قاراتوبەدە «قازاقستان بارىستارى» كۇرەستى - فوتو

اتالمىش جارىسقا ەلىمىز وڭىرلەرىنەن 100 دەن استام پالۋان قاتىسىپ، 8 سالماق دارەجەسى بويىنشا باق سىنادى. وعان قوسا 22 ۇمىتكەر «تۇيە پالۋان» اتاعىن يەلەنۋگە تىلەك ءبىلدىردى. جارتىلاي فينالعا ءتورت پالۋان شىقسا، سوڭعى باسەكەدە «قازاقستان بارىسى» تۋرنيرىنىڭ جەڭىمپازدارى، قوس شىعىس قازاقستاندىق ايبەك نۇعىماروۆ پەن مۇحيت تۇرسىنوۆ بەلدەستى. مۇندا ايبەك جەڭىسكە جەتىپ، باس بايگەگە تىگىلگەن «تەمىر تۇلپاردى» ەنشىلەدى. ءۇشىنشى جۇلدەنى اتىراۋلىق ارمان قاليەۆ يەلەندى.
جەڭىمپاز- جۇلدەگەرلەردى قاراتوبە اۋدانىنىڭ اكىمى، ءوزى دە داڭقتى سپورتشى، ق ر ەڭبەك سىڭىرگەن سپورت شەبەرى، سامبودان ءۇش دۇركىن الەم چەمپيونى، قوس مارتە الەم كۋبوگىنىڭ يەگەرى، دەيۋزودان الەم بىرىنشىلىگىنىڭ قولا جۇلدەگەرى اسحات شاحاروۆ قۇتتىقتاپ، ماراپاتتادى. سونىمەن قاتار ءار سالماق بويىنشا جەڭىمپاز- جۇلدەگەر اتانعاندارعا دا ديپلومدار مەن باعالى سىيلىقتار تابىس ەتىلدى. جەكەلەگەن پالۋاندارعا ءتۇرلى اتالىمدار بويىنشا ەڭسەپ دوسقاليەۆتىڭ نەمەرەسى ايدار دوسقاليەۆ تارتۋ- تارالعىلارىن تاپسىردى.
يبات ەرەشيەۆ باس قازىلىق ەتكەن تۋرنيردە ەڭسەپ دوسقاليەۆتىڭ تۋىسقاندارى، سونداي- اق 2012 - جىلعى «قازاقستان بارىسى» تۋرنيرىنىڭ كۇمىس جۇلدەگەرى، قازاق كۇرەسىنەن ازيانىڭ ءۇش مارتە جانە الەم چەمپيونى شالقار جولامانوۆ، ب ق و دەنە شىنىقتىرۋ جانە سپورت باسقارماسىنىڭ باسشىسى ازامات بەكەت، ب ق و قازاق كۇرەسى فەدەراتسياسىنىڭ پرەزيدەنتى قايمەن ەسەندياروۆ ءسوز الىپ، يگى تىلەكتەرىن جەتكىزدى.
رەسپۋبليكالىق جارىسقا قاتىسۋشى پالۋاندار مەن تۋرنير مەيماندارى قاراتوبە اۋىلىنداعى ورتالىق ساياباقتاعى ەڭسەپ دوسقاليەۆكە ارنالعان ەسكەرتكىش تاقتاعا گۇل شوقتارىن قويىپ، بابا رۋحىنا تاعزىم ەتتى.
ايتا كەتەيىك، بۇدان بۇرىن دا ە. دوسقاليەۆتى ەسكە الۋعا ارنالعان جارىس ۇيىمداستىرىلعان بولاتىن. دەگەنمەن مۇنداي دەڭگەيدە العاش رەت ءوتىپ وتىر.