بيىل قازاقستاندا العاش رەت قۇقىق بۇزعان ادام سانى ميلليوننان اسقان

بۇل بىلتىرعى وسى كەزەڭمەن سالىستىرعاندا 62,2 پايىز ارتىق.
«سونداي- اق ۇساق قۇقىقبۇزۋشىلىقتاردى انىقتاۋ دا ارتتى، ول وتكەن جىلدىڭ 7 ايىمەن سالىستىرعاندا (729468) 64,2 پايىز ءوسىپ، 1198219 دى قۇرادى. وسى جىلى ميلليوننان استام ادام العاش رەت قۇقىق بۇزسا، تاعى دا ميلليونعا جۋىق جۋىق ءىس قايتالاما بەلگىلەرىمەن راسىمدەلدى»، - دەلىنگەن ق ر باس پروكۋراتۋراسى قۇقىقتىق ستاتيستيكا جانە ارنايى ەسەپكە الۋ كوميتەتىنىڭ مالىمەتىندە.
اكىمشىلىك سۋبەكتىلەرىنىڭ پراكتيكاسىندا ايىپپۇل سالۋ - 1,5 ەسە، ەسكەرتۋ - 1,3 ەسە ارتىپ، سونداي-اق سوتتار شەتەلدىكتەردى اكىمشىلىك جولمەن الاستاتۋ تۋرالى بىلتىرعىدان 2,8 ەسە كوپ شەشىم شىعارعان.
سونىمەن بىرگە، اكىمشىلىك قاماۋدىڭ قىلمىستىق قىلىققا اۋىستىرىلۋىنا بايلانىستى وعان تارتىلعان ادامداردىڭ 1,3 ەسە ازايعانى بايقالادى.
اكىمشىلىك ءوندىرىستىڭ قىسقارتىلعان ءتارتىبىنىڭ، ياعني، قۇقىق بۇزعان ادامداردىڭ ءوز كىناسىن بۇلتارىسسىز مويىنداپ، كورسەتىلگەن ايىپپۇل سوماسىنىڭ 7 تاۋلىك ىشىندە 50 پايىزىن عانا تولەۋىنىڭ ەنگىزىلۋى مەملەكەت قازىناسىنا 3 ميلليارد تەڭگە قوستى.
جالپى 13 ميلليارد تەڭگە نەمەسە 38,8 پايىز اكىمشىلىك ايىپپۇل ءوندىرىلدى.
سونىمەن بىرگە، ۇستىمىزدەگى جىلى وتكەن جىلعا تيەسىلى ايىپپۇل جونىندەگى 30 مىڭعا جۋىق قاۋلىنىڭ ورىندالۋى بارىسىندا 3 ميلليارد تەڭگە قايتارىلدى.
جالپى وسى وتكەن كەزەڭدە اكىمشىلىك ايىپپۇلداردى تولەۋ ەسەبىنەن مەملەكەت بيۋدجەتىنە 16 ميلليارد استام تەڭگە ءوندىرىلدى.
اۆتور: رۋسلان عابباسوۆ