ تاۋارلارى مەن ازىق- تۇلىگىنىڭ وتىمدىلىگى ارتتى. بۇلاي جالعاسا بەرسە، وتاندىق ەكونوميكا، ءوندىرىس تىعىرىققا تىرەلۋى عاجاپ ەمەس. سوندىقتان جاڭا ەكونوميكالىق ساياساتقا كوشۋ وتاندىق وندىرىسشىلەرگە مىقتى قولداۋ بولادى دەپ بىلەمىن.

«تۇرعىندارعا كۇندەلىكتى تۇتىناتىن ازىق- تۇلىكتىڭ باعاسى وسەدى-اۋ دەپ قورقۋدىڭ رەتى جوق. ءىشىپ- جەپ وتىرعان تاماق تۇرلەرىنىڭ بارلىعى سىرتتان اكەلىنبەيدى عوي. ەت، نان - وزىمىزدىكى، باعا باقىلاۋدا. رەسەيدەن اكەلىنەتىن تاماق تۇرلەرىنىڭ باعاسى ءوسىپ جاتسا، ونى الماي، جەرگىلىكتى ءونىمدى الۋعا بولادى ەمەس پە؟ تابىسىمىز دوللارمەن ەمەس، تەڭگەمەن بەرىلەدى دەگەندەي. ەندى دەپوزيتتەگى جيناقتارعا كەلسەك، ەلباسى ۇلتتىق بانككە جەكە تۇلعالاردىڭ مەرزىمدى دەپوزيتتەرىنە تولەم تەتىگىن ەنگىزۋدى تاپسىردى. ياعني، ايىرباس باعامىنىڭ وزگەرۋىنە بايلانىستى حالىق سالىمدارىنىڭ شىعىندارىن تومەندەتۋ ماقساتىندا بيىلعى جىلدىڭ 18 -تامىزىنا دەيىنگى تەڭگەمەن اشىلعان جەكە تۇلعالاردىڭ مەرزىمدى دەپوزيتتەرىنە (ەسەپشوتتاعى 1 ميلليون تەڭگەگە دەيىن قارجىعا) تولەم تەتىگى ەنگىزىلمەك. سوندىقتان دەپوزيتتەرگە سالىنعان تەڭگەنى دوللارعا، رۋبلگە ايىرباستايمىن دەپ اسىعىس شەشىم قابىلداماعان ءجون»، دەپ تۇيىندەدى ويىن ع. ساتىبالدينا.

اۆتور: ەلجان ەرالى